Lukas 15 - Etestemente Epe ✠ 1951

ONTOPORUA 15. Ejere rjonzi ha kana.

¹ Aafenderi naarunde ojendji oje engene ku Jesus okumupuakena.

² Ndere aafariseji naanongo jomambo ja ngungutura, taa ti: Nguka oha jakura aarunde, nde ta ri na jo.

³ H’ote ja rombuere eehapu di domeere:

⁴ Ore mokati keni, ngu e neenzi ecere, nde ta kanica po himue, ita cigi po eemurongo omugoji nomugoji mombuga, a randure ndjiha ha kana sigo ote hi mono?

⁵ Nge e hi mona, te hi umbata komapepe ge nenjanju.

⁶ Na nge a cika kegumbo, h’oti icana ookuume ke naatshiinda, nde ta ti ku jo: Njanjukueni na ngaje, oshoka onda mona onzi handje, ndji ha ri ha kana.

⁷ Andi mu rombuere: Otsho tuu enjanju nari kare meguru okunjanjukirua omurunde gumue, ngu i igarura, ri vure enjanju rjokunjanjukirua mba ju uka eemurongo omugoji nomugoji, mb’inaa pumbua egaruro.

⁸ Nenge oguni po omukiintu, ngu e niiponda omurongo, nde ta kanica po himue, ita teme onjeka, ta kombo ondjugo ahishe, ta kongo nokukonga sigo ote hi mono?

⁹ Nge e hi mona, oti icana okaane