Markus 10 - Etestemente Epe ✠ 1951

ONTOPORUA 10. Ehokano hari manga aantu.

¹ H’okua zi ko hoka, nde te ja motshirongo tsha Judea haandija ha Jordan. Aantu ojendji taa higongere pu he, he te ja rongo itshee ngashi i igirira.

² Aafariseji jo otaa hengene ko je mu makere, taa pura: Otshu uka tuu, omuntu a rareke omukiintu gue?.

³ H’ota jamukura, ta ti: Moses okue mu rombuere tshike?

⁴ Jo otaa ti: Moses okua pitikire okutshanga ombirive herareko, omukiintu a rarekue.

⁵ Jesus te ja jamukura, ta ti: Omoru uukukutu ueemutima deni okue mu tshangere otshipango tshino.

⁶ Ndere okuza ketameko rjetshito Karunga okue ja tshitire omurumentu nomukiintu gumue.

⁷ Ano omurumentu ota ka ciga po she na hina a kare nomukiintu gue.

⁸ Jo otaa ka ninga jaari monjama himue. Ano jo kaa shi ue jaari, aaue, onjama tuu himuike.

⁹ Ano shi Karunga a tura kumue, omuntu ine tshi kuca kumue.

¹⁰ Megumbo aarongua je taa mu pura itshee eehapu dino.

¹¹ H’ota ti ku jo: Keshe ngu ta rareke omukiintu gue, nde to okana gumue a hiri, oto ondere.

¹² Nomukiintu ngu ta rareke omurumentu gue, nde to okanua ku gumue a hiri, oto ondere.

Jesus nuunona.

¹³ Jo je eta ku he uunona, e u njenge. Ndere aarongua oja ganda mba je u eta.

¹⁴ Jesus h’ote tshi mono, ta geje nokuri, nde ta ti ku jo: Eceni uunona u je ku ngaje, inamu u kerera, oshoka otshirongo tsha Karunga otsha mbuka.

¹⁵ Tshiri, andi mu rombuere, ngu ita tuumba otshirongo tsha Karunga ong’okanona, ita ka ha mo.

¹⁶ Te u uukata momooko ge, te u tenteke omake, nde te u jambeke.

Omumati omujamba.

¹⁷ Sho a zi mo, nde ta hi mondjira, gumue okue ja po nzija, ta ts’eengoro pu he, nde te mu pura: Muongi omuanaua, nandi ronge tshike, opo ndi mone omuenjo guarushe?

¹⁸ Nde Jesus ta ti ku he: Otshike to ti ndje omuanaua? Kakun’omuanaua, gumuike tuu, oKarunga.

¹⁹ Iipango ou ji tshi: Ino dipaga, ino ondera, ino jaka, ino rundira, ino jeka, nde simaneka sho na njoko.

²⁰ Nguijaka ta jamukura, ta ti: Muongi, ajishe mbi onde ji diginina okuza kuunona uandje.

²¹ Nde Jesus te mu tara, h’oku mu ore, ta ti he: Oua pumbua tshimue natango: Inda u ka randice po atshishe shi u na nde to tshi p’aacigona, opo to ka kara u neriko meguru. Nguee to ja u randure ndje, nguee u umbate omutshigakano guohe.

²² Nde ta sir’uupongo ohapu ndjika, ta hi a hehama momuenjo, oshoka okua ri niinima ojindji.

²³ Jesus h’ota regarega, nde ta ti kaarongua je: Mba je niinima ojindji, otaa huvu uudigu u cike peni okuha motshirongo tsha Karunga!

²⁴ Aarongua oja kuminua eehapu dino, nde Jesus te ja rombuere itshee: Janona ne, mba haa hinekere iimariua, otaa huvu uudigu u cike peni okuha motshirongo tsha Karunga!

²⁵ Ongamero ngeno hi pite mombururu honguija oshuepo tshi vure omujamba a he motshirongo tsha Karunga.

²⁶ Naangashiingika oja rurirua nokuri, nde taa puracana: Ore ano ta vuru okuupicua?

²⁷ Jesus h’ote ja tara, nde ta ti: Paantu otsha njengua nde pu Karunga aaue, oshoka Karunga ka njengua ku tsha.

²⁸ Petrus h’ota ti ku he: Tara, otua ciga po ajishe, ss’otue ku randura.

²⁹ Jesus ta jamukura: Tshiri, otii mu rombuere, kakuna ngu a ciga po egumbo nenge aamuahina aarumentu naakiintu nenge she na hina nenge aanona nenge omapja morua ndje no moru evangelium.

