Lukas 9 - Etestemente Epe ✠ 1951

ONTOPORUA 9. Etumo rjaapostoli.

¹ H’okua gongere aapostoli omurongo na jaari, te ja pe eenkondo nepangero okutida mo eembepo eembuineji adishe nokuerukica aavu.

² Te ja tumu uo okuuvica otshirongo tsha Karunga nokupanga aavu.

³ He ta ti ku jo: Inamu ha na tsha mondjira, nand’onodimbo nenge nompunda nenge noshima nenge niimariua, itshee inamu kara mu neenguuo mbaari.

⁴ Mpo tamu hi megumbo, kareni mo, ne itamu zi po mpoka.

⁵ Ndere ng’inaa mu tuumba, po, zeni po ike pomukunda ngoka, ne tamu ipupura ontsi keempadi deni; shi tatshi ningi ehokororo ku jo.

⁶ Jo ja hi ano, taa hendahenda meemukunda, taa huvica evangelium, jo taa panga ajeshe.

⁷ Herodes, erenga rjotshitine tshotshirongo, h’otu uvu ajishe, mbi ja ningua, he ti irumata, oshoka jamue oja ti:

⁸ Johannes okua jumuka kuusi, jamue: Elias okuo oroka, jamue ji iri: Gumue guo maaprofeti jonare okua jumuka.

⁹ Nde Herodes ta ti: Johannes onde mu kekere omutse, ano ore ngono, ngu ndi uvite, ta rongo iironga ji cike mpo? A hara unene e mu tare nomesho.

¹⁰ Aapostoli oja garuka, nde taa hepururire Jesus atshishe shi ja ronga. H’ote ja njangura po, nde ta hi na jo konima ku iri, ro ku Betania.

Jesus ta kutica omajovi gatano.

¹¹ Aantu sho je tshu uvu, na jo taa mu randura, he te ja kundu, te jo okororere otshirongo tsha Karunga, nde te erukica uo ajeshe, mba ja pumbua ekuaco.

¹² Onguroshi sho he ke ja, omurongo na jaari taa hengene ko, taa ti: Rareka aantu, ja he meemukunda no miihende, ja ka kongo eemuraro nuurarero, oshoka mpoka otu ri ouara mombuga.

¹³ He ta ti ku jo: ja peni okurja! Nde taa ti: Otu n’ike eemboroto ntano neeshi mbaari, shira otatu hi, tu ka randere aantu mba ajeshe iiKurja.

¹⁴ Aantu oja ri po aarumentu omajovi gatano. Ta rombuere aarongua: Ja kaatumbikeni, eengundu neengundu, keshe himue hi cike peemurongo ntano.

¹⁵ Otsho ja ningi, taa kaatumbike ajeshe.

¹⁶ Nde Jesus ta kuca eemboroto ntano neeshi mbaari, ta rigamene keguru, te di jambeke, te di pambura, he te di gandja kaarongua, je di toporere aantu.

¹⁷ Ajeshe taa ri, taa kuta, nde pua torua di du upa ko, iimbare omurongo niijari ju uda uupambu.

Ehokororo rja Petrus.

¹⁸ Esiku rimue Jesus sho i ikarere a garikane, aarongua taa gongara uo pu he, he te ja pura: Aantu otaa ti ngiini, ongaje re?

¹⁹ Jo taa jamukura: Jamue taa ti, onguee Johannes omutshatshi, jamue Elias, jamue ji iri: gumue guo maaprofeti jonare a jumuka.

²⁰ Nde he ta ti ku jo: Ne nduno otamu ti ndje, ongaje re? Simon Petrus ta jamukura: Onguee Kristus ka Karunga.

²¹ H’ote ja kumagida nokuri, te ja rombuere tshiri kaa tsho okororere nand’omuntu.

²² Oshoka Omuna gu Omuntu oku nokuepekua unene, ta ke ekeruashi kaakuruntu no kaapristeri aakuruntu no kaanongo jomambo, ta dipagua, nde ta jumuka konima homasiku gatatu.

²³ Nde ku ajeshe ta ti: Omuntu, ngu a hara a randure ndje, ni idimbike muene, he ni itsike omutshigakano gue keshe esiku, tsh’otsho ta randura ndje.

²⁴ Oshoka ngu a hara okuupica omuenjo gue, ote ke gu kanica po, nde ngu ta kanica omuenjo gue morua ndje, ohe te ke gu upica.

²⁵ Oshoka otatshi kuaca tshike omuntu, nge ta jugu uujuni aushe, nde nani ti ikanica muene, he ta mono iishuna mu he muene.

²⁶ Ngu ta si ndje oshoni neehapu dandje, nOmuna guOmuntu ote ke mu s’oshoni uo, nge te ja mehadimo rje no mehadimo rja She no rjaajengeli aajapuki.

²⁷ Tshiri, andi mu rombuere, jamue ja mbo ja cikama mpano, itaa ka makera okusa sigo otaa ka mona otshirongo tsha Karunga.

Jesus kondundu Tabor.

²⁸ Omasiku uunutatu oga piti po, sho a popi eehapu dika, okua kuca Petrus na Jakobus na Johannes, nde ta rondo na jo kondundu a garikane.

²⁹ Manka ta garikana, orupe ruotshipara tshe orua tshituka, nd’eenguuo de adi toka, do tadi adima.

³⁰ Nde tara, aarumentu jaari taa kundacana na he: Moses na Elias.

³¹ Jo oroka mehadimo, jo taa kundacana okuza kue, te ke ku shurica mu Jerusalem.

