Lukas 22 - Etestemente Epe ✠ 1951

ONTOPORUA 22. Uurarero ua Paska.

¹ Otshituci tsheemboroto eentoue, shi tashi tiua uo Opaska, otsha ri popepi.

² Aapristeri aakuruntu naanongo jomambo taa kundacana, nokutja otaa dipaga Jesus ngiini, ndere oja ri ja tira aantu.

³ Ndere satana ta hi mu Judas, ngu ha tiua uo Iskariot, h’okua ri gumue guo mbeja omurongo na jaari.

⁴ He ota hi a ka kundacane naapristeri aakuruntu nookapitija, shi te mu gandja ngiini miikasha jauo.

⁵ Jo ja panda, taa huvacana je mu pe iimariua.

⁶ H’oti iteere, nde ta kongo ompito hokumugandja kapun’evundakano maantu.

⁷ Esiku rjeemboroto eentoue orje ja, mu hamu dipagua onzigona ha Paska.

⁸ He ta tumu Petrus na Johannes, ta ti: Indeni mu ke tu rongikidire onzigona ha Paska, tu hi rje.

⁹ Jo taa mu pura: Oua ara tu ke hi rongikidire peni?

¹⁰ He te ja jamukura, ta ti: Tareni, nge tamu hi momukunda, otamu ka tsakanekua komuntu, a humbata ombiga homeja. Ohe mu ka randure ngu megumbo, mu ta hi.

¹¹ Ne tamu rombuere muene guegumbo: Omuongi e tu undura, ta ti: Ondunda hokurira, mu tandi rire onzigona ha Paska naarongua jandje, ohi ri peni?

¹² Te ke mu urukira ondunda onene hokurira, ha rongerua naua. Omu mu ke hi tu rongikidira mo.

¹³ Jo ja pita, nde taa mono ajishe ngashi e ja rombuere. Jo taa rongikida nduno onzigona ha Paska.

¹⁴ Erara sho rje ke ja, h’ota kaatumba, na mbeja omurongo na jaari na he.

¹⁵ H’ote ja rombuere, ta ti: Onda jeerukirirua okurja onzigona ndjika ha Paska na ne, mank’inande epekua.

¹⁶ Oshoka andi mu rombuere: Okuza konena itandi hi ri ue sigo otsh’ada eguanico rjo muukuaniirua ua Karunga.

¹⁷ H’ota kuca ano ehoro, ta pandura, ta ti: Tuumbeni, ri itoporereni.

¹⁸ Oshoka andi ti: Itandi ka nua ue iihimati jomavinju, manka otshirongo tsha Karunga inatshi cika.

¹⁹ Ta kuca uo omboroto, ta amberere, te hi pambura, he te hi ja pe, ta ti: Shika orutu ruandje, ndu taru mu gandjerua.

²⁰ He otsho tuu a kuca itshee ehoro konima hokurja, ta ti: Shika ehoro rjeguaneno epe mombinzi handje, ndji tahi mu tikire.

²¹ Ndere guanene tara, eke rjomuorori guandje ori ri na ngaje kotshiriro.

²² Omuna guOmuntu ota hi ngaaka ngashi kua tiua, ndere ojeeje komuntu ngo, ngu te mu orora.

²³ Jo oja tameke okupuracana, ore nduno po mu jo, ngu te ke tshi ninga.

²⁴ Pua tsuua eembata mokati kauo, nokutja ore mokati kauo ta moniua ando e vure mukuauo.

²⁵ He ta ti ku jo: Aakuaniirua jaapagani ohaa ja rere, nde mba taa ja pangere, ohaa hicanua tate.

²⁶ Ha sho mokati keni. Mokati keni ngu a hara a ninge omukuruntu ku mukuauo, ni ininge omutshona ku mukuauo; na ngu a ninga guotango, ni ininge omupija.

²⁷ Ore nduno e vure mukuauo: Ohe ngu ta kaatumba kotshiriro nenge ohe ngu ta jakura ko? Ondi tshi, ngu ta kaatumba kotshiriro. Ndere ngaje ondi ri mokati keni nda f’omukareri.

²⁸ One mbo, mba mui ididimikira puamue na ngaje momamakero gandje.

²⁹ Ano andi ke mu rongera uukuaniirua ngashi Tate e u rongera ndje.

³⁰ Mu rje, ne mu nue kotshiriro tshandje motshirongo tshandje, ne uo mu kaatumbe miipundi jepangero okupangura omazimo omurongo na gaari ga Israel.

³¹ Muene ta tsikire ko, ta ti: Simon, Simon, tara, satana a harere ngeno e mu cice a f’omuntu ta cic’iirja.

³² Ndere ngaje onde ku garikanena, ehiteero rjohe karje egeje, nguee ng’oui idirurura, koreka jakueni.

³³ Nde nguka ta ti ku he: Muene, ngaje onda guana okuha puamue na nguee meemango no mokusa.

³⁴ Nde he ta ti: Otii ku rombuere, Petrus, nena tuu ndjika, manka ekondomboro inari iga, oui idimbika ndje rutatu, anuua ku tshi ndje.

³⁵ Sho nde mu tumine, mu he kamu nompunda nondjepera neengaku, omua ri mue epa?

³⁶ Jo taa ti: Aaue. Nde he ta ti: Ndere nena, ngu ke nompunda, na he ete po, tsh’otsho tuu nondjepera, ngu ke hi na nande, na randice po eruakani rje ri he momuere.

