Lukas 5 - Etestemente Epe ✠ 1951

ONTOPORUA 5. Ejuro ejamba.

¹ Jesus sho a ri poruca ruefuta rja Genesaret, aantu jo oje engene ku he, ja puakene da Karunga.

² Komunkunkuro guefuta okua mono eesikepa mbaari; aajuri oja ri ja zi mo, jo taa kosho iijurico jauo.

³ H’ota hi mosikepa ha Simon, te mu rombuere, a hengenice tshidira momeja, nde ta kaatumba mosikepa a ronge aantu.

⁴ Sho a mana okupopja, ota rombuere Simon, ta ti: Engenica muure, mu umbira mo iijurico jeni mu kuate eeshi.

⁵ Simon he ta jamukura, ta ti: Muongi, ss’otua ronga uusiku aushe, ndere inata kuata tsha. Ndere otshijurico otii tshu umbire mo keehapu dohe.

⁶ Jo taa tshi ningi shi, nde taa kuata iipandi iinene jeeshi, otshijurico tshauo tatshi tatuka.

⁷ Jo otaa rapa jakuauo, mba ja ri mosikepa onkuauo, je je ja kuace. Jo oje ja po, nde eesikepa adishe mbaari tadu uda da ara okuningina.

⁸ Simon Petrus sho e tshi mono shika, okua ts’eengoro keempadi da Jesus, he ta ti: Muene, za po pu ngaje, oshoka ngaje omuntu omunandjo.

⁹ Oshoka okua ruriru’ike nojakuauo ja rurirua kejuro, ndi ja mono.

¹⁰ Tsh’otsho uo Jakobus na Johannes, aana ja Zebedeus mba ja ri aakuaci ja Simon. Nde Jesus ta rombuere Simon: Ino tira, kongashiingika oto ka jura aantu.

¹¹ Mpaka jo otaa shirire eesikepa dauo komutunda, jo taa cigi po ajishe, nde taa mu randura.

Omuntu notshirundu notshirema taa pangua.

¹² Tsha ningi, sho je ja momukunda guontumba, tara, mu mua ri mu nomuntu, a papata iiraro jotshirundu. Sho a mono Jesus, oti ishata pevi miipaci je, te mu indire, ta ti: Muene, nge ua ara, oto vuru okuerukica ndje.

¹³ H’ota tenteke eke rje, te mu njenge, ta ti: Onda ara, eruka. Tsh’otshirundu otshe mu cigi po nzija.

¹⁴ Nde Jesus te mu rombuere: Ino tshi popja nand’okomuntu, ndere inda, u ki imonice komupristeri, ngueje u gandje egano rjeheruko, ngashi rja romborua ku Moses, orjo ri ninge ehokororo.

¹⁵ Omurombo gue ogua popiua apeshe; aantu ojendji jo je ja po okumuuva, je erukicue kuuvu aushe.

¹⁶ Nde he okui ijageka, ta hi mombuga a ka garikane.

¹⁷ Ndere esiku rimue, sho a kaatumba ta rongo, tsha ningi, aafariseji naanongo jomambo ja kaatumba uo popepi na he, ja zi keemukunda da Galilea no da Judea no ku Jerusalem. Do eenkondo da Muene oda ri mpa, di ja pange.

¹⁸ Nde tara, aarumentu oje eta po omuntu, ta arukua uugorue, a rara kokariri. Jo ja ara okumueta mo, je mu rangeke keempadi de.

¹⁹ Ndere morua shi pu nongundu onene haantu, itaa mono ompito, je mu ete mo. Jo otsho ano taa rondo pombanda hondunda hondjugo, nde taa mu endjerereke kokariri mombururu, hu ukirira pu Jesus.

²⁰ Sho a mono ehiteero rjauo, h’ota ti: Mentu nguee, eendjo dohe ue di diminua po.

²¹ Aanongo jomambo naafariseji ja tameke okuipopira, taa ti: Ore ngu, sho ta tsheke Karunga? Ore ta vuru okudimina po eendjo, ndi tshi, oKarunga ike?

²² Nde Jesus ta dimburura omadiradiro gauo, he ta jamukura, ta ti: Otamu diradira tshike meemuenjo deni?

²³ Otshipu otshiini, okutja: Eendjo dohe oto di diminua po nenge okutja: cikama u ende?

²⁴ Ndere opo mu tshiue, nokutja Omuna guOmuntu oku neenkondo pevi ndika okudima po eendjo, h’ota rombuere nduno otshirema: Otii ku rombuere, penduka, kuca okariri kohe, ngueje u he kegumbo.

²⁵ Naanzija h’ota penduka miipaci jauo, ta kuca okariri, hu a rara, nde ta hi kegumbo rje nokuamberera Karunga.

²⁶ Ajeshe oja kumua ko unene, taa amberere Karunga, jo ji iua kuutire, nde taa ti: Nena otua mona iironga iikumici.

Levi (Mateus) ti icanua.

²⁷ Jesus pokuha ta mono omufenderi, edina rje Levi, a kaatumba petsari rjefendero, he ta ti ku he: Randura ndje!

²⁸ H’ota cikama, ta cigi po ajishe, nde te mu randura.

²⁹ He Levi ote mu rongikidire otshiriro otshinene megumbo rje, ho ongundu onene haafenderi nojendji ji iri oja ri ko, ja kaatumba na jo potshiriro.

³⁰ Mpaka aafariseji naanongo jomambo taa ngungutura jo taa pura aarongua je: Otshike nduno omuongi gueni ta rire puamue naafenderi naarunde?

³¹ Jesus ta jamukura: Ha mba ja kora, ojo ja pumbua omupangi, aaue, oombo tuu taa arukua.

³² Inandi ja ndi icane mba ju uka, aaue, aarunde tuu kehidirururo.

Okuidirika iikurja taku purua.

³³ Jo taa mu pura uo: Otshike aarongua ja Johannes taj’idirike iikurja orundji, jo taa garikana uo, tsh’otsho tuu uo aarongua jaafariseji, ndere aarongua johe taa ri, jo taa nu?

³⁴ He ta ti ku jo: Ne otamu vuru ngiini okuciminika jakuauo jomujareki ji idirike iikurja, manka omujareki e ri pu jo?

³⁵ Omasiku tage ja, omujareki te ja kucua po, opo taa ki idirike iikurja.

³⁶ Mpaka h’ota ti ku jo ejere: Kakuna ngu ta kuca otshaando konguuo ompe e tshi ture konguuo onkuru; nge te tshi ningi, ota togonjokica uo ndji ompe. Otshaando tshonguuo ompe itatsi oparere onguuo onkuru.

³⁷ Kakuna uo, ngu ta zire omavinju omape meempunda eenkuru; nge tatshi ningua, omavinju omape otaga tsipura eenkuru, nde taga tika ouara, do eempunda tadi jonana.

³⁸ Ndere omavinju omape taga tirua meempunda eempe, opo ike ajishe iijari taji kara.

³⁹ Kakuna ngu ta nu tango omavinju omakuru, nde ti indire nzija omape, oshoka oti ipopire: Go omakuru omaanaua ge vure omape.