Lukas 7 - Etestemente Epe ✠ 1951

ONTOPORUA 7. Omupija guerenga te eruka.

¹ Sho a mana okupopja eehapu de pomakutsi gaantu mpoka, okua hi ku Kafarnaum.

² Erenga rjontumba orja ri ri nomupija ta arukua unene, ta ara okusa, h’okua ri e horikue.

³ Sho rju uvu, nokutja Jesus e ja ko, rjo otari tumu aakuruntu jaajuda ku he, je mu indire, a he okuerukica omupija guarjo.

⁴ Sho je ja ku Jesus, oje mu indiririra, taa ti ku he: Orja guana tshiri u ri kuacere.

⁵ Oshoka orje ore aantu jarjo, rj’orje tu tungira osinagoga hetu.

⁶ Jesus h’ota hi ko puamue na jo. Sho a ri ke ri kokure ue negumbo, erenga rjo otari tumu ookuume ku he, je mu rombuere: Muene, ino ihepica ouara, inandi opara u je mondunda handje.

⁷ Ondi itara, nokutja inandi opara, ndi he ku nguee, ngaje muene, popja ano ohapu himuike, h’omupija guandje ote eruka.

⁸ Na ngaje uo omuntu ouara, ngu e ri mepangero, ondi naakuiita, taa vurika ku ngaje; ng’otandi rombuere gumue: Inda, h’ota hi, ku gumue a hiri: Ira, h’ote ja, no komupija guandje: Ronga tshontumba, h’ote tshi rongo.

⁹ Jesus sho a huvu dika, okua kumua ko, nde ta pungurukire kaantu, mba je mu randura, ta ti: Tshiri, otii mu rombuere, ehiteero enene ri cike pu ndika inandi ri mona nandookuri, no mu Israel.

¹⁰ Aatumua sho je ja megumbo, oja ada omupija, ngu a ri ta arukua, a heruka.

Ku Naim omumati ta jumudua.

¹¹ Te ja ta hi komukunda, edina rjago Naim, nd’aarongua je naantu ojendji taa hi ko puamue na he.

¹² Sho a ciki potsheero tshomukunda, tara, ko okua zi omudimba gu umbatua, omona gua hina omusherekadi ohik’ike; aantu ojendji jo momukunda taa mu cindikire.

¹³ Muene sho e mu mono, okue mu siroshenda, nde ta ti ku he: Ino rira!

¹⁴ H’ote engene ko, ta njenge ontara, nd’aahumbati ja cikama. H’ota ti: Mumati, otii ku rombuere, penduka!

¹⁵ Omusi h’ota jeruka po, nde ta shimbike okupopja. Jesus h’ote mu pe hina.

¹⁶ Ndere ajeshe oja tiririra, taa tanga Karunga, taa ti: Omuprofeti omunene a horoka mokati ketu, he Karunga a tarera po aantu je.

¹⁷ Omurombo nguka ogui icanenene mu Judea atshishe no miihende ajishe.

Johannes ta tumu ku Jesus.

¹⁸ Johannes tu uvu ajishe mbi kaarongua je.

¹⁹ Ano he Johannes oti icana jaari po jo maarongua je, te ja tumu ku Jesus, je mu pure: Onguee tuu nakuja nenge natu tegerere gumue a hiri?

²⁰ Aarumentu mbo, sho je ja nduno ku Jesus, oja ti: Johannes omutshatshi okue tu tuma ku nguee, tu ku pure: Ongueje ano nakuja nenge natu tegerere gumue a hiri?

²¹ Perara ndio okua ri te erukica ojendji, mba je epekua kuuvu, kiigombo no keembepo eembuineji, naaposi ojendji okue ja pe omesho gauo.

²² Mpoka ta jamukura, ta ti ku jo: Indeni ano, mu ke epururire Johannes, shi mu uva na shi mua mona; aaposi oje uete ko, iirema otaji hende, mba je nuuvu uotshirundu, otaa jere, mba ja sit’omakutsi, oje uvite ko, aasi otaa jumuka, eehepere otadu uvicirua evangelium.

²³ Omunerago ongu iti idimbike ndje.

²⁴ Aatumua ja Johannes sho ja hi, Jesus h’oto okororere Johannes aantu, ta ti: Ne omui ire mombuga, mu ka tare tshee? Shira onenge, ndji tahi dunguaadungua kombepo?

²⁵ Nenge omui ire okumona tshike? Shira omuntu, ngu a zara eenguno eenenguni? Nde tareni, mba je neenguuo eenenguni, jo haa rumbu miituci, oje ri momagumbo gaakuaniirua.

