Lukas 24 - Etestemente Epe ✠ 1951

ONTOPORUA 24. Ejumuko rja Jesus.

¹ Esiku rjotango rjotshiuike peruua tari tende, jo oje ja kombira. Je eterera iizimba iinikanua, mbi ja vundakanica.

² Taa hada emanja rja kandurua po nare pombira.

³ Jo taa hi mo, ndere ka uete mo ue omudimba gua Muene Jesus.

⁴ Manka ja jemata natango meemuenjo dauo, aarumentu jaari taa cikama mpo, ja zara eenguuo eentokere da jera unene.

⁵ Jo ji iua kuumbanda, taji isizimike iipara jauo pevi, nde mbeja taa ti ku jo: Otshike tamu kongo munamuenjo mokati kaasi?

⁶ Ke mo ue muka, okua jumuka. Dimburukueni eehapu di e mu rombuerere, manka a ri mu Galilea, sho a tire:

⁷ Omuna gu Omuntu e nokugandjua miikasha jaarunde ta ka arerua, nde ta ka jumuka pua pita omasiku gatatu.

⁸ Jo oja dimburukua eehapu de.

⁹ Taa zi ko kombira, nde taa hepururire ajishe mbeja omurongo na gumue nojakuauo ajeshe.

¹⁰ Mba je tshe epurura oombo: Maria Magadalena na Johanna na Maria, hina ha Jakobus na jamue itshee ojakua uo.

¹¹ Ndere ehepururo rjauo orje ja ha rja f’ongano, ja inaa hiteera.

¹² Petrus ta cikama nduno, ta hi kombira a matuka sho a hondamene mo, okua mono mo omarapi omatokere, hi ta tshuna itshee a kumua ko ku mbi ja ningua.

¹³ Mesiku orjo ndioka jaari ja mbeja oja hire kokakunda, edina rjako Emmaus, okuza ku Jerusalem pu notshi nano otshishupi.

¹⁴ Mondjira je ende, taa rombueracana ajishe, mbi ja ningua.

¹⁵ Ano manka ngaa taa hepururiracana, jo taa pura cana otshingii, Jesus muene h’okue ja po, nde te ende na ja.

¹⁶ Omesho gauo oga ri ga fa ga siikirua, kaa mu dimbua rure.

¹⁷ Te ja pura: Eehapu dono oda tshee, do tamu rombueracana, ndere otshike itshee mua nik’uupongo?

¹⁸ Gumue po, edina rje Kleofas, ti i mo ta ti: Ongue j’ike omuendanandjira mu Jerusalem, ngu ku tshi shi tsha ningua momasiku ngano?

¹⁹ Te ja pura: Otshee tsha ningua mo? Jo taa jamu kura: Iinima mbi ja Jesus omunazareta, ngu a ri omuprofe ti, e neenkondo miironga no meehapu motshipara tsha Ka runga naantu ajeshe

²⁰ Ndere aapristeri aakuruntu nojene jetu oje mu ga ndjica a tokorue a se, nde taa mu arera komutshigakano.

²¹ Sse otua ri tui itura, ohe ta kurira aaisrael. Nde nena esiku etitatu okuza kuuna ndo ja ningua mbi.

²² Naakiintu jamue itshee jandjetu, mba ja ri kombira eruua inari tenda, oje tu rurira.

²³ Sho inaa hada mo omudimba gue, oje ja, taa ti: Ojo orokerua po no kaajengeli, mba taa ti: oku nomuenjo.

²⁴ Jamue jaandjetu taa hi itshee kombira, taa hada ko ngaa nga’tshikuauo, ngashi aakiintu kua je epurura. Nde he muene inaa mu mona mo.

²⁵ H’oti i mo, ta ti: Maraji ne, omua taca tshi cike peni meemutima deni okuiteera ajishe, mbi ja romborua k’aaprofeti?

²⁶ Kristus ka fere okuepekerua ajishe mbika, h’a he nduno nokuri mehadimo rje?

