Markus 12 - Etestemente Epe ✠ 1951

ONTOPORUA 12. Ejere rjaarongi aakorokoshi.

¹ H’ota popi ku jo momeere, ta ti: Opua ri pu nomuntu a tsike epja rje rjomavinju. Te ri dingirire ongumbu, ta cere mo otshikameno tshomavinju, ta tungu ondunda onde herangero, ti icana aarongi, je ri ronge, nde ta ke enda kotshirongo tshi ri kokure.

² Erara rjetejo sho rja ciki, h’ota tumu omupija kaarongi mbejaka, a ka peue ku jo shi tsha mena motshikunino.

³ Jo taa kuata omupija, taa mu denge, nde taa mu tumu a tshune ouara.

⁴ H’ota tumu itshee omupija ku jo, nde taa mu epeke uo, taa mu tuku.

⁵ Ta tumu omupija omutitatu, nde taa mu dipaga, notsho tuu ojendji, jamue po oje ja denge, jamue po je ja dipaga po.

⁶ Ndere natango okuna omona gumuike, e mu ore unene. Shugunina h’ote mu tumu uo ku jo, ti ipopire: otaa ka tira omumuandje ngu nesimano.

⁷ Ndere aarongi taa kundacana: nguka omucigururi, ireni, tu mu dipageni po, uuciga ue otau ningi uetu.

⁸ Jo taa mu kuata nduno, taa mu dipaga po, nde taa mu umbire pondje hotshikunino.

⁹ Muene guotshikunino ota ka ninga tshike? Ote ke ja a dipage aarongi, nde ta pe otshikunino aarongi ji iri.

¹⁰ Inamu resha po nani mpa tapu ti: Emanja ndi rje ekeruashi kaatungi, orjo rja ninga emanja rjo potshikororo?

¹¹ Ku Muene otsha ningua ngaaka, tsho tsho otshikunici momesho getu.

¹² Nena oja ara okumukuata, ndere oja tira aantu, jo oja dimburukua naua, nokutja ojo taa popi momeere. Jo taa nu cigi po, nde ta hi.

Aafariseji taa pura efendero.

¹³ Ndere taa tumu ku he aafariseji jamue naaherodiani, je mu kuate meehapu de.

¹⁴ Jo je ja ano, nde taa ti ku he: Muongi, otu tshi tshi, nokutja ongue guotshiri, guee kuna nande nomuntu, oshoka ku tara orupe ruomuntu, ndere oto rongo ondjira ha Karunga notshiri. Otshu uka tuu okufuta efendero rjomukuaniirua nenge inatshu uka, natu ri fute nenge inatu ri futa?

¹⁵ Jesus ta nongo iirundo jauo, ta ti ku jo: Otshike tamu makere ndje? Eteni po ondenari, ndi hi tare.

¹⁶ Jo taa mu etere himue, nde te ja pura: Ecano ndi nokutshanga okua re? Jo taa ti: Okuomukuaniirua.

¹⁷ Jesus h’ote ja jamukura: Gandjeni nduno komukuaniirua shi tshomukuaniirua, nde ku Karunga shi tsha Karunga. Jo je mu kuminua ko tshiri.

Aasaduseji taa pura ejumuko.

¹⁸ Naasaduseji oje ja ku Jesus, mba taa ti: kapen’ejumuko. Jo taa mu pura nduno:

¹⁹ Muongi, Moses okue tu rombuere: Omumuahina guontumba nge ta si, nde ta cigi po omukiintu ke nojana, omumuahina he no okane nduno omukiintu gua nguija a varere omumuahina oruvaro.

²⁰ Jo aamuahina aarumentu oja ri uunuaari. Guotango okuo okana omukiintu, nde ta si, ina ciga po oruvaro.

²¹ Nena omutijaari te mu okana, nde ta si uo, ina ciga po oruvaro. Notsho tuu omutitatu.

²² Notsho ajeshe uunuaari, ndere inaa ciga po oruvaro. Nde shugunina nomukiintu uo ta si.

