Markus 11 - Etestemente Epe ✠ 1951

ONTOPORUA 11. Jesus ta ambererua mu Jerusalem.

¹ Sho ja ciki pu Jerusalem, popepi na Betania na Betfage, pondundu heemono, okua tumu jaari jo maarongua je.

² Nde ta ti ku jo: Indeni komukunda, ngu gu ri komesho geni, naanzija nge mua hi mo, otamu ka mona okandongi ka mangua, omuntu ina ronda nanena ku ko; ka mangurureni, ne mu ke ete.

³ Omuntu ng’ote mu pura; otamu ningi tshike na ko, popjeni ike: Muene okue ka pumbua, naanzija ote ke eca.

⁴ Jo otaa hi, nde taa mono okandongi ka mangua potsheero pondje, peharara, nde taa ka mangurura.

⁵ Jamue po, mba ja cikama po, oja ti ku jo: Otamu ningi tshee, sho tamu mangurura okandongi?

⁶ Jo taa popi ngashi Jesus e ja rombuere, jo taa ke ja pe.

⁷ Jo taa fara okandongi ku Jesus, taa ka kutire omaruakani gauo, nde he ta rondo ko.

⁸ Ojendji no ja jara eenguuo dauo mondjira, jamue taa tete iitaji iitarara momapja, jo taa ji shana mondjira.

⁹ Na mba ja tetekere na mba ja randura ko, ajeshe otaa higida: Hosiana.

¹⁰ Na ambererue ngu te ja medina rja Muene, notshirongo tsha tate David natshi ambererue, shi tatshi ja. Hosiana gomombanda.

¹¹ H’ote ja ku Jerusalem, nde ta hi montempeli. Sho a tara ajishe miihende jaho, okua hi puamue na mbeja omurongo na jaari ku Betania, oshoka etango orja ri rja ningina.

Omukuju tagu cingua.

¹² Esiku rja nofu taa zi mo mu Betania, he ta s’ondjara.

¹³ Sho a mono kokure omukuju gu nomafo, okua hi ko a tare, nge ta mono tsha mu go. Ndere sho a ciki, oku uete ike omafo, oshoka karja ri ecimbo rjiihimati.

¹⁴ H’ota ti ku go: Nandoonando omuntu ta ka rja iihimati mu nguee sigoosigo. Aarongua jo taa tshu uvu.

¹⁵ Jo taa hi mu Jerusalem. Sho a hi montempeli, okua tida mo montempeli mba taa randa na mba taa randica, nde ta kandura po iitafura ja mba taa tshendje iimariua niipundi ja mba taa randica eenguti.

¹⁶ He ina ara nand’omuntu a hende a humbata otshijuma montempeli.

¹⁷ Nde te ja rongo, ta ti: Inatshi tshangua nani, nokutja ondjugo handie nahi rukue ondjugo homagarikano hiiguana ahishe? Ndere ne omue hi ninga okuena kuaafuci?

¹⁸ Aapristeri aakuruntu naanongo jomambo, sho je tshu uvu, oja kongo ja vure okumudipaga, jo je mu tira, oshoka aantu ajeshe oja kuminua unene erongo rje.

¹⁹ Etango sho rja ningine, okua zi mo momukunda.

²⁰ Ngura, sho ja piti po pomukuju, oje gu mono gua kukuta ciru okuza keemudi.

²¹ Petrus okua dimburukua eehapu de, nde ta ti ku he: Muongi, tara omukuju ngu ua cinga, ogua kukuta.

²² Jesus h’ota jamukura: Omu nehiteero mu Karunga?

²³ Tshiri, andi mu rombuere: Keshe ngu ta rombuere ondundu ndjika: ijeruca, ngueje u ihumbire mefuta, he ita rimbirirua nande momuenjo gue, ndere oti iteere, kutja ajishe mbi ta rombuere, otaji ningua uo, otsho tatshi mu ningirua.

²⁴ Ano otii mu rombuere: Atshishe shi tamu indire ngaa megarikano, tshi iteereni nokutja otamu ke tshi peua, sho otatshi mu ningirua.

²⁵ Nge mua cikama okugarikana, tango diminacaneni po eendjo, nge mua ningacana nomuntu, opo uo Sho, ngu e ri meguru, e mu dimine po eendjo deni.

²⁶ Ndere ng’itamu diminacana po, na Sho, ngu e ri meguru, ite mu dimine po eendjo deni.

Aafariseji taa purire Jesus epangero rje.

²⁷ Jo je ja itshee ku Jerusalem. Manka te endahenda montempeli, aapristeri aakuruntu naanongo jomambo naakuruntukuruntu oje engene ku he.

²⁸ Jo taa ti ku he: Omeenkondo di ini to rongo shika? Ore e ku pa epangero ndika u ronge ngaaka?

²⁹ Jesus h’ota jamukura, ta ti ku jo: Na ngaje onda ara ndi mu pure ohapu; nge mua jamukura ngaa, ngaje otii mu rombuere uo, kutja omeenkondo da re tii rongo shino.

³¹ Jo taa kundacana, taa ti: Ng’atu ti okeguru, nena he ta ka tja: Otshike nduno inamu mu iteera?

³² Ng’atu ti okaantu, nena otatu tira aantu, oshoka ajeshe oja tire Johannes omuprofeti omunene.

³³ Ano jo taa jamukura Jesus: Katu tshi tshi. Jesus h’ota jamukura: Na ngaje itii mu rombuere kutja omeenkondo da re te rongo shino.