²⁷ Mpa h’ota shimbike okujuurukira nokujuucira naua mbi ja tshangerua momambo ageshe Kristus ku Moses no kaaprofeti ajeshe.

²⁸ Mokuja popepi na Emmaus, hu ja adika taa hi, Jesus h’oti iningi a fa ngeno a pitirire po.

²⁹ Jo taa mu ishirire unene, nde taa ti: Kara na sse, oshoka uusiku oue ja, etango rjo rja toka. Mpa h’ota hi na jo megumbo.

³⁰ Sho a kaatumba na jo puurarero, okua kuca omboroto, te hi jambeke, te hi pambura, nde te hi ja pe.

³¹ Ngashiingika nduno omesho gauo ga pashuka, jo taa mu dimburura. Nde nzijanzija h’okua zija mo momesho gauo.

³² Jo taa rombueracana, taa ti: Eemutima detu kada ri da ririma, sho a ri ta popi na sse mondjira, he te tu fatururire eehapu?

³³ Merar’orjo ndioka itshee jo taa cikama, nde taa tshuna ku Jerusalem. Taa hada ko omurongo na gumue najeshe, mba je ri na jo.

³⁴ Taa ti: Muene okua jumuka tshiritshiri, h’a monikua ku Simon.

³⁵ Mpa jo taa je epururire uo shi tsha ningua mondjira na shi je ke mu dimburura pokutopora omboroto.

³⁶ Manka ta popi dika, he muene Jesus okua cikama mokati kauo, nde ta ti ku jo: Ombiri nahi kare na ne! Ongaje, inamu tira!

³⁷ Jo oja arukirira, ja ri je tshi, otshiruru tsha monika.

³⁸ Nde Jesus h’otsho ta ti: Otshike ngaa mua mbandara, notshike meemuenjo deni tamu tuumb’omadiradiro ga tja ngaaka?

³⁹ Tareni omake neempadi dandje; ongaj’erera muene. Njaangidii ndj’itare, ne mu imonene po, oshoka ombepo kahi no njama nomasipa, ngashi ne mu uete ndi ga na.

⁴⁰ Sho e tshi popi shino, h’ote ju urukire omake ge neempadi de.

⁴¹ Mpak’itshee inaj’ara okuiteera moru enjanju, jo ja kumua ko unene. Nde ta ti: Pii ndj’okurja!

⁴² Jo taa mu etere po okapambu koshi h’ocua nokashiira keenjutshi.

⁴³ H’ota ri miipaci jauo, nde shi tsh’upu po, te tshi ja pe.

⁴⁴ Ta ti ku jo: Odo eehapu nde mu rombuerere do, sho nda ri mokati keni, opo ajishe ji guanicue po, mbi ja tshangererua ndje ngaje mompango ha Moses no momambo g’aaprofeti no meepsalmi.

⁴⁵ Te ju ucire eendunge, opo ju uvikike ko shi tsha tshangua momambo.

⁴⁶ H’ota ti ku jo: Opua tshangua, nokutja Kristus okua fere a hepekue, h’a jumuke kuusi pua pita omasiku gatatu.

⁴⁷ Omazimo ageshe opo gu uvicirue ehidirururo nedirururo nediminopo rjeendjo medina rjandje, nokushimbika mu Jerusalem.

⁴⁸ One aahepururi ja mbika ajishe.

⁴⁹ Otii mu tumine shi mua rombuererue ku Tate. Kareni momukunda sigo otamu ki iguana po neenkondo adi zi mombanda.

Jesus ta rondo keguru.

⁵⁰ H’ote ja fara ku Betania, ta jeruc’omake ge, nde te ja jambeke.

⁵¹ Nde tara, manka e ri te ja jambeke, h’oku unduka po pu jo, nde ta rondo ta hi meguru.

⁵² Jo otaa mu injongamenene po, nde taa tshuna ku Jerusalem, je nenjanju enene.

⁵³ Taa huhara montempeli nokuamberera Karunga. Amen.