Markus 13 - Etestemente Epe ✠ 1951

ONTOPORUA 13. Eshuriro rja Jerusalem no rjuujuni.

¹ Sho a zi mo montempeli, gumue guo maarongua je okua ti ku he: Tara ko, Muongi, omamanja niitungua ojo opara ngiini?

² Jesus h’ote mu jamukura: Ou uete tuu iitungua mbi iinene ajishe? Ndere itapu ka kara emanja kombanda hemanja, ajishe otaji kumunua po.

³ Sho a kaatumba kondundu heemono, a taarera kontempeli, Petrus na Jakobus na Johannes na Andreas oje mu pura oj’ike, taa ti:

⁴ Tu rombuera ano, mbika ajishe otaji ka ningua unake? Notshidimburukico otshiini? Neshuriro rjajishe mbi otari ja unake?

⁵ Jesus h’ote ja jamukura: Tareni, kamu pukicue nand’okomuntu.

⁶ Oshoka ojendji otaa ke ja medina rjandje, nde taa ti: Ongaje ngu, nde taa ka pukica ojendji.

⁷ Nge tamu ku uva iita neemurombo diita, inamu mbandara, oshoka ajishe oji nokuningua, ndere natango eshuriro inari ja.

⁸ Oshoka otshiguana otatshi ka cikama, tshi kondjice otshiguana, notshirongo notshirongo otsho tuu. Omakekamo gevi nondjara otahi ke ja, keemukunda no keemukunda. Ajishe mbiono etameko ouara rjuuhehame.

⁹ Itareni ne jene, mu kotoke, oshoka otaa ke mu gandjera epanguro, meesinagoga jo taa ke mu denga neengora, otamu cikamekua miipaci jomarenga no jaakuaniirua morua ndje, mu okorore pu jo.

¹⁰ Evangelium otari ku uvicirua tango uujuni aushe.

¹¹ Nge taa mu fara komapanguro, inamu mbandara tango, shi tamu ka popja, ndere popjeni shi tamu rombuerua meni potundi ndjika, oshoka ha ne tamu popi, aaue, Ombepo Ondjapuki tuu.

¹² Omumuahina ota ka gandja omumuahina mokusa, na she ota gandja omona, naanona otaa ka kondjica aakuruntu, nde taa ja dipaga.

¹³ Ne otamu ka tondiua kaantu ajeshe moru edina rjandje, ndere ngu ti ididimike sigo okusa, ohe ta ku upicua.

¹⁴ Nge tamu mono iishuna jeshanaguro je ja, mpo inaji arikua nande — ngu ta resha, he na nongone — ngu e ri mu Judea, na he meendundu.

¹⁵ Ngu e ri pombanda hondunda, ina rondoroka po a he megumbo; ina ha mo ue a ke ete tsha;

¹⁶ Ngu e ri mepja, ina garuka a ke ete onguuo he.

¹⁷ Ojeeje nahi kare kaasimba no kaamuaari momasiku ngo!

¹⁸ Indireni ike, shi katshi ningue pokufu.

¹⁹ Oshoka momasiku ngono onamu kara iishuna ngashi inaji uvika, jo itaji ku uvika ue okuza ketshito sigo onena.

²⁰ Muene ngeno ina shupipika omasiku ngano, ando kapen’omuntu tu upicua, ndere moru aahogororua je okua shupipika omasiku ngejaka.

²¹ Omuntu nge te mu rombuere mpoka: Tareni Kristus e ri huka nenge huija, inamu tshi iteera.

²² Oshoka ookristusa jiirombo naaprofeti jiirombo otaa ke ja, jo taa ka ronga omadidiriko niirongankondo, opo ja pukice uo aahogororua, nge taa tshi vuru.

²³ Kareni nuudiginini, tareni, onde tshi mu shunganekera.

²⁴ Momasiku ngano nga taga randura iishuna mbi, etango otari ruuda, nomuedi otagu kara itagu jere ue.

²⁵ Eenjoci otadi gu ko keguru, neenkondo di di ri keguru, otadi tengenja.

²⁶ Petango ndioka onaa ka mona Omuna guOmuntu, te ja miikogo neenkondo nehadimo.

²⁷ He ta tumu ko aajengeli je ja ka gongorore ko aahogororua je keembinga adishe iine, okuza keshuriro rj’uujuni sigo okuunene ueguru.

²⁸ Ihongeni ejere komukuju. Iitaji jago nge taji rouo, nuufo nge tau ja ko, otamu dimburura nokutja okuenje oku ri popepi.

²⁹ Notsho uo ne, nge mu uete ajishe mbijaka taji ningua, tshiueni, eshuriro ori ri popepi unene potsheero.

³⁰ Tshiri, andi mu rombuere, orudi nduka itaru shuru po, manka ajishe inaji ningua.

³¹ Eguru nevi otari shuru po, ndere eehapu dandje itadi shuru po.

³² Ndere esiku notundi ndjija kapen’omuntu e hi tshi, naajengeli uo nOmona, oTate oh’ike tuu.

³³ Taatareni, diginineni, ne tamu garikana, oshoka kamu tshi otundi ndjino.

³⁴ Otaku ningi ngashi omuntu, ngu ta ka tshiinga, ta cigi po egumbo rje, ta p’aakareri epangero mu keshe tuu otshironga, nde ta rombuere omurangeri guotsheero a taatare.

³⁵ Taatareni ano, oshoka kamu tshi otundi, muene guegumbo nge te ja, ongura nenge uusiku, omakondomboro nge tag’igi nenge etango nge tari piti.

³⁶ Opo ke mu ade mua koca, nge te ja ombazirira.

³⁷ Shi tandi mu rombuere, otii tshi rombuere uo ajeshejeshe: taatareni!