Lukas 16 - Etestemente Epe ✠ 1951

ONTOPORUA 16. Ejere rjomupangeri ombudi.

¹ Kaarongua okua popi ejere ndika: Opua ri omuntu omujamba, ngu a ri e nomupangeri guiinima je, ndere nguka a popiua, anuua ta shanagura po iinima je

² H’ote mu icana nduno, nde ta ti ku he: Ondi ku uvitire tshike? Jarura iinima jo mepangero rjohe, ito vuru ue okukara omupangeri guandje.

³ H’omupangeri ti ipopire: Andi ningi tshike, muene guandje nge ta kuca ndje mepangero? Kandi neenkondo ue dokupapura, ko okuehera nda s’oshoni.

⁴ Ondi tshi shi te ningi, aantu ja jakure ndje momagumbo gauo, ng’onda tidua mo mepangero.

⁵ H’oti icana nduno aanankuma ajeshe ja muene gue ko ogumuegumue, je je ku he, nde ta rombuere ku ngu guotango: Eenkuma dohe ku muene odi cike peni?

⁶ Nguka ta ti: Omagadi iijuma ecere rimue. Ngui ta ti: Kuca ombapira hohe, kaatumba, nguee to tshanga po nzija eemurongo ntano.

⁷ Ku mukuauo ta ti: Eenkuma dohe odi cike peni? Ta ti: Iirja eempunda ecere rimue. He nguija te mu rombuere: Kuca ombapira hohe u tshange po nzija eemurongo uunutatu.

⁸ Muene h’okua amberere omupangeri nguka omukotokeri, anuua okua ronga neendunge, oshoka ojana juujuni mokuendacana kuauo oje neendunge je vure aana juujerere.

⁹ Ngaje andi mu rombuere: Iningeni ookuume neriko rjomakoto, opo, nge tamu shurica eendjenda, je mu tuumbe momagumbo garushe.

¹⁰ Ngu omudiginini miinima iitshonatshona, omudiginini uo miinima iinene. Ngu omueci miinima iitshonatshona, omueci uo miinima iinene.

¹¹ Ng’inamu kara aadiginini merero rjeriko rjiirombo, ore te mu pe, mu rere eriko rjotshiri.

¹² Ng’inamu kara aadiginini miinima jaantu kaje shi aakueni, ore te mu pe mbi jeni ojene?

¹³ Kakuna mupika ta vuru okukarera aarenga jaari, oshoka ota ka tonda po gumue, he e hore mukuauo, nenge ota ki igameka ku gumue po, he ta dini mukuauo. Itamu vuru okukarera Karunga nuujamba.

Ehuko rjiirombo rjaafariseji.

¹⁴ Ajishe mbika aafariseji je ju uvu, mba ja ri ja arukire iimariua, nde taa mu tsheke.

¹⁵ Nde he ta ti ku jo: Ohamu iningi mu uka momesho gaantu, ndere Karunga oku tshi eemuenjo deni, oshoka shi tsha simana paantu, osho tshi tondiue ku Karunga.

¹⁶ Ompango naaprofeti oja shurire mu Johannes, ndere okuza mpoka omurombo guenjanju guotshiirongo tsha perunga tagu uvicua, nde ajeshe taa ka kembadara je tshi peue.

¹⁷ Eguru nevi okushura po otshipu tshi vure okadidiriko kamuike ka ze ko kompango.

¹⁸ Keshe ngu ta rareke omukiintu gue, nde to okana gumue a hiri, oto ondere, na ngu to okana gumue, ngu a rarekerue komurumentu gue, itshee oto ondere.

Omuntu omujamba na Lazarus.

¹⁹ Opua ri omuntu omujamba, a zarere eenguuo eentirigane do opara unene, di nondiro, nde keshe siku okua ha kara niituci iinene.

²⁰ Opua ri itshee uo omucigona gumue, e nedina Lazarus, a ri a hingonjena potsheero tshomujamba, a tsa ko ngaa iiraro juutsika.

²¹ Okua arere a hikutice nuupambu, mbu au gu kotshiriro tshomujamba, nde kapuna ngu e u mu pere. Eembua ike di ire, nde tadi raca iiraro je.

²² Esiku rimue omucigona ta si, nde ta farua kaajengeli mekoro rja Abraham. Nde omujamba uo ta si, ta fumbikua moheri.

²³ Sho a rigamenica omeho ge mehepeko enene moka, okua monene kokure Abraham, e ri na Lazarus mekoro rje.

²⁴ H’oti igida, ta garikana: Tate Abraham, sira ndje oshenda, nde to tumu Lazarus, a tse ondungu homunue gue momeja, e je a tarareke eraka rjandje, oshoka ote mono uudigu uunene momuriro mu.

²⁵ Nde Abraham ta ti ku he: Mumuandje, dimburukua nokutja oua ri omurinaua kuunamuenjo ngashi ngaa Lazarus a monene uukuanaruepo. Ngashiingino nguka ote ekerericua, nde ngueje oto epekua.

²⁶ Nd’itshee pokati ketu na ne opua zikua ombogo, opo ajeshe, nand’oja ara, kaa tshiue okuha ku ne ne kamu tshiue kuja ku jo.

²⁷ Nguija ta ti: Andi ku indire nduno, tate, mu tuma kaandja tate.

²⁸ Oshoka ondi naamuameme jatano, na he ku jo, e ke ja kumagide, kaa kar’itshee uo, je je motshirongo tshehepeko shi.

²⁹ Abraham ta jamukura mo: Oje na Moses naaprofeti, ojo naa huve.

³⁰ Nde he ta ti: Thivarerue, tate Abraham; ng’okua tapu zi gumue paasi a he ko, ando taji igarura.

³¹ Abraham ti i mo, ta ti: Ng’itaa huvu Moses naaprofeti, itaji iteere itshee ngaa uo, nand’omusi gumue po na jumuke.