Lukas 3 - Etestemente Epe ✠ 1951

ONTOPORUA 3. Ehuvico rja Johannes.

¹ Momuvo omutimurongo na ntano guompango homukuaniirua Tiberius Pontius Pilatus sho a ri omureri gua Judea, Herodes, gumue guomarenga gane, ta pangere mu Galilea, ndere Filippus, omumuahina erenga mu Iturea no meemukunda da Trakonitis, na Lisanius erenga mu Abilene.

² Annas na Kaifas, sho ja ri aapristeri aakuruntu, petango ndika omurombo gua Karunga go gue ja ku Johannes, omumua Zakarias, mombuga.

³ H’okue ja motshirongo atshishe pu Jordan, nde tu uvica etshatsho rjehidirururo kediminopo rjeendjo.

⁴ Ngashi kua tshangerue membo rjehuvico rjomuprofeti Isaias, ta ti: Eui rjomuigidi mombuga: Pareni ondjira ha Muene, ukiririceni omapora ge.

⁵ Keshe esiru nari firue po, neendundu niihanda naji kumunue po: shi tshi negori, natshu uke, shi inatshe erakana, natshi ninge ondjira he erakana.

⁶ Ho onjama ahishe tahi ka tara ehupico rja Karunga.

⁷ H’ota rombuere eengundu daantu, mba je ja ku he, ja ka tshatshue: Jana jomafu ne, ore e mu ronga okuijageka ondjashi, ndji tahi ke ja?

⁸ Eteni iihimati jo oparera ehidirururo. Inamu tja: Otu na Abraham otate, oshoka ngaje otii mu rombuere: Karunga ota vuru okupendurira Abraham ojana momamanja ngaka.

⁹ Ekuua orja turua nare keemudi deemuti. Omuti keshe, ngu itagu tiriganeke iihimati iitoue, otagu keua po, nde tagu umbirua momuriro.

¹⁰ Mpaka aantu jo otaa mu pura: Natu ninge ngiini nduno?

¹¹ H’ota jamukura ta ti ku jo: Ngu e neenguuo mbaari, na pe himue ngu ke na, na ngu e neendia, na ninge ngaatshikuauo.

¹² Naafenderi oje ja ji itshatshice uo, nde taa mu pura, taa ti: Muongi, na sse natu ninge ngiini?

¹³ H’ota ti ku jo: Inamu pura tsha pitirira shi mua turirua po nare.

¹⁴ Otsho ngaa ngii itshee aakuiita je mu pura. Sse natu ninge ngiini? H’ote ja rombuere: Inamu jeka, n’inamu ninga otshineji komuntu. Pandeni ondjambi heni.

¹⁵ Aantu okua je tshi, jo taa diradira uo meemutima dauo, nokutja ohe’rera shira Kristus muene.

¹⁶ Johannes ta jamukura ajeshe, ta ti: Ngaje otandi mu tshatsha ngaa nomeja, ndere taku zi gumue, ngu e vure ndje inandi ereka okuditura nando eemuja deengaku de; ngu te ke mu tshatsha nOmbepo Ondjapuki nomuriro.

¹⁷ E noruati meke rje, a kombe otshipare tshe; iirja ote ji pungura momashisha ge, nde etutu te ri fike po nomuriro kagu dima.

¹⁸ Ojindji ja fa mbi ojo a ronga aantu nokujuuvicira uo omurombo guenjanju.

¹⁹ Ndere Herodes, omureri guotshirongo otshitine, sho a pukururua ku he moru Herodias, omukiintu gua mumuahina no moru uumbudi aushe, mbu Herodes a ninga.

²⁰ H’okua guedera ko itshee mbuka: he te edirire Johannes modorongo.

²¹ Aantu sho je ja ji itshatshice, tsha ka ninga, na Jesus uo ta tshatshua. Manka ta garikana, eguru rjo orji ihegurura nokuri.

²² Nd’Ombepo Ondjapuki tahi mu tenene morupe ruorutu, ha f’onguti. Meguru mo omuo oroka eui, tari ti: Nguka omumuandje omuorike, ondi nohokue mu he.

²³ Pokarara oko hoka Jesus, sho a shimbike okuronga, h’okua ri e neemuvo da ada pu eemurongo ndatu, nde ta tiua omumua Josef, ngu a ri omumua Heli, he nguka omumua Matat.

²⁴ He nguka omumua Levi, he nguka omumua Meliki, he nguka omumua Janne, he nguka omumua Josef.

²⁵ He nguka omumua Matatias, he nguka omumua Amos, he nguka omumua Nahum, he nguka omumua Hesli, he nguka omumua Nage.

²⁶ He nguka omumua Mahat, he nguka omumua Matatias, he nguka omumua Semei, he nguka omumua Josef, he nguka omumua Juda.

²⁷ He nguka omumua Joana, he nguka omumua Resa, he nguka omumua Zorobabel, he nguka omumua Salatiel, he nguka omumua Neri.

²⁸ He nguka omumua Melki, he nguka omumua Adi, he nguka omumua Kosan, he nguka omumua Elmadan, he nguka omumua Her.

²⁹ He nguka omumua Jesus, he nguka omumua Elieser, he nguka omumua Jorim, he nguka omumua Matat, he nguka omumua Levi.

³⁰ He nguka omumua Simon, he nguka omumua Juda, he nguka omumua Josef, he nguka omumua Jona, he nguka omumua Eliakim.

³¹ He nguka omumua Melea, he nguka omumua Matata, he nguka omumua Menas, he nguka omumua Natan, he nguka omumua David.

³² He nguka omumua Jesse, he nguka omumua Obed, he nguka omumua Boz, he nguka omumua Salmon, he nguka omumua Nason.

³³ He nguka omumua Aminadab, he nguka omumua Aram, he nguka omumua Esdron, he nguka omumua Fares, he nguka omumua Judas.

³⁴ He nguka omumua Jacob, he nguka omumua Isaak, he nguka omumua Abraham, he nguka omumua Tare, he nguka omumua Nahor.

³⁵ He nguka omumua Sarug, he nguka omumua Ragua, he nguka omumua Faleg, he nguka omumua Heber, he nguka omumua Sale.

³⁶ He nguka omumua Kainan, he nguka omumua Arfasat, he nguka omumua Sem, he nguka omumua Noe, he nguka omumua Lamek.

³⁷ He nguka omumua Matusalem, he nguka omumua Henok, he nguka omumua Jared, he nguka omumua Malael he nguka omumua Kainan,

³⁸ He nguka omumua Henos, he nguka omumua Set, he nguka omumua Adam, he nguka a za ku Karunga.