³² Ndere Petrus nojakuauo taa huvu eemposi eedigu; sho ja penduka, jo ja mono ehadimo rje naarumentu mbeja jaari, ja cikama pu he.

³³ Sho ja ara je mu rareke, Petrus ta ti ku Jesus: Muongi, mpaka op’uuhanaua mpa, tu tungeni eendunda ndatu, himue hohe, himue ha Moses, onkuauo ha Elias. Ndere he ke tshi shi ta popi.

³⁴ Manka a ri te tshi popi shii, po opue ja otshikogo, nde tatshi ja ningire omuzire. Jo ja tira, mbeja sho ja siikirua kotshikogo.

³⁵ Nde motshikogo tamu zi eui, tari ti: Nguka omumuandje omuorike, mu uveni.

³⁶ Eui sho tari uvika, Jesus okua ri ko oh’ike; jo ja muena, momasiku ngeja inaa popja nand’okomuntu, shi ja monene mpa.

Ondemoni tahi tidua mo momumati.

³⁷ Mesiku rjaangura, sho ja rondoroka ko kondundu, aantu ojendji oje ja tsakaneke.

³⁸ Nde tara, omurumentu ta zi mongundu, ti igida muure, ta ti: Muongi, otii ku indire: tara omunona ngu, oh’ike omumuandje.

³⁹ Ondemoni h’otahi mu kuata, h’opo tuu mpoka ta riri unene; tahi mu shata po, tahi mu shiragura, he ta zi etutu, ho itahi mu eca ue, nde tahi mu foragura esiku rimue.

⁴⁰ Ondi indirire aarongua johe, je hi tide mo, ndere oja njengua.

⁴¹ Jesus ta jamukura, ta ti: Rudi nguee karu nehiteero, ruo rua pirarara, sig’unake te kara pu ne, ndi mu tar’onteni? Eta omumuohe hu ku ngaje.

⁴² Manka te ja po, ombepo ombuineji otahi mu shata po, ho tahi mu tanene.

⁴³ Nde Jesus ta ganda ombepo ombuineji, h’ote erukica omumati, nde te mu pe she.

⁴⁴ Ajeshe oja kumua ko keenkondo eenene di da Karunga. Ndere Jesus sho a mono, nokutja oja kumua ko ku mbi ajishe a rongo, he ota ti kaarongua je; Eehapu di di diradireni naua meemutima deni. Omuna guOmuntu ota ka gandjua miikasha jaantu.

⁴⁵ Ndere kaa huvite ko nandenande ohapu ndjika, ohe jo orekerua, jo inaa hi nongera, ndere oja tira uo okumupura eendunge dohapu ndji.

Aaronga taa patacana.

⁴⁶ Jo taa shimbike okuipura: Ore ta ningi omunene e vure mukuauo?

⁴⁷ Nde Jesus sho a dimburura omadiradiro go keemuenjo dauo, ta kuca okanona, te ka cikameke ponto he, nde ta ti ku jo:

⁴⁸ Ngu ta jakura okanona ke cike pu hano medina rjandje, ongaje ta jakura. Ngu ta jakura ndje, ota jakura ngu a tuma ndje; oshoka ngu ti iningi omutshona ku amushe, ota ningi omunene gueni amushe.

⁴⁹ Nde Johannes ta shimbike, ta ti: Muongi, otua mona omuntu, ta tida mo eembepo eembuineji medina rjohe, ndere sse tue mu kerera, oshoka ine ku randura na sse.

⁵⁰ Nde Jesus ti i mo: Inamu mu kerera, oshoka ngu ke nondumbo na ne, oku ri na ne.

Aasamarita taa kerere Jesus.

⁵¹ Tsha ningi, erara rjokuha keguru rje ke ja, ri guanicue po, h’okua tara a cindike ku Jerusalem.

⁵² Ta tumu aantu, je mu tetekerere. Jo ja hi, nde taa ke ja momukunda guaasamarita, ja rongikidire ajishe jokuja kue.

⁵³ Ndere inaa mu tuumba, oshoka okua ri ta ara okuuka ku Jerusalem.

⁵⁴ Aarongua je, Johannes na Jakobus, sho je tshu uvu, oja ti: Muene, oua ara tu icane omuriro gu ze keguru, go gu ja rungunice po?

⁵⁵ He ta piramene ko, te ja ganda, ta ti: Kamu itshi nani, nokutja ne ojombepo hiini?

⁵⁶ Omuna guOmuntu ine ja okuekerashi eemuenjo, aaue, okuduupica tuu. Otsho taa hende ondjira hi iri.

⁵⁷ Manka taa hende nondjira, gumue ta ti ku he: Onda ara ndi ku randure hoo to hi.

⁵⁸ Nde Jesus ta ti: Uuandje ou nomakuena needira do meguru iihadira, ndere Omuna guOmuntu ke na’ shara, mpa te egeke omutse gue.

⁵⁹ Ku gumue a hiri ta ti: Randura ndje! Nde ngu ta ti: Muene, rareka ndje, ndi he tango ndi ka fumbike tate.

⁶⁰ He Jesus ti i mo: Eca aasi ja fumbike aasi jauo, nde ngueje inda u ku uvice otshirongo tsha Karunga.

⁶¹ Itshee gumue ta ti: Muene, otii ke ku randura ngaa, ndere pitika, ndi he tango, ndi ka rareke ajeshe jo maandjetu.

⁶² Nde Jesus ta ti: Kakuna ngu ha kuata otshipururo neke rje, nde ta tara ruanima, ta ko operera ngeno otshirongo tsha Karunga.