²⁶ Nenge omui ire okumona tshike? Shira omuprofeti? Ee, andi mu rombuere: Ohe ngu e vure nomuprofeti.

²⁷ Oshoka nguka ohe ngu a tshangererua, taku ti: Tara, otii tumu omujengeli guandje komesho gohe, ngu te ku parere ondjira hohe.

²⁸ Tshiri, andi mu rombuere, mokati kaantu, mba ja varua kaakiintu, inamu za gumue e vure Johannes omutshatshi, ndere nduno, omutshuutshu guo motshirongo tsha Karunga ohe e mu vure.

²⁹ Aantu ajeshe, mba je mu uvu, otsho aafenderi, oje epurura ehuko rja Karunga, jo ji iteera okutshatshua netshatsho rja Johannes.

³⁰ Ndere aafariseji naanongo jomambo oja dini shi ja arerua ku Karunga, jo inaji iteera okutshatshua ku he.

³¹ Nde Jesus ta ti: Aantu jorudi nduka andi je ereke na tshike? Oja fa re?

³² Oja f’aanona, mba taa kaatumba potshirandero, taa kundacana, taa ti: Otue mu shikira omambendo, ndere inamu dana; tua rira eenkari, ndere inamu rira.

³³ Johannes omutshatshi okue ja, h’ina rja omboroto, h’ina nua omavinju, nde tamu ti: oku nombepo ombuineji.

³⁴ Omuna guOmuntu okue ja, he ta ri, he ta nu, ndere tamu ti: tareni omuntu ngu oha diragura, he ha korua komavinju, he okuume kaafenderi no kaarunde.

Omurunde ta simaneke Jesus.

³⁶ Gumue guo maafariseji h’ote mu indire, a ka rje na he; ano ta hi megumbo rjomufariseji, nde ta kaatumba potshiriro.

³⁷ Nde tara, omukiintu, ngu a tshiuika momukunda, anuua ohe omurunde, a huvu, nokutja Jesus okua kaatumba megumbo rjomufariseji potshiriro, te eta otshijuma tshalabastera, mu nomagadi gokuguaja.

³⁸ Te mu zirire konima, te engere keempadi de, ta riri, nde ta shimbike nokuri, ta nengeke eempandi de nomoodi, he te di ceta nomafufu gomutse gue, te di cipi neemurungu, nde te di guajeke nomagadi.

³⁹ Omufariseji, ngu e mu icana, sho e tshi mono, okui ipopire, ta ti: Ngeno a ri omuprofeti ngu, ando a tshiua, nokutja omukiintu nguka, ngu te mu njenge, oku ri ngiini, oshoka ohe omurunde.

⁴⁰ Nde Jesus ta ti ku he: Simon, ondi nohapu na nguee. He ta ti: Muene, popja!

⁴¹ Omuntu gumue okua ri naantu jaari, je niikoro je. Gumue po okua ri notshikoro tshiiponda omacere gatano, mukuauo eemurongo ntano ike.

⁴² Ano sho ja ri kaa na shi taa futu, h’ote ja dimine po ajeshe jaari. Oguni po ta kara e mu ore e vure mukuauo?

⁴³ Simon h’ota jamukura, ta ti: Ondi tshi ohe ngu, ngu a diminua po unene. Jesus ta ti: Ua pangura mondjira.

⁴⁴ Mpoka Jesus h’ota pungurukire komukiintu, nde ta ti ku Simon: Omukiintu ngu ou mu uete? Onde ja maandjohe, nd’ino pa ndje omeja geempadi dandje, ndere nguka okua nengeka eempadi nomoodi ge, he te di ceta nomafufu gomutse gue.

⁴⁵ Ngueje ino cipa ndje, ndere nguka erara arishe sho e ja mo, okua kara ta cipi keempadi dandje.

⁴⁶ Ngueje ino guajeka omutse guandje nomagadi, ndere nguka okua guajeka eempadi dandje.

⁴⁷ Ano andi ku rombuere: Eendjo odindji e di diminua po, shi e ore unene. Ndere ngu a diminua po katshona, oku ore uo katshona.

⁴⁸ Mpha h’ote mu rombuere: Eendjo dohe ue di diminua po.

⁴⁹ Mba ja ri potshiriro, taa rombueracana, taa ti: Nguno omukuatshee matsa, sho ngaa nokuri ta dimine po eendjo?

⁵⁰ Nde ta rombuere omukiintu, ta ti: Ehiteero rjohe rje ku kuaca, inda nombiri.