Lukas 21 - Etestemente Epe ✠ 1951

ONTOPORUA 21. Jesus a shunganeke iishuna neshanaguro.

¹ Sho a rigamene, okua mono aajamba a humbire omagano mokakeca komagano.

² Nde ta mono uo omusherekadi omucigona, tu umbire mo omapeni gaari.

³ He ta ti: Tshiri, andi, mu rombuere: Omusherekadi nguno omucigona okua tura mo e vure ajeshe.

⁴ Oshoka ajeshe oju umbira mo omagano ga Karunga, ja kuca momariko gauo, ndere nguno oku umbira mo a tugura muucigona ue kiiparuca je.

⁵ Jamue taa hamberere ontempeli, anuua oha tungua nomamanja go opara, ho ha zarekua nomagano guurenga; nde he ta ti:

⁶ Ajishe mbi mu uete mpo . . . Omasiku tage ke ja, nd’itapu cigua nande emanja ri ri komband’ekuauo inari kumunua po.

⁷ Jo taa mu pura, taa ti: Muongi, mbika ajishe onaji ningua unake? Notshidimburukico otshiini, nge taji shimbike okuningua?

⁸ He ta ti: Kotokeni ike, kamu pukicue. Oshoka ojendji otaa ke ja medina rjandje, nde taa ti: Ongaje ngu, esiku orje ja, inamu ji iteera.

⁹ Nge tamu uvu eemurombo diita no domavundakano, inamu tira, oshoka ajishe mbika iitetekerapo, ndere eshuriro inari cika manka.

¹⁰ He te ja rombuere: Orudi otaru cikama ru kondjice orukuauo, niirongo otsho tuu.

¹¹ Omakekamo gevi otage ja meemukunda neemukunda eemukici nondjara niishuna mbi haji tirica, taji zi keguru, nomadidiriko omanene.

¹² Ndere unene otaa ke mu kuata ne, taa ke mu tidagura, jo taa ke mu fara meesinagoga no meemango no miipaci jaakuaniirua no jomarenga moru edina rjandje.

¹³ Ajishe taji ka ningua mu okorore.

¹⁴ Diradireni ano meemuenjo deni shi: inamu ipura tango shi tamu ka jamukura.

¹⁵ Oshoka ngaje otii mu pe ohapu mokana nuunongo, nd’aatondi jeni taa ka njengua okuujamukura nokuupandakana.

¹⁶ Ne otamu ka gandjua kaakuruntu no kaamuanjoko no kaakueni no kookuume keni, jamue jo mu ne taa ka dipagua mo ku jo.

¹⁷ Nd’ajeshe taa ke mu tonder’edina rjandje.

¹⁸ Ndere itaku ka kana nand’efufu rimue rjokeemutse deni.

¹⁹ Mediginino rjeni otamu ku upicira mo eemuenjo deni.

²⁰ Nde nge tamu mono Jerusalem tsha rangekua apeshe keengundu daakuiita, tshiueni nokutja eshanaguro rjatsho orja cika.

²¹ He na he ondapo keendundu, ngu e ri mu Judea; ngu e ri momukunda, na ze mo; ngu e ri mokati romotshirongo, ina ha mo.

²² Oshoka omasiku ngano ogondjashi, opo ajishe ji guanicue po, mbi ja tshangua.

²³ Ojeeje kaasimba no kaamuaari momasiku ngo! Onapu kara uudigu uunene motshirongo nepanguro rjondjashi maantu ajeshe.

²⁴ Jo taa ka sa kondungu homuere, taa ka farua muupika kiirongo ajishe, Jerusalem tatshi ka ratagurua kaapagani sigo omasiku gaapagani ga tsakana.

²⁵ Onapu monika omadidiriko ketango, komuedi, keenjoci, onapu kara uumbanda uunene poshi mokati komazimo moru euajararo rjefuta rja geja, nomakucikuci.

²⁶ Aantu onaa ka sa kehanduko mokutira no mokutegerera iinima mbi taji ke ja muujuni aushe, oshoka eenkondo do keguru onadi kekamicua.

²⁷ Taa ka mona Omuna guOmuntu te ja miikogo neenkondo nehadimo.

²⁸ Ajishe mbi nge ja shimbika okuningua, rigameneni ko, ne mu jeruce eemutse deni, oshoka ehupico rjeni orja cika popepi.

²⁹ H’ote ja rombuere uo ejere, ta ti: Tareni omukuju neemuti adishe.

³⁰ Nge tadi tameke okuima, otamu dimburura nokutja ocinge oha cika.

³¹ Tsh’otsho mu dimburure, ajishe mbino nge taji ningua, nokutja otshirongo tsha Karunga otshi ri popepi.

³² Tshiri, andi mu rombuere: Orudi nduka itaru shuru po, manka ajishe inaji ningua.

³³ Eguru nevi otari shuru po, ndere eehapu dandje itadi shuru po.

³⁴ Ndere omu ikotokera ne ojene, eemuenjo deni kadi sicue uudigu kokudiragura no kokurua no kokus’iimpuju juujuni mbuka, esiku ndijaka kari mu ade ombaderera.

³⁵ Oshoka otari ja ngashi omuigo mu ajeshe, mba je ri muujuni aushe.

³⁶ Ano taatareni nokugarikana arushe, opo mu moniue muo opara okuenuka ajishe, mbi taji ke ja, nokucikamakua komesho gOmuna guOmuntu.

³⁷ Omutenja okua ronga aantu montempeli, nd’uusiku okua zi mo a ka kare kondundu, ndji ha rukua ondundu heemono.

³⁸ Aantu ajeshe oja meneka ongura, je ja ku he montempeli okumupuakena.