Markus 1 - Etestemente Epe ✠ 1951

ONTOPORUA 1. Johannes Omutshatshi.

¹ Etameko rjevangelium rja Jesus Kristus, Omumua Karunga orjo ndika.

² Ngashi pua tshangua ku Isaias omuprofeti, ta ti: Tara, ngaje ote tumu omujengeli guandje komesho gotshipara tshohe, ngu te ke ku rongikidira ondjira hohe.

³ He eui rjomuhigidi mombuga. Rongereni Muene omapora, ukiriceni eendjira de.

⁴ Ohe Johannes, ngu a ri ha tshatsha mombuga, he tu uvica etshatsho rjehigaruro okediminopo rjeendjo.

⁵ Jo aantu ejeshe jo mu Judea no mu Jerusalem oje ja ku he, nde taa tshatshua ku he momuronga Jordan nokuihokorora eendjo dauo.

⁶ Johannes okua zara onguuo ha tungua nuufufu ueengamero, epaja rjiipa korutu rue, nde ta ri eembashu nomagadi geenjutshi. H’otu uvica, ta ti:

⁷ Gumue ote ja, ta randura ndje, e neenkondo e vure ndje. Inandi opara ndi mu injongamene, ndi mangurure eemunja deengaku de.

⁸ Ngaje onde mu tshatsha nomeja, nde he ote ke mu tshatsha nOmbepo Ondjapuki.

Jesus ta tshatshua.

⁹ Momasiku ngejaka Jesus okua zi ku Nazaret mu Galilea, nde ta tshatsua ku Johannes mu Jordan.

¹⁰ Sho a zi mo momeja, oku uete eguru rje eguruka, nd’Ombepo Ondjapuki tahi ningine mu he ha f’onguti, ho tahi mu tenene.

¹¹ Nde eui tari zi keguru, tari ti: Ngueje omumuandje omuorike, nde ku okua.

¹² Naanzija tuu Ombepo ho tahi mu ciminike a he mombuga.

¹³ Nde ta kara mombuga omasiku eemurongo iine, uusiku nomutenja. H’ota makerua ku satana, e ri mokati kiirikama, nde aajengeli taa mu karere.

Aarongua jotango.

¹⁴ Johannes sho a kuatua, a turua meemango, Jesus okue ja ku Galilea, tu uvica evangelium rjotshirongo tsha Karunga.

¹⁵ Ta ti: Erara orja pua, otshirongo tsha Karunga otsha cika, igarureni, ne iteereni evangelium.

¹⁶ Manka te ende rokomunkunkuro guefuta rja Galilea, okua mono Simon na Andreas, omumuahina gua Simon, taa humbire iijurico jauo mefuta, oshoka oja ri aajuri jeeshi.

¹⁷ Jesus ta ti ku jo: Randurii ndje, otii mu ningi aajuri jaantu.

¹⁸ Nopo tuu mpoka oja cigi po iijurico jauo, nde taa mu randura.

¹⁹ Sho a zi po mpoka katshona kouara, h’okua mono uo Jakobus, omumua Zebedeus, nomumuahina Johannes, mba ja adikua taa haandeke iijurico jauo mosikepa.

²⁰ H’ote ji icana mpoka. Nde taa cigi po she Zebedeus naapija je mosikepa. Jo uo taa mu randura.

²¹ Taa hi puamue ku Kafarnaum. He ta hi mesiku ndija rjesabata mosinagoga, nde te ja rongo.

²² Jo ja kumua kerongo rje, oshoka okua ta rongo ng’omuntu e neenkondo, ka kutja ongashi aanongo jomambo.

²³ Mosinagoga ndjika omua ri mu nomuntu a kuatua kombepo ombuineji. Ngu ti igida, ta ti:

²⁴ Otu na tshee na nguee, Jesus omunazareta? Oue ja u tu jone po? Ondi ku tshi, kutj’onguee re. Onguee mujapuki gua Karunga.

²⁵ Jesus h’ote mu ganda, ta ti: Muena, nde za mo momuntu ngu!

²⁶ Manka ombepo ombuineji tahi mu shikagura, ho tahi zi mo nduno mu he, nde tahi jogerere.

²⁷ Ajeshe oja kumua ko, taa puracana, taa ti: Otshitshee? Erongo epe ori neenkondo di cike peni? Oshoka ota pangere eembepo embuineji neenkondo, nde tadi vurika ku he.

²⁸ Omurombo gue ogui ifaraafara nzija keemukunda no keemukunda mu Galilea.

Jesus megumbo rja Petrus.

²⁹ Naangashiingika h’ota zi mo mosinagoga, nde ta hi nondjira hu ukirira puamue na Jakobus na Johannes maandja Petrus na Andreas.

³⁰ Hinamueno ha Simon okua ri noruidi. Nopo mpo jo taa mu popire.

³¹ Jesus h’ote engene ko, te mu kuata keke, nde te mu kaatumbike. Pokarara oko hoka oruidi ruo rue mu cigi po, nde te ja jakura.

³² Onguroshi, etango rja ningina, aavu ojendji oje etua ku he, naantu mba je neembepo eembuineji.

³³ Omukunda agushe ogui igongere potsheero.

³⁴ Jesus h’ote erukica ojendji, mba je epekua kuuvu uopendji, nde ta tida mo uo eembepo eembuineji odindji, te di muenica, oshoka ode mu dimburura.

³⁵ Ngaangura h’ota meneka, ta hi a ki ikarere, nde ta garikana.

³⁶ Simon na ajeshe, mba ja ri na he, jo taa mu randura.

³⁷ Jo otaa mu mono, taa ti: Ajeshe otaa ku kongo.

³⁸ Nde he ta ti ku jo: Tu eni pu iri meemukunda zo muutshiinda, ndi ju uvicire uo, oshoka otsho tsha tumica ndje.

³⁹ H’ote ende apeshe mu Galilea, tu uvica meesinagoga dauo, nde ta tida mo uo eembepo eembuineji.

Omuntu e notshirundu, te eruka.

⁴⁰ Nd’omuntu gumue ote ja ku he, e notshirundu. H’ote mu indire, ti ishata keengoro de, ta ti: Nge ua ara, oto vuru okujereka ndje.

⁴¹ Jesus h’ote mu sir’oshenda, ta tenteke eke rje, te mu njenge, ta ti: Onda ara: jera!

⁴² Manka Jesus te tshi popi, otshirundu otshe mu eca, nde ta jere.

⁴³ H’ote mu kumagida, te mu ganda, te mu zica mpoka.

⁴⁴ Nde ta ti ku he: Tara, ino tshi rombuera nand’omuntu, ndere inda u ki itarice komupristeri, ngueje u gandjere ejereko rjohe shi tsha romborua ku Moses, otsho to jo okororere.

⁴⁵ H’ota hi, nde ta shimbike okutshishiija meemukunda notsho ano Jesus ita vuru okuenda ue momukunda mokati kaantu, nde ta hi a kare pondje i ikarere ohike; Ndere aantu oje ja ku he, taa zi keembinga azishe.