Lukas 8 - Etestemente Epe ✠ 1951

ONTOPORUA 8. Ejere rjomukuni.

¹ Okuza mpoka Jesus okue ende meemukunda no meemukunda no miihende jado, tu uvica evangelium rjotshirongo tsha Karunga. Mbejaka omurongo na jaari oje ri na he.

² Naakiintu jamue itshee, mba ja ri neembepo eembuineji niigombo, je erukicua nare, Maria ngaa ngu ha tiua Magdalena, mu mua tidirue eendemoni uunuaari.

³ Na Johanna, omukiintu gua Susa, ngu a ri erenga rja Herodes, na Susana nojendji ji iri, mba je mu jakura niinima jauo.

⁴ Ndere aantu sho je ja ku he ojendji, je enderera ja zi keemukunda, he te ja rongo momeere, ta ti:

⁵ Omukuni okua pitire mo a ka kune eembuto de; mokukuna dimue adi guire mondjira, tadi ratua, nd’eedira do keguru tadi di tshomona mo.

⁶ Dimue adi guire puukukutu uomamanja, tadi piti ngaa, nde tadi si, oshoka inadi mona etoci.

⁷ Dimue adi guire momano, go omano taga koko, go tage di cinaneke.

⁸ Dimue adi guire mevi euanaua, do tadi piti, tadi vara ecere. Sho te tshi popi, h’oti igida: Ngu e nomakutsi gokuuva, nu uve ko.

⁹ Nd’aarongua je taa mu pura eendunge dejere ndika.

¹⁰ He ta ti: Ne omua peua okutshiua iihorekua jotshirongo tsha Karunga, ndere mbeja taa peu’ike omeere, opo nand’oja tara, kaa huete ko, nand’otaa pupu, kaa huvite ko.

¹¹ Ejere ndioka otari ti: Eembuto odo eehapu da Karunga.

¹² Do mondjira oda mba taa di uvu, nde satana te ja, a kuce eehapu meemutima dauo, opo kaa hiteere, jo kaa hupicue.

¹³ Do puukukutu oda mba taa tuumba ohapu nenjanju, nge taa hi uvu, ndere kaa neemudi. Ano otaa hiteere ouara okacimbo, ndere perara rjemakero taa punduka.

¹⁴ Di da guire momano, oda mba ja puakena ngaa, nde taa hi, mokuha taa pondua kiimpuju, kuujamba, kuuharu uujuni, jo itaa tiriganeke iihimati nandookuri.

¹⁵ Di da guire mevi euanaua oda mba taa huvu ohapu, taa hi pungura meemutima eemuanaua kadi niiherere, nde taji imike iihimati nuudiginini.

¹⁶ Kakuna ngu ta sameke onjeka, nde te hi siikire notshijuma nenge te hi tura koshi hokariri, aaue, okombanda hongudi tuu, opo mba taa ja mo, ja mone uujerere.

¹⁷ Oshoka inapu orekua tsha, shi itatshi ko oroka, itapu kara tsha mofuci, shi itatshi ja puujerere.

¹⁸ Ano, rungameni, nokutja otamu uvu ngiini. Oshoka ngu e na, ohe ta guederua ko, ngu ke na, ohe ta kucua, shi a hitura e na.

Aakuauo ja Jesus.

¹⁹ Hina naamuahina jo je ja ku he, ndere moru ouindji uaantu oja njengua okucika pu he.

²⁰ H’ota rombuerua: Njoko naamuanjoko oje ri pondje ja ara je ku tarere po.

²¹ H’ota jamukura, ta ti ku jo: Meme naamuameme ojo mbo haa huvu, jo taa rongo uo ohapu ha Karunga.

Iikunguru mefuta.

²² Esiku rimue okua rondo puamue naarongua mosikepa, nde ta ti ku jo: Tu eni haandija hefuta. Jo ja zi po pomunkunkuro.

²³ Manka taa hende, he ta koca. Iikunguru iidigu oja tukuka mefuta, jo taa siikirua komakucikuci, taa mono uudigu.

²⁴ Jo taa hi ku he, taa mu pendura, taa ti ku he: Muongi, otatu ningine mo. H’ota cikama, ta ganda ombepo nomakucikuci, nde taga rotere, go ga muena.

²⁵ He ta ti ku jo: Ehiteero rjeni orii ri peni? Ndere oja tiririra, ja kumua ko, jo taa puracana: Ore ngu, sho ta rombuer’ike ombepo nefuta, nde ji nevuriko ku he?

Jesus mokati kaagerasani.

²⁶ Mosikepa taa hi kotshirongo tshaagerasani, shi tsha taracana na Galilea.

²⁷ Sho a hi komunkunkuro guotshirongo, omuntu te mu tsakaneke, ta zi momukunda. Okua ninga esiku a kuatua kombepo ombuineji, ke neenguuo korutu, h’ita kara megumbo, aaue, ta rumbu ouara peevugo deembira.

²⁸ Sho a mono Jesus, h’oti ishata po pu he, ti igida neui enene, ta ti: andi ku fara kuni, Jesus, Omumua Karunga gomombandambanda. Otii ku indire, ino epeka ndje.

