Lukas 18 - Etestemente Epe ✠ 1951

ONTOPORUA 18. Garikaneni nehididimiko!

¹ H’okue ja rongo uo nejere, nokutja omuntu na garikane arushe, he ka vurue mo.

² Ta ti: Motshirongo shontumba omua ri mu nomupanguri, ngu ka tira Karunga, he ke na muntu.

³ Momukunda nguka omua ri nduno omusherekadi. H’okue ja ku he, ta garikana: Uucira ndje iihokorora jomutondi guandje!

⁴ Ndere ngu ta muen’ike orure. Konima okui ipopire: Nande kii tira Karunga, ngaje kii pukurura muntu.

⁵ Nda ara ndi uucire omusherekadi nguno ondjira, te epica ndje, opo ke je esiku rimue a jage ndje motshipara.

⁶ Nde Muene ta ti: Puakeneni omupanguri ngu omuineji sho ta popi.

⁷ Ando Karunga itu uucire aahogororua je ondjira, mba taa mu kugu omutenja nuusiku, he ta muena ando, nge taa monicua iishuna?

⁸ Andi mu rombuere: Ote ju uucire nzijanzija. Ndere Omuna guOmuntu, nge te ja, ota ka mona ando ehiteero kombanda hevi?

Ondjambi hehitshonopeko.

⁹ H’ota rombuere jamue, mba ja ri ji itura ju uka, jo otsho taa dini jakuauo, ejere ndika:

¹⁰ Aantu jaari oji ire montempeli ja ka garikane, gumue omufariseji, mukuauo omufenderi.

¹¹ Omufariseji a cikama, ti ikarere mpeja, nde ta garikana otshingii: Karunga, onde ku amberera, oshoka ngaje kandi ri ngashi ojakuetu, ngashi aafuri naafuci naajakeracani nenge ngaa uo ngash’omufenderi ngu.

¹² Andi izirike eendja ruaari motshiuike, ngaje he gandja otshitimurongo piinima ajishe mbi ndi na.

¹³ Ndere omufenderi okua cikama e ri kokure, iti itsica nande a rigamenice omesho ge geguru, unene okui idengere ponturo, he ta ti: Karunga, sira ndje oshenda, ngaje omunandjo.

¹⁴ Andi mu rombuere: Nguk’okua tshuna kegumbo a hukiriricua, ndere nguija tshivarerue, oshoka keshe ngu ti inenepeke muene, ota tshonopekua, he ngu ti itshonopeke, ota nenepekua.

¹⁵ Aantu jo je eta uo uunona ku he e u njenge. Ndere aarongua, sho je tshi mono, oje ja ganda.

¹⁶ Nde Jesus te ji ihicanene, ta ti: Eceni uunona u je ku ngaje, inamu u kerera, oshoka otshirongo tsha Karunga otsha mboka je u fa.

¹⁷ Tshiri, andi mu rombuere: Ngu ita jakura otshirongo tsha Karunga ngashi okanona, ita ka ha mo.

Erongo rjuucigona.

¹⁸ Omuntu gumue a simana h’ote mu pura: Muongi omuanaua, nandi ninge tshike ndi mone omuenjo guarushe?

¹⁹ Jesus ta ti ku he: Otshike to ti ndje omuanaua, ndi tshi gumuike omuanaua, Karunga ’ike?

²⁰ Iipango ou ji tshi: Ino dipaga, ino jakera, ino jaka, ino rundira, simaneka sho na njoko.

²¹ He ta ti: Atshishe shika onde tshi ninga okuza k’uunona uandje.

²² Jesus a pupa ko, nde ta ti: Ou na po tshimue, katshi po nanena: Ka randica po atshishe shi u na, nde to tshi paacigona, opo to kara u neriko meguru, nguee to garuka u randure ndje.

²³ Nguija sho a huvu eehapu di, okue ehama momuenjo, oshoka okua ri omujamberera.

²⁴ Jesus sho e mu mono a s’uupongo, okua ti: Ope nuudigu u cike peni komuntu e neriko, a he motshirongo tsha Karunga.

²⁵ Ongamero ngeno okupita mombururu honguija oshuepo tshi vure omujamba a he motshirongo tsha Karunga.

²⁶ Ajeshe mba je tshu uvite, oja ti: Ore nduno ta vuru okuupicua?

²⁷ He ta ti: Shi tsha njengacana paantu, Karunga ote tshi vuru.

²⁸ Petrus h’ota ti: Tara, otua ciga po ajishe, sse tue ku randura uo!

²⁹ He ta tsikire ko: Tshiri, andi mu rombuere, kakuna ngu a ciga po egumbo nenge aakuruntu nenge aamuahina nomukiintu nojana moru otshirongo tsa Karunga.

³⁰ Ta kara ina peua ji vure unene mbija ajishe muujuni mbu, nde muujuni mbuija tau ja, h’a ka mona omuenjo guarushe.

Jesus ta popi okuepekua kue.

³¹ Jesus h’ota kuca mbeja omurongo na jaari, nde ta ti ku jo: Tareni, ss’otatu hi ku Jerusalem. Atshishe otatshi guanicua shi tsha popirua Omuna guOmuntu kaaprofeti.

³² Ota ka gandjua miikasha jaapagani, ta ka tshekua, ta ka dengua neengora, ta ka sijirua omajeje.

³³ Ndere nge je mu denge neengora, jo taa ke mu dipaga, ndere mesiku etitatu ta ka jumuka.

³⁴ Ajeshe kaj’uvite ko atshishe shi ta popi, omurombo ngu ogue ja futamena, inaa nongera shi tatshi romborua.

Omuposi ti indire Jesus.

³⁵ Sho e ja popepi na Jeriko, omuposi a kaatumba pondjira te ehera.

³⁶ Sho tu uvu, aantu taa hende po, okua pura shi tshi ri po.

³⁷ Jo taa ti ku he: OJesus omunazereta te ende po.

³⁸ H’oti igida: Jesus, Mumua David, sa ndje oshenda!

³⁹ Nde mba ja tetekera, taa mu ganda a muene. Ndere he ti igida neui enene ri vure po: Mumua David, sa ndje oshenda!

⁴⁰ Jesus a cikama nduno, h’ota rombuere aantu je mu ete ku he. Sho a hengene ko, okue mu pura:

⁴¹ Oua ara nduno ndi ku ningire tshee? He: Muene, ndi pashurue.

⁴² Jesus h’oti i mo, ta ti: Mona ko! Ehiteero rjohe rje ku kuaca.

⁴³ Naanzija h’oku uete, nde te mu randura nokuamberera Karunga. Ndere uo aantu ajeshe, mba ja mono shino, oja tanga Karunga.