Lukas 20 - Etestemente Epe ✠ 1951

ONTOPORUA 20. Aafariseji meembata na Jesus.

¹ Esiku rimue, sho a ronge aantu montempeli e ju uvicire evangelium, aapristeri aakuruntu naanongo jomambo oje ja mo uo.

² Jo taa mu pura: Tu rombuera ano: shi to ningi, oto tshi ningi meenkondo da re, nenge ore e ku p’eenkondo dika?

³ Jesus h’ota jamukura, ta ti ku jo: Na ngaje onda ara ndi mu pure ohapu himue. Jamukurii ndje.

⁴ Etshatsho rja Johannes orja zire keguru nenge omaantu?

⁵ Jo otaa hidiradira, nde taa kundacana: Ng’otua ti okeguru, he ota ka tja: Otshike nduno inamu mu iteera?

⁶ Ng’otua ti omaantu, aantu taa ke tu mbambanga nomamanja, oshoka oji iteera nokutja Johannes omuprofeti.

⁷ Ano oja jamukura mo nokutja kaa tshi uo mpo rja zire.

⁸ Jesus h’ota ti ku jo: Ano na ngaje itii mu rombuere, nokutja omeenkondo da re tii rongo shi.

Ejere rjepja rjomavinju.

⁹ Nde ta tameke okuronga aantu neehapu dejere: Omuntu gumue okua tsike epja rjomavinju, te ri gandja uucica kaantu, manka ta hi a ka menekere ko.

¹⁰ Etango sho rja ciki, okua tumu omupija kaarongi, je mu p’iihimati je jotshikunino, ndere oje mu denge, jo taa mu undura ko ouara.

¹¹ Itshee ta tumu omupija gumue a hiri, ndere na nguka taa mu denge, taa mu tuku, jo taa mu undura ko ouara.

¹² Omutitatu ta tumua, na nguka ta dengua uo iiraro, jo taa mu tida ko.

¹³ Nde muene guotshikunino ti ipura: Andi ningi ngiini ano? Onda ara ndi tume mumuandje omuorike; nge taa mu mono, shira taa ke mu simaneka.

¹⁴ Ndere aarongi sho je mu mono, oja kundacana, taa ti: Ngok’omucigururi, tu mu dipageni, uuciga opo u ninge uetu.

¹⁵ Jo otaa mu tida mo motshikunino, nde taa mu dipaga. Muene guotshikunino ote ja ningi ngiini ano?

¹⁶ H’ote ke ja, ta ka dipaga aarongi mbo, nd’otshikunino te ke tshi p’aarongi ji iri. Sho je tshu uvu, oja ti ku he: Tshivarerue, itatshi ningua ngaaka.

¹⁷ Ndere he te ja tara, nde ta ti ku jo: Omutshango nguka momambo ogua ara tshike, sho kua tiua: Emanja ndi rje ekeruashi kaatungi, orjo rja ninga emanja rjo potshikororo.

¹⁸ Keshe ngu ta guire kemanja, ota muashuka, ndere ngu tari guire, ota njanjuka.

Jesus ta purua efendero nejumuko.

¹⁹ Mesiku ndija aapristeri aakuruntu naanongo jomambo oja konga je mu kuate, ndere oja tira aantu, oshoka oja dimburura nokutja ojo kua ta popi mejere ndika.

²⁰ Oje mu rangere, jo taa tumu aamentu aasisiti meni, ja tshiue okumukuatera meehapu de, opo ja mone ompito okumufara mepanguro rjaakuruntu no rjomureri guotshirongo.

²¹ Mbono oje mu pura ano: Muongi, otu tshi tshi, nokutja oto popi nguee to rongo uo shi tshu uka, nguee ku tara nand’orupe ruomuntu, nde oto rong’ike notshiri ondjira ha Karunga.

²² Otshu uka tuu okufuta efendero rjomukuaniirua nenge aaue?

²³ H’okua nonga iirundo jauo, nde ta ti ku jo: Otshike tamu makerere ndje?

²⁴ Urukirii ndje ondenari. Ohi na ecano nokutshanga kua re? Jo taa mu jamukura: Orjomukuaniirua.

²⁵ He ta ti ku jo: Gandjeni nduno komukuaniirua shi tshomukuaniirua, ne ku Karunga shi tsha Karunga.

²⁶ Jo ja njengua okuganda ohapu he mokati kaantu, aaue, oja muena, ndere oja ri ja kumua ko kejamukuro rje.

²⁷ Aasaduzeji oje engene ku he, mba haa ti: Kapen’ejumuko. Jo taa mu pura:

²⁸ Muongi, Moses okue tu rombuerere: Omumuahina gua gumue po ta si, ngu a ri nomukiintu, ndere ina ciga po ojana, nena omumuahina gue ne mu okane a pendurire po omumuahina oruvaro.

²⁹ Nd’aamuahina aarumentu oja ri uunuari. Guotango po to okana, nde ta si ke noruvaro.

³⁰ Omutijari te mu okana po, nde na he uo ta si ke noruvaro.

³¹ Nomutitatu te mu okana po, tsh’otsho tuu ajeshe uunuari. Ajeshe taa si kaa noruvaro.

³² Nde shugunina omukiintu ngu a he uo a ka sa.

³³ Ota ningi nduno gua re pu mboka mejumuko?

³⁴ Jesus te ja jamukura: Aana juujuni mbu haa hokana, jo haa hokanua.

³⁵ Ndere mbeja, mba ja tiua ojo opara okumona uujuni mbuija nejumuko rjaasi, kaa hokana, jo kaa hokanua ue.

³⁶ Kaa pondoka ue okusa, oshoka otaa ka facana naajengeli naana ja Karunga morua shoka jo aana jejumuko.

³⁷ Nokutja aasi otaa ka jumuka, shik’otsha romborua ngaa ku Moses, mpa a hepurura eno ndija enene, mpa a rukira Muene Karunga kAbraham, kIsaak no ka Jakob.

³⁸ Karunga ke shi Karunga kaasi, aaue, okaanamuenjo tuu.

³⁹ Aanongo jomambo jamue taa jamukura, taa ti ku he: Muongi, ua popja naua.

⁴⁰ Inaa hitsica ue okumupura ohapu.

⁴¹ Ndere he ta ti ku jo: Matsa, aantu otaa ti ngiini: Kristus anuua Omumua David.

⁴² Ndere David muene a shanga membo rjeepsalmi: Muene okua rombuera Muene guandje: Kaatumba korurjo ruandje.

⁴³ Sigo otii rangeke aatondi johe poshi ja ninge otshiratero tsheempadi dohe?

⁴⁴ David ano, nge te mu ti Muene, Omona nduno itshee ngiini?

⁴⁵ Manka aantu ajeshe je mu pupa, h’ota, rombuere aarongua je:

⁴⁶ Angareni aanongo jomambo, mba jo ore okuenda ja zara eenguuo eende nokukundua potshirandero, jo ja ara omakaatumbiro gokomesho meesinagoga niipundi jotango miituci.

⁴⁷ Jo taa ri po ouara omagumbo gaasherekadi nokupopja niiherere omagarikano omare. Otaa ka mona epanguro edigu ri vure po.