²⁹ Oshoka Jesus okua rombuere ombepo ombuineji, ndji ha ninga esiku mu he tahi mu pangere, hi ze mo momuntu; aantu oja ri je mu manga nomarjenge, je mu rangere neemunja, nde okua tokora ouara eemango adishe, nde ta tidirua kombepo ombuineji mombuga.

³⁰ Jesus te mu pura: Onguee re? Ta ti: Legio, oshoka eembepo odindji oda ri mu he.

³¹ Do tadi mu indire, ke di rombuere di he muure uoheri.

³² Nde mpo opua ri pu notshinkoti otshinene tshiinguru ojindji, shi tsha napa kondundu; adi mu indire, a pitike ngeno okuha mu tsho. H’okue tshi di pitikira.

³³ Nde tara ko, eembepo eembuineji da zi mo momuntu, do tadi hi miinguru, nd’otshinkoti atshishe tashi hi, tsho tatshi ihumbire mefuta, tatshi sire mo.

³⁴ Aasita sho ja mono, shi tsha ningua, oja hi ondapo, taa ke epurura momukunda no miihende jago.

³⁵ Aantu taa hi ko, ja ka tare shi tsha ningua. Jo oje ja ku Jesus, taa mono uo omuntu, ngu a zi eembepo eembuineji, h’a zara onguuo, e neendunge da jera, ta kaatumba keempadi da Jesus. Ndere ja tira.

³⁶ Mba ja ri ko, ja tara ajishe, otaa hepurura nokutja okue eruka ngiini.

³⁷ Mpoka aantu mbo ojendji jo kotshirongo tshaagerasana oje mu indire a ze po pu jo, oshoka oja ri ja tiririra. He ta rondo ano mosikepa, nde ta tshuna.

³⁸ Nd’omuntu, ngu a zi eembepo eembuineji, ti indire a kare puamue na he. Ndere Jesus te mu rareke a he, ta ti:

³⁹ Inda kegumbo rjohe u okorore iinima ajishe, mbi ua ningirua ku Karunga. He ta hi nokuuvicira neui enene omukunda agushe iirongankondo, mbi Jesus e mu ningira.

Omona omukadona gua Jairus.

⁴⁰ Jesus sho a tshuna, aantu oje mu tsakaneke, ajeshe ja ri je mu tegerera.

⁴¹ Nde tara, omurumentu te ja po, edina rje Jairus, he omukuruntu guosinagoga, ti isizimike keempadi da Jesus, he te mu indire a he megumbo rje.

⁴² Oshoka omukadona, omona oh’ike, e neemuvo di cike pomurongo na mbaari, ota ara okusa. Po opua ka ninga, aantu je mu undagura.

⁴³ Opua ri omukiintu, ngu a ninga eemuvo omurongo na mbaari ta arukua etiko rjombinzi, he a mana po iimariua je ajishe mokufuta aapangi, ndere ine erukicua nand’okogumue.

⁴⁴ H’okue mu zirira konima, ta njenge ouara omutse guonguuo he, naanzijanzija etiko rjombinzi rja tsheka.

⁴⁵ Jesus h’ota pura: Ore a njenga ndje? Aantu ajeshe taa patana. Nde Petrus nojakuauo taa ti: Muongi, ongundu haantu otahi ku cinaneke, ho tahi ku undagura, nde oto pura: Ore a njenga ndje?

⁴⁶ Nde Jesus ta ti: Gumue okua njenga ndje, oshoka ondi uete, eenkondo da za mu ngaje.

⁴⁷ Omukiintu sho a mono, nokutja ita vuru okutshooreka ue, h’okue ja, ta kekama, ti ishata po keempadi da Jesus, to okororere aantu ajeshe, nokutja otshike e mu njengere nongiini a heruka nzija.

⁴⁸ Nde ta ti ku he: Mumuandje, ehiteero rjohe rje ku kuacera, inda nombiri.

⁴⁹ Manka ta popi, omuntu e ja komukuruntu guosinagoga, ta ti: Omumuohe a sa, ino vurica ue omuongi.

⁵⁰ Jesus sho tu uvu eehapu di, te mu rombuere: Ino tira, shimpa ui iteera, ota ka mona omuenjo.

⁵¹ Sho e ja megumbo, ina pitika, omuntu a he mo, Petrus na Jakobus na Johannes na she na hina ojo ike.

⁵² Nd’ajeshe taa riri, taa mu kemene. Ndere he ta ti: Inamu tira, omukadona ina sa, aaue, okua koci’ke.

⁵³ Mpoka aantu taa mu joro, oshoka oja ri je tshi, nokutja okua sirira.

⁵⁴ He te mu kuata peke, ta ti neui enene: Mukadona, penduka.

⁵⁵ Nd’omuenjo gua tshuna mo, h’ota cikama. He ta rombuere, je mu etere ikurja.

⁵⁶ Jo aakuruntu oja kumua ko unene, ndere he te ji indike okupopja shi tsha ningua po.