²³ Mejumuko ano, nge taa jumuka, omukiintu ngu ota ka ninga gua re, oshoka ajeshe uunuaari oje mu okana?

²⁴ Jesus h’ota jamukura: Inamu puka nani, oshoka omambo kamu ga tshi, neenkondo da Karunga otsho?

²⁵ Oshoka nge ja jumuka, itaa hokana, jo itaa hokanua ue, otaa ka ninga ng’aajengeli meguru.

²⁶ Ndere shono tshaasi, nokutja otaa ka jumuka, inamu tshi resha nani membo rja Moses, mehepururo tari popi otshishua tshomano, Karunga sho ta ti ku he: Ongaje Karunga ka Abraham no ka Isaak no ka Jakob?

²⁷ He ke shi ano Karunga kaasi, aaue, okaanamuenjo tuu. Ano mua puka.

Aanongo jomambo taa pura otshipango tshotango.

²⁸ Gumue po paanongo jomambo okue engene ko, ngu a puakene eembata dika; sho a mono, nokutja okue ja jamukura naua, h’ote mu pura: Otshipango tshotango mu ajishe otshiini po?

²⁹ Jesus h’ote mu jamukura: Otshipango tshotango otshino: Puakena, Israel, Muene Karunga kohe, ohe Karunga gumue.

³⁰ Ora Muene Karunga kohe nomutima guohe agushe nomuenjo guohe agushe neendunge dohe adishe neenkondo dohe adishe.

Otsho otshipango tshotango.

³¹ Tshimue otshitijaari oshija: Ora mukueni ngashi u ihore muene. Kakuna otshipango tshi vure shino.

³² Omunongo guomambo h’ota ti ku he: Tsho otshu uka, Muongi, ua popja notshiri, nokutja oku na Karunga gumuike, kakuna ue gumue a hiri, aaue, oh’ike tuu.

³³ Okumuora nomutima agushe neendunge adishe nomuenjo agushe neenkondo adishe nokuora mukuauo ngashi he muene, shika otshi vure omagano gefikiro nomagano ageshegeshe.

³⁴ Jesus sho a mono, nokutja okua jamukura nuunongo, okua ti ku he: Nguee ku ri kokure notshirongo tsha Karunga. Kapua ri ue nand’omuntu, ngu i itsica okumupura.

Omarongo gaari montempeli.

³⁵ Mokuronga montempeli Jesus h’okua pura: Aanongo jomambo otaa ti ngiini, nokutja Jesus Omumua David?

³⁶ David muene okua tire mOmbepo Ondjapuki: Muene okua ti ku Muene guandje: Kaatumba korurjo ruandje sigo ote rangeke aatondi johe poshi keempadi dohe.

³⁷ Ano David muene ote mu ti Muene, ongiini nduno Omona gue? Ongundu haantu ho he mu puakene nenjanju.

³⁸ H’ota ti ku jo merongo rje: Angareni aanongo jomambo, mba je ore okuenda meenguuo eende, jo ja ara okukundua apeshe.

³⁹ Meesinagoga taa kongo eembanka do pombanda no piituci iipundi jotango.

⁴⁰ Taa ri po iinima jaasherekadi, taa ti: oja ara okujagarikanena nomagarikano omare anuua. Epanguro edigu otari ja mu jo.

⁴¹ He Jesus okua kaatumba a taarera otshikeca tshomagano, ta tara aantu, sho taa humbire mo iimariua motshikeca tshomagano. Aajamba ojendji oju umbire mo ojindji.

⁴² Nomusherekadi omucigona te ja, ta tura mo iijari iitshona, nokutja epeni rimue.

⁴³ H’oti icana po aarongua je, ta ti ku jo: Tshiri, andi mu rombuere, omusherekadi ngu omucigona okua tura mo e vure ajehe, mba ju umbire mo motshikeca tshomagano.

⁴⁴ Oshoka ajeshe oju umbire mo komuudo gauo, ndere ngu okua tura mo kuucigona ue ajishe, mbi e na, iiparuco je ajeshe.