Lukas 2 - Etestemente Epe ✠ 1951

ONTOPORUA 2. Okuvarua kua Jesus.

¹ Momasiku ngeja opua ningi, otshipango tsha zire komukuaniirua Augustus, uujuni aushe u jarurue.

² Etshango ndika orja ri rjotango, rjo rja ningua ku Tsirinus, erenga mu Siria.

³ Ajeshe oja hi, ji itshangice, keshe muntu momukunda guezimo rjaandjauo.

⁴ Josef uo okua zire mu Galilea, momukunda Nazaret, nde ta hi mu Judea, momukunda gua David, edina rjago Betlehem, oshoka okua ri guezimo no guegumbo rja David.

⁵ Okui ire i itshangice puamue na Maria, omujarekua gue, ngu a ri omusimba.

⁶ Sho ja ciki ko, okua ningi, omasiku ga pua ko a vare.

⁷ H’ota vara ko otsheeri tshe, te mu dingire momarapi, he te mu rangeke mokatemba kokurira iimuna, oshoka kapua ri nand’eshara meendjugo daahenda.

⁸ Peharara ndika opua ri pu naasita, haa rica, jo haa rangere iimuna jauo uusiku.

⁹ Nde tara omujengeli gua Muene a cikama pu jo, nuujerere ua Karunga oue ja minikira, nde taa kara ja tiririra.

¹⁰ Nd’omujengeli ta ti ku jo: Inamu tira, oshoka otandi mu uvicire enjanju enene, ndi tari ningirua aantu ajeshe.

¹¹ Nena omua varerua omukuriri momukunda gua David, Kristus Muene.

¹² Na shika otshidimburukico ku ne: otamu ka mona okanona, ka dingirua momarapi, ko ka rangekua mokatemba kokurira iimuna.

¹³ Naanzijanzija pomujengeli opue ja ongundu haakuiita jeguru, tahi tanga Karunga, tahi ti:

¹⁴ Na simanekue Karunga guomombandambanda, nombiri maantu poshi mpa, mba je neharo euanaua.

¹⁵ Tsha ningi, aajengeli sho ja zi po, ja tshuna meguru, aasita jo ja tjacana: Tu eni ku Betlehem, tu tare ohapu, ndji ha ningua, ndji Muene e tu uvicira.

¹⁶ Jo oje enderere, taa hada ko Maria na Josef nokanona ke ri mokatemba.

¹⁷ Sho je ka mono, jo otaa hepurura ajishe, mbi ja rombuererue jokanona haka.

¹⁸ Ajeshe mba je tshu uvu, oja kumua ko kiinima ajishe, mbi ju uvite kaasita.

¹⁹ Nde Maria okua pungura eehapu dika adishe, he te di diradira momutima gue.

²⁰ Aasita jo oja tshuna, taa hamberere Karunga, taa mu tanga kiinima ajishe, mbi ju uva, jo je ji mona.

Jesus ta farua montempeli.

²¹ Sho pua piti omasiku uunutatu, okanona oka fukarekua, nedina rjako Jesus, ngashi ka rukirue nare komujengeli, manka inaka varua.

²² Ano omasiku gehijereko, ndi rja romborua ku Moses, sho ga piti po, jo oje ke etera ku Jerusalem, je ka gandjere Muene.

²³ Ngashi pua tshangererue mompango ha Muene: Okamati keshe, ha taka varua tango, otaka japurirua Muene.

²⁴ Nokugandja eenguti mbaari nenge eengutjona mbaari, orjo egano ndi rja romborua mompango ha Muene.

²⁵ Nde tara, mu Jerusalem omua ri omurumentu, e nedina Simeon; omurumentu ngu okua ri a huka, ha tira Karunga, he a ri a tegerera nejeeruko ehekererico rja Israel, Ombepo Ondjapuki ho ha ri mu he.

²⁶ H’okua rombuerua kOmbepo Ondjapuki, nokutja ita si, manka ina mona Omuguajekua gua Muene.

