Lukas 23 - Etestemente Epe ✠ 1951

ONTOPORUA 23. Jesus ta pangurua.

¹ Otshingongi atshishe tsho otatshi cikama; he ta farua ku Pilatus.

² Mpaa taa shimbike itshee okumupopa, taa ti: Nguk’otue mu mona ta pijaganeke aantu jetu ngu, oti indike okufenderera omukuaniirua, sho ta ti, nokutja ohe Kristus omukuaniirua.

³ Pilatus te mu pura ano, ta ti: Ngueje omukuaniirua guaajuda? He ti i mo, ta ti: Ongashi to ti.

⁴ Pilatus ta rombuere aapristeri aakuruntu naantu: Kandi uete ondjo mu he.

⁵ Jo taa geje, taa ti: Ota pijaganeke aantu nokuronga mu Judea atshishe okuza ku Galilea sigo oohu.

⁶ Sho a huvu ohapu Galilea, te mu pura: Ngueje omugalileji?

⁷ Sho a huvu nduno, Jesus okua zi kotshirongo tsha Herodes, te mu unzire ku Herodes, ngu a ri ku Jerusalem momasiku nga.

⁸ Herodes sho a mono Jesus, okua kara a panderera. Okua arere nare e mu mone, oshoka okua adikua a huva ojindji ja Jesus, a hitur’ike itshee Jesus ta ningi otshirongankondo momesho ge.

⁹ Ndere pojindjijindji mbi ta purua ku Herodes, ita jamukura mo nand’ohapu himue.

¹⁰ Aapristeri aakuruntu naanongo jomambo taa cikama mpo, jo taa hi ngaa taa popo.

¹¹ Hotsho ano Herodes uo a shimbike okumudina, he naantu je, h’ote mu zarekica onguuo ontokere, he ta tshekua nduno, nde te mu undura po a tshune ku Pilatus.

¹² Uuna ndoka Herodes na Pilatus ja pacana uukuume; nare oja ri je nacanene ondumbo.

¹³ Pilatus ti icana aapristeri aakuruntu naarangeri n’aantu, nde ta ti ku jo:

¹⁴ Omuntu nguka mue mu eta ku ngaje ong’omupijaganeki guaantu, nde tara, onde mu kundana momeshe geni, nd’ine mona mo nand’ondjo mu he ha mbi ajishe mue mu popere.

¹⁵ Na Herodes itshee ina mona mo tsha mu he; onde mu tuma ku he, nde tara, h’ina ninga tsha shi ngeno tsha guana okumudipagica.

¹⁶ Onda ara ano ndi mu dengice, nga’ndi mu mangurure mo.

¹⁷ H’okua ri e nokumangurura mo gumue potshituci.

¹⁸ Nd’ongundu ahishe tahi igida ong’eui rimuike, tahi ti: Nguka na ze po, Barabas ohe u tu mangururire mo.

¹⁹ Nguka a ri a hedirirua meemango moru epijaganeko e ri tameka motshirongo no moru edipago.

²⁰ Pilatus h’otsho ta popi itshee na jo, oshoka okua ri ngeno a hara a mangurure mo Jesus.

²¹ Jo taa higida itshee unene, taa ti: Mu arera, mu arera komutshigakano!

²² Porutitatu ta hi mo, ta ti: Okua ninga tshike otshineji? Ngaje kandi uete mo otshikoro tshokusa mu he, ano andi mu dengic’ike, ngaje ndi mu mangurure mo.

²³ Ndere taa mu ciminike nokujogerera nokuigida pombanda, a harerue komutshigakano. Ehigido rjauo rja ning’enene ri vure po.

²⁴ Naangashiingika Pilatus ta tokora, tshi ningue keharo rjauo.

²⁵ H’ote ja pe mo nguija, ngu a ri a hedirirua mo moru edipago nepijaganeko, ngo ngu ji indire, nde ta gandja Jesus ngashi ja ara.

Jesus ta arerua komutshigakano.

²⁶ Sho je mu fara ko, oja kuata gumue, Simon omukereni, ngu kua ta zi mepja, taa mu tsike omutshigakano, e gu umbate a randura Jesus.

²⁷ Ongundu onene haantu naakiintu taa randura ko, taa mu ririre, jo taa mu kemene.

²⁸ Jesus h’ota pungurukire ku jo, ta ti: Jakiintu jo mu Jerusalem, inamu ririra ndje, aaue, iririreni n’ojene naanona jeni.

²⁹ Oshoka esiku onari ja, omuntu mu ne j’a tje: aanerago aakiintu mba kaa vara, nomara nga inaga vara, nomagundji nga inaga jamica.

³⁰ Omuntu he ta shimbike okuigida keendundu, ta ti: Ihumbireni mu sse, no kiingandundu: Tu siikireni!

³¹ Oshoka omuti omutarara nge tagu ningua ngaaka, omukukutu ando ngiini?

³² Aarumentu jaari ji iri, aakorokoshi oja farua ko puamue na he, ja ka dipague uo.

³³ Sho ja ciki keshara, ndi tari tiua eshara rjeenkue deemutse, oje mu arera komutshigakano, naakorokoshi mbejaka, gumue korurjo, mukuauo kokumosho.

³⁴ He Jesus ta ti: Tate, ja dimina po, oshoka kaa tshi shi taa ningi. Jo taa hitoporere eenguuo de nokuduumbira iihogororico.

³⁵ Aantu taa cikama mpo nokutara ko. Aakuruntu taa mu njana, taa ti: Okua kuacere jakuauo, nena ni ikuacere muene, he ng’oKristus, omuogororua gua Karunga.

³⁶ Naakuiita otsho taa mu tsheke, mba je engene ko je mu pe omeja omaruru.

³⁷ Jo taa ti: Nguej’ano, ng’omukuaniirua guajuda ikuaca muene!

³⁸ Pombanda he opua turua otshireji, tsha tshangua motshigereki no moshilatina no motshihebereji: Nguka omukuaniirua guaajuda.

³⁹ Gumue po paakorokoshi, mba ja arerua komutshigakano na he, te mu tsheke, ta ti: Nguee ng’oKristus, ikuaca muene, ngueje u tu kuace uo.

⁴⁰ Nde mukuauo ta jamukura, te mu ganda, he ta ti: Ku tira nani Karunga, nand’ongueje u ri megeero rja faacana?

⁴¹ Sse otatu epekerua tshu uka, shi tui irongera miironga jetu, ndere nguk’ina ninga tsha otshineji.

⁴² H’ota ti ku Jesus: Muene, ou dimburukua ndje, nge to ka ha muukuaniirua uohe!

⁴³ Jesus te mu jamukura: Tshiri, andi ku rombuere onena tuu ndjika nokuri to ka kara na ngaje moparadisa.

⁴⁴ Pouiri ontikanekamue eemurema da siikire uujun aushe sigo okouiri ontimugoji.

⁴⁵ Etango rjo otari ruuda, nd’omutshigo guontempel tagu tatuka pokati.

⁴⁶ Jesus h’oti igida neui enene: Tate, omuenjo guandje otandi gu ecere meenjara dohe. Mokupopja eehapu di nokua si.

⁴⁷ Erenga rjaakuiita shi rja mono shi tsha ningua orja amberere Karunga, rja ti: Otshotshiri guanene, omuntu nguka okua ri omujapuki.

⁴⁸ Nd’aantu ajeshe, mba je ja po okutara, sho ja mo no shi tsha ningua ko, oji idenge ponturo, nde taa tshuna momukunda.

⁴⁹ Jakuauo ja cikama ngaa ngahuija, nde itshee naa kiintu, mba je mu randura, ja zi ku Galilea, oje tshi mono shi.

Jesus ta fumbikua.

⁵⁰ Nde tara, omuntu gumue, edina rje Josef, erenga rjotshingongi, h’omuntu omuanaua a huka.

⁵¹ Ngu ka ri a hiteera epanguro nekundacano rjotsira, a zi ku Aritmatea, omukunda mu Judea, onakutegerera otshirongo tsha Karunga.

⁵² Ohe ngu a hi ku Pilatus, nde ti indire omudimba gua Jesus.

⁵³ Te gu kuca ko, he te gu dingire merapi etokere, nde te gu fumbike mombira h’okiua memanja, mu inamu turua natango omudimba.

⁵⁴ Uuna ruesiku rjerangero, rjo esiku rjesabata rja cika.

⁵⁵ Aakiintu, mba je ja na he ja za ku Galilea, oja radura ko ja tare ombira nomudimba sho tagu rangekua mo.

⁵⁶ Jo taa ka tshuna momukunda, nde taa rongikida iizimba iitoue nomagadi gokuguaja, jo ja vururukue mesiku rjesabata kompango.