³⁰ Nde ina peua ruticere, nena muujuni mbu omagumbo naamuahina aarumentu naakiintu noohina naanona nomapja tuu mokati komaciminiko, ndere muujuni mbu tau ke ja omuenjo guarushe.

³¹ Ojendji ja mbo jotango jo taa ka ninga aashugunini, nojendji ja mba aashugunini jo taa ka ninga jotango.

Jesus tu uvica omeepeko ge orutitatu.

³² Jo taa hende manka mondjira, nde taa hi kombanda ku Jerusalem. Jesus h’ote ja tetekerere, jo taa mu randura, nde ja kumua ko, ju uda uumbanda. Ti icana itshee mbeja omurongo na jaari, nde ta shimbike okujarombuera shi tatshi ke mu ningirua.

³³ Tareni, otatu hi kombanda ku Jerusalem, nde Omuna guOmuntu ota gandjerua aapristeri aakuruntu n’aanongo jomambo naakuruntukuruntu, jo taa ke mu tokora a se, a gandjerue aapagani.

³⁴ Jo otaa ke mu tsheka, taa mu sijire omate, taa mu denge neengora, taa mu dipaga, nde konima homasiku gatatu ta ka jumuka.

Aana ja Zebedeus.

³⁵ Nopo mpo Jakobus na Johannes, aana ja Zebedeus, taa hengene ko, taa ti ku he: Muongi, otua ara u tu pe shi tatu ku indire.

³⁶ H’ota ti ku jo: Omua ara tshike, ndi tshi mu ningire?

³⁷ Jo otaa ti ku he: Tu pa, sse tu kaatumbe mehadimo rjohe, gumue korurjo ruohe, mukuauo korumosho ruohe.

³⁸ Nde Jesus ta ti ku jo: Kamu tshi tshi nande shi tamu indire; otamu vuru ngiini okunua otshinuino shi tandi ka nua nenge okutshatshua netshatsho, ndi ngaje tandi ka tshatshua na rjo?

³⁹ Jo otaa ti ku he: Eno, otatu tshi vuru. Nde Jesus te ja rombuere: Otamu ka nua ngaa otshinuino shi tandi ka nua, ne tamu ka tshatshua ngaa netshatsho, ndi tandi ka tshatshua na rjo.

⁴⁰ Ndere okumupa mu kaatumbe korurjo ruandje nenge korumosho ruandje katshi shi otshironga tshandje, okupa ike mba je tshi rongerua.

⁴¹ Mbejaka omurongo, sho je tshu uvu shi, oja shimbike okuganda Jakobus na Johannes.

⁴² Nde Jesus te ji icana ku he, ta ti ku jo: Omu tshi tshi ngaa, nokutja ajeshe, mba taa tiua omarenga giiguana, ojo taa ji rere neciminiko, jo aakuruntu jauo taa ja pangere.

⁴³ Ha tsho mokati keni, ndere ngu a hara a ninge omukuruntu ku mukuauo, na ninge omukareri gueni.

⁴⁴ Ngu a hara a ninge guotango mokati keni, na ninge omupija guajeshe.

⁴⁵ Oshoka Omuna guOmuntu uo ine ja okukarerua, aaue, okukarera tuu, h’a gandje omuenjo gue okuupica ojendji.

Omuposi te eruka pu Jeriko.

⁴⁶ Oje ja manka ku Jeriko, nde sho a zi mo mu Jeriko puamue naarongua je nongundu onene haantu, omumua Timeus, edina rje Bartimeus, omuposi okua kaatumba pondjira te ehera.

⁴⁷ Sho tu uvu kutja Jesus omunazareta te ende po, okua shimbike okuigida pombanda unene: Mumua David, sa ndje oshenda!

⁴⁸ Ojendji taa mu ganda a muene. Nde ti igida neui enene ri vure po: Mumua David, sa ndje oshenda!

⁴⁹ Jesus h’ota cikama, te ja rombuere je mu icane. Jo taa hicana omuposi, nde taa ti ku he: Ikorerera, cikama, ote ku icana.

⁵⁰ Te ekereshi eruakani rje, ta cikama nzija, nde ta hi ku he.

⁵¹ Jesus h’ote mu popica, ta ti: Oua ara ndi ku ningire tshike? Nd’omuntu omuposi ta jamukura: Muene, kuaca ndje ndi mone ko.

⁵² Nde Jesus ta ti ku he: Inda, ehiteero rjohe orje ku kuaca. Naanzija okua mono ko, nde te mu randura mondjira.