²⁷ H’okue ja montempeli, e neue kOmbepo Ondjapuki. Aakuruntu sho je eta mo okanona Jesus, ka guanicirue ompango nomukaro.

²⁸ Okue ka tuumba momooko ge, ta tanga Karunga, ta, ti:

²⁹ Nena oto rareke ndje, Muene, ngaje omupija guohe, ndi he nombiri, ngashi ua tire.

³⁰ Oshoka omesho gandje oga mona ehupico rjohe.

³¹ Ndi ua ronga miipaci jaantu ajeshe.

³² Uujerere uokujerera aapagani no uesimaneko rjaantu johe Israel.

³³ She na hina oja ri ja kumua ko kiinima, mbi ja popiua po.

³⁴ Simeon okue ja jambeke, nde ta ti ku Maria, hina hako: Tara, nguka okua turua po a ninge otshipundukiro, h’otshipendukiro tshojendji mu Israel, h’otshidimburukico, shi tatshi ka patacanua.

³⁵ Egonga onari tapakana omutima guohe, omadiradiro geemutima odindji go oroke.

³⁶ Omua ri itshee omuprofeti omukiintu, e nedina Anna, omumua Fanuel, guomezimo rja Aser. Okua ri a koka. Sho a hokanua omukadona, okua kara nomurumentu gue eemuvo uunuari.

³⁷ Perara ndiono okua ri omusherekadi, e neemuvo eemurongo uunutatu neemuvo iine. Ka ri he eca mo montempeli, ta karere Karunga nokuidirika iikurja nokugarikana eemuvo uunuaari.

³⁸ Na he uo okue ja petango ndika, ta simaneke Karunga, he te mu rombora kaantu ajeshe, mba kua ja tegerera ekuriro rja Israel.

³⁹ Sho ja mana ajishe jo mompango ha Muene, oja tshuna ku Galilea momukunda Nazaret.

⁴⁰ Omunona h’okua koko, ta koro, nde tu uda uunongo, noshenda ha Karunga oha ri puamue na he.

Jesus ta hi naakuruntu ku Jerusalem.

⁴¹ Aakuruntu je okua haa hi keshe muvo ku Jerusalem, ja ka dane otshituci tsha Paska.

⁴² Sho a hada keemuvu omurongo na mbaari, oja hi ku Jerusalem komukaro guotshituci.

⁴³ Omasiku gotshituci sho ga pu, nde taa tshuna, he omunona Jesus nani a kara po mu Jerusalem, jo mbeja, aakuruntu je, kaa ri je tshi tshi.

⁴⁴ Okua je tshi, oku ri mongundu haakuauo mba ja hi; jo otaa hi ano esiku rimue nokumukongo maakuauo no mojakuauo.

⁴⁵ Sho inaa mu mono mo, jo otaa tshuna itshee monima ku Jerusalem, oko je ke mu konge.

⁴⁶ Tsha ka ninga ano, konima homasiku gatatu, je mu ada montempeli, a kaatumba mokati kaarongi jeehapu, te ja puakena, he te ja pura.

⁴⁷ Ajeshe mba je mu puakena, oja rurirua keendunge no komajamukuro ge.

⁴⁸ Sho je mu mono, oja ri ja kumua ko unene. Hina h’ota ti ku he: Mumuandje, otshike ue tu ningira ngiika? Tara, sse na sho otue ku konga nuupongo.

⁴⁹ He ta ti ku jo: Omua kongere ndje tshee? Inamu tshi tshiua, nokutja ondi nokukara mu mbi ja Tate?

⁵⁰ Ndere kaa ri ju uva ko ohapu, ndji a popi ku jo.

⁵¹ Jesus h’ota hi na jo ku Nazaret, nde ta kara e nevuriko ku jo. Ndere hina okua kara ngaa a pungura eehapu di adishe momutima gue.

⁵² Mpaka Jesus ta koko muunongo no muukuruntu no moshenda motshipara tsha Karunga no tshaantu.