Lukas 19 - Etestemente Epe ✠ 1951

ONTOPORUA 19. Jesus maandja Zakeus.

¹ H’okue ja mu Jeriko, nde te ende te tshi pitirire.

² Nde tara, opua ri pu nomuntu, e nedina Zakeus. A ri oh’erenga rjaafenderi, h’omujamberera.

³ H’okua arere unene okumona Jesus, nokutja ohe re, ndere ine tshi pondora kiikara jongundu haantu, na shoka a ri omushupi.

⁴ H’otsho ano ta matukire komesho, nde a ka ronda komukuju, e mu mone mpate ja a pite.

⁵ Jesus h’ote ja po, ta rigamene pombanda, te mu mono, nde ta ti ku he: Zakeus, rondoroka ko, enderera, oshoka nena ndjika otandi k’uhara maandjohe.

⁶ Naanzija h’ota rondoroka ko, nde e ke mu rangica nenjanju maandje.

⁷ Mba je tshi mono, ajeshe jo taa ngungutura, taa ti: A ha megumbo rjomunandjo.

⁸ Ndere Zakeus okua hi komesho ga Jesus, nde ta ti: Muene, iinima jandje ajishe otandi topora pokati, ndi p’aacigona otshitata, ndere ng’onda kengerera omuntu, andi tshi mu tshunicire rune.

⁹ Nde Jesus ta ti ku he: Nena ndjika egumbo ndika orje eterua ehupico, oshoka muene guarjo na he uo omumua Abraham.

¹⁰ Oshoka Omuna guOmuntu okue ja okukonga h’a ningice erago shi tsha kana.

Ejere rjiiponda omurongo.

¹¹ Sho ja puakena eehapu de, okua guedera ko ejere, oshoka mokuja popepi na Jerusalem oja ri je tshi, otshirongo tsha Karunga tatshi orokere naanzija mpo.

¹² He ta ti ano: Omurumentu omujamba okua hi motshirongo a hikongere uukuaniirua, he a garuke.

¹³ H’oti icana nduno aapija je omurongo, te ja pe uo iiponda omurongo, nde a ti ku jo: Rongeni na jo sigo ote garuka.

¹⁴ Ndere aantu jotshirongo tshe oje mu tonda, taa tumu ku he ja tje: Inatu mu ara ngo a ninge omukuaniirua, guetu.

¹⁵ Ndere pua ka ninga, ta peua uukuaniirua, nde ta garuka. Ti icana aapija, mba ja perue iimariua, je mu tshiuicire shi ji irongere ko.

¹⁶ Ngu guotango e ja, ta ti: Muene, oponda hohe oha rikorica ndje iiponda omurongo.

¹⁷ He ta ti ku he: Ijaroo, mupija omuanaua, oshoka oua ri omudiginini muunima uutshona, andi ku ningi erenga rjeemukunda omurongo.

¹⁸ Nomutijaari e ja, ta ti: Muene, oponda hohe oha rikorica ndje iiponda iitano.

¹⁹ He ta ti ku he: Ano, oto ka rera eemukunda ntano.

²⁰ Mukuauo e ja, ta ti: Muene, kuata oponda hohe. Onde hi pungura motshikajua.

²¹ Onda ri nde ku tira, oshoka ngueje omuntu omudigu, oho kuca hu ino pungura, nguee ho teja hu ino kuna.

²² He ta ti: Andi ku pangurire eehapu dohe muene, mupija omuineji. Oua ri u tshi naua, nokutja ngaje omuntu omukukutu, ohe kuca hu ine pungura, ngaje he teja hu ine kuna.

²³ Otshike nduno ino fara iimariua jandje kaarandakanici, opo mokugaruka kuandje ndi ji peururue niiguederua jajo?

²⁴ H’ota rombuere aantu, mba ja cikama mpo: Mu kuceni oponda ndjoka, nde tamu hi pe nguija ngu e niiponda omurongo.

²⁵ Jo taa ti ku he: Muene, oku na nare iiponda omurongo.

²⁶ Eno, andi mu rombuere: Keshe tuu ngu e na, ota peua itshee a kare nerooro, ndere ngu ke na, ota kucua uo sh’a f’e na.

²⁷ Ndere aatondi jandje, mba kaa harere ndi ninge omukuaniirua guauo, je eteni hu, mu ja dipage miipaci jandje.

²⁸ Sho a popi eehapu dika, okua hi ku Jerusalem, he ta tetekere.

Jesus ta ambererua mu Jerusalem.

²⁹ Sho ja ciki pu Betfare na Betania, popepi nondundu heemono, okua tumu jaari jo maarongua je, ta ti:

³⁰ Indeni kokakunda ha ke mu ri haandija; nge tamu hi mo, tamu ka ada okanimona kondongi, ka pandekua, omuntu ina ronda ko natango; ka pandukururii mo, nde tamu ke eta ku ngaje.

³¹ Nde ng’omuntu te mu pura: Otshike tamu ka pandukurura mo, omu tja: Omuene e ka pumbua.

³² Ano mba ja tumua, taa hi, jo taa hada okanimona ka pandekua, ngashi e ja rombuerere.

³³ Sho taa ka pandukurura mo, muene guako okue ja pura: Otshike tamu ka pandukurura mo?

³⁴ Jo taa jamukura: Muene okue ka pumbua.

³⁵ Nde taa ke eta ku Jesus, jo taa jara ko eenguuo dauo, nde taa rondeke ko Jesus.

³⁶ Manka kua te ende, oja jara eenguuo dauo mondjira.

³⁷ Sho e ja popepi nondundu, ongundu ahishe haarongua oha tameke okuamberera Karunga nenjanju neui enene moru iironga iikumici mbi ha mono.

³⁸ Jo taa ti: Na ambererue ngu te ja medina rja Muene, he Omukuaniirua. Ombiri meguru nesimano mombanda.

³⁹ Ndere aafariseji jamue, mba ja ri mokati kaantu, taa ti ku he: Muhongi, tshi gandera aarongua johe!

⁴⁰ He ta ti ku jo: Andi mu rombuere, mbono nge taa muena, omamanja ogo tagi igida.

⁴¹ Sho e ja popepi, nde ta mono omukunda, okue gu ririre.

⁴² Ta ti: Ngeno kua uo ngaa ua dimburura, mesiku rjohe rjonena, shi tatshi ku etere ombiri — ndere otsho orekua momesho gohe.

⁴³ Oshoka omasiku otage ke ja, aatondi johe mu taa ku dingirire omutunda, taa ku angakene, jo taa ku zi keembinga adishe.

⁴⁴ Taa ku shata poshi naanona johe, mba je ri mu ngueje, nd’itaa cigi po nando emanja komband’ekuauo, morua shi ino dimburura erara rjetareropo rjohe.

⁴⁵ Sho e ja montempeli, okua tameke okutida mo aatshingici naarandi.

⁴⁶ H’ota ti ku jo: Opua tshagua: Egumbo rjandje orja fere ri tiue egumbo rjomagarikano, ndere ne omue ri ninga ekorombombo rjiimpuru.

⁴⁷ Keshe esiku okue ja a ronge montempeli. Ndere aapristeri aakuruntu naanongo gomambo nomarenga gotshirongo otaa kong’ike je mu nene ko.

⁴⁸ Ndere inaa tshi mona shi ja arere okumuningira, oshoka aantu ajeshe oja ri je mu ore, shimpa je mu puakena.