³⁷ Oshoka andi mu rombuere: Naanena otatshi guanicirua ndje, shi tsha tshangua: Okua jarurirua maakorokoshi. Oshoka ajishe mbi ja tshangerua ndje, otaji guanicua.

³⁸ Jo taa ti: Muene, tara ko, mpak’opu na eemuere mbaari. Nde he ta ti: Opuuo.

³⁹ H’ota hi pondje, nde ta hi ngashi i igirire, kondundu heemono; aarongua je mu randura.

Judas to orora Jesus.

⁴⁰ So a ciki ko, okue ja rombuere: Garikaneni, kamu guire momamakero.

⁴¹ H’ote engene komesho puure ngashi tau umbua ekuma, ta ts’eengoro, nde ta garikana, ta ti:

⁴² Tate, ng’oua ara, kuca ko ngaje ehoro ndika, ndere kari sh’eharo rjandje, aaue, orjohe nari ningue.

⁴³ Ndere omujengeli e mu orokera a zi keguru, he te mu koreke. Nd’uumbanda uokusa ue mu uangukira, okua ta garikana.

⁴⁴ Epupju rje orja ri rja f’ombinzi ahi ndondere poshi.

⁴⁵ Sho a dimbuka okugarikana, okue ja kaapostoli, nde te ja ada ja koca kuupongo.

⁴⁶ Ta ti ku jo: Omua koca nani? Pendukeni, ne tamu garikana, kamu guire momamakero.

⁴⁷ Mank’e ri ta popi di, tara, ongundu tahi engene ko, gumue gua mbeja omurongo na jaari, Judas, e ja tetekerera. Te ja popepi na Jesus e mu cipe eemurungu.

⁴⁸ Nde Jesus ta ti ku he: Judas, nokucipa eemurungu oto orora Omuna guOmuntu?

⁴⁹ Mba ja ri na he, sho ja mono shi tatshi ka ningua, oja ti ku he: Muene, inatu denga mo omuere mu jo?

⁵⁰ Gumue guo mu jo ta denge omupija guomupristeri omukuruntu, nde te mu kepura okutsi kokurjo.

⁵¹ Jesus ta jamukura, ta ti: Eca, opuuo! H’ota njenge okutsi kue, nde te mu erukica.

⁵² Ndere ku mbono, mba je ja okumukondjica, kaapristeri aakuruntu, kaarangeri jontempeli nokaakuruntukuruntu Jesus ta ti: Omue ja mua fa mue endere omudipagi guekoto, mua tj’eemuere needimbo.

⁵³ Uunarushe onda ri pu ne montempeli, nde inamu jerucira ndje omake, mu kuate ndje, ndere ndika erara rjeni neenkondo deemurema.

⁵⁴ Jo oje mu kuata, nde taa mu fara kegumbo rjomupristeri omukuruntu. Petrus te mu randura ko, e ri ngaa ngahuija.

Petrus ti idimbike Jesus.

⁵⁵ Sho ja teme omuriro mokati kotshoto, te taa kaatumba je gu dingirira, na Petrus a kaatumba mokati kauo.

⁵⁶ Omupija omukadona te mu monene keje rjomuriro, te mu taratara, nde ta ti: Na nguka uo okua ri na he.

⁵⁷ Nde te mu idimbike, ta ti: Mukadona, ngaje kandi mu tshi.

⁵⁸ Konima herara rimue gumue a hiri te mu mono, ta ti: Na nguee gumue gua mbono. Petrus ta ti: Menguee, ha ngaje!

⁵⁹ Otundi himue ha piti, itshee gumue ta ti: Tshiri, na nguka okua ri pu he, oshoka omugalileji uo.

⁶⁰ Petrus ta ti: Mentu nguee, kandi tshi shi to popi. Naanzija, manka e ri po ta popi, ekondomboro rjo otari igi.

⁶¹ Naangashingika Muene ota pungurukire ku Petrus, nde te mu tara. Petrus h’okua dimburukua eehapu da Muene, sho a tire: Ekondomboro mank’inari iga, ngueje oto idimbike ndje rutatu.

⁶² Petrus h’ota zi mo nokuri a huka kondje, a riririre.

⁶³ Nd’aarumentu mba taa kuata Jesus, otaa mu tsheke, jo taa mu denge.

⁶⁴ Taa mu siikire otshipara, taa mu denge, nde taa pura: Tu ucira, ore e ku denge?

⁶⁵ Nomatsheko gi iri taa ga cindi mu he.

⁶⁶ Ongura, sho kua tshi, aakuruntu jotshirongo naapristeri aakuruntu naanongo jomambo taa gongara itshee, jo taa mu fara motshingongi tshauo, nde taa ti: Nguee ng’oKristus, tu rombuera ano!

⁶⁷ He ta ti ku jo: Nge andi tshi mu rombuere, itamu iteere ndje.

⁶⁸ Ndere ngaje nge tandi mu pura, itamu jamukura ndje, n’itamu mangurura ndje uo.

⁶⁹ Ndere kongashiingika otamu ka mona Omuna guOmuntu ta kaatumba korurjo rua Karunga.

⁷⁰ Ajeshe taa ti: Nani ongueje Omumua Karunga? He ta ti: Eno, ongaje!

⁷¹ Jo taa ti: Otua pumbua itshee ihokorora jimue ji iri po? Sse otue tshi ihuvire ojene mokana kue.