Lukas 17 - Etestemente Epe ✠ 1951

ONTOPORUA 17. Omarengue — ehitshonopeko.

¹ Jesus h’ota rombuere aarongua je: Omarengue itaga kara itage ja po, ndere ojeeje komuntu, ngu te ge eta po.

² Ngeno shuepo ng’okuaj’omuntu ngo ta mangerua omumanja mocingo he, nde te ekerua muure mefuta, tshi vure sho ta rengica gumue po puunuunuka mbu.

³ Itaatareni ne ojene: Omumuanjoko ng’okue ku ningi neji, inda, nde to mu pukurura. Nge ti ip’ombedi, mu dimina po.

⁴ Nge e ku ningi neji rutinuuari mesiku, nde rutinuuari mesiku te ja itshee ku nguee, te ku garikana: Ondi ip’ombedi, mu dimina po.

⁵ Mpaka aapostoli jo taj’indire Muene: Tu guedera ehiteero!

⁶ He Muene ta ti: Ng’omu nehiteero rja f’osinapi, ando nde tamu rombuere omuti nguka: Ituda mo, nde to ki itsika mefuta, otagu mu uvu.

⁷ Ore mokati keni, ngu e nomupija guepja nenge guiimuna je, te mu rombuere ando, nge a zi mepja: Enderera u ka kaatumbe potshiriro?

⁸ Ndi tshi, ote mu rombuere: Turira ndje po uurarero, zara orushira, ngueje u tegerere sigo ote mana okurja nokunua, nguee to ja uo nduno u rje, ngueje u ue.

⁹ Ota pandura ando omupija, shoka a ronga shi e mu rombuera?

¹⁰ Ngaje inii tshi tengeneka sho. Tsh’otsho tuu ne, nge mua rongere shi mua rombuerua, mu tje ike: Sse aapika jouara, tua rong’ike shi tua ri tu nokutshironga.

Jesus naavu jotshirundu.

¹¹ Mondjira okuha ku Jerusalem, okue enda mokati kotshirongo Samaria na Galilea.

¹² Sho e ja momukunda guontumba, aarumentu omurongo je nuuvu uotshirundu oje mu tsakaneke, jo taa cikama kokure.

¹³ Nde taj’igida, taa ti: Jesus, muongi, tu sir’oshenda.

¹⁴ Sho e ja mono, okua ti ku jo: Indeni, mu ki itarice kaapristeri. Manka ngaa taa hende taa hi, jo je eruka.

¹⁵ Gumuike po a garuka, sho a mono nokutja a jera, nde ta amberere Karunga neui enene.

¹⁶ H’oti isizimike motshipara keempadi de, nde te mu pandura. Nguk’okua ri omusamarita.

¹⁷ Jesus h’ota pura, ta ti: Kaje shi omurongo, mba ja jera nani? Omugoji nduno oje ri peni?

¹⁸ Ndere inapu monikua ue nand’ogumue a garuka a simaneke Karunga, omuhendanandjira ike ngu.

¹⁹ H’ota ti ku he: Cikama, nde to hi, ehiteero rjohe rje ku kuaca.

Okuja kuesiku rjOmuna guOmuntu.

²⁰ Sho a purua kaafariseji: Otshirongo tsha Karunga otatshi ja unake? okue ja jamukura mo: Otshirongo tsha Karunga itashi ja nuurenga ui ihorora.

²¹ Itaku tiua uo: Tara oompo nenge oompejaka tshi ri, oshoka otshirongo tsha Karunga otshi ri mokati keni.

²² H’ota rombuere aarongua je: Omasika otage ja, ne otamu jeerukua okutara esiku rimuike rjOmuna gu’Omuntu, ndere itamu ke ri mona.

²³ Otamu ka rombuerua kaantu: Tareni, ohe ngu nenge nguija. Inamu ha ko, ne inamu randura ko.

²⁴ Oshoka ngashi oruadi tura adima koshi heguru, ruo taru minikire uo ajishe mbi ji ri koshi heguru, otsho ngaa ngii uo natshi ningua nOmuna guOmuntu mesiku rje.

²⁵ Ndere tango ota mono iishuna ojindji, he ta ke ekeruashi tuu korudi nduka.

²⁶ Ngashi tsha ningirue muujuni ua Noa, otsho tuu uo momasiku gOmuna guOmuntu.

²⁷ Oja rire, ja nuine, jo okanene, jo jo okanenue, sigo esiku rja Noa orja ciki, sho a hire metembameja, ejeeru rje ja, nde tari pona po ajeshe.

²⁸ No momasiku ga Lot otsha ningirue ngatshikuauo: oja rire, ja nuine, ja randere, ja randicire po, ja kunine, jo ja tungire.

²⁹ Ndere mesiku ndija, Lot sho a zire mu Sodoma, omuriro nuuzigo oua rokere keguru, uo ua jonene po ajeshe.

³⁰ Nesiku ndi, Omuna guOmuntu nge ta ki ihorora, onapu ka ningua ngatshikuauo.

³¹ Perara ndika ngu e ri kombanda hondjugo, nde a ciga po iinima je meni, ina rondoroka po e ji ire, na ngu e ri mepja, ina garuka mo,

³² Dimburukueni omukiintu gua Lot!

³³ Ngu ta kembadara a hupice’omuenjo gue, ote gu kanica, he ngu te gu kanica, ote gu upica.

³⁴ Andi mu rombuero: Nuusiku mbuja onaku adikua jaari kokariri kamue, gumue ta jakurua, mukuauo a cigua po.

³⁵ Onaku adikua uo jaari taa tsu potshini tshimue, gumue ta jakurua, mukuauo ta cigua po. Jaari je ri mepja rimue, gumue ta jakurua, mukuauo ta cigua po.

³⁶ Jo taa jamukura, taa ti ku he: Muene, openi?

³⁷ He ta ti ku jo: Mpo pu na omudimba, opo tapu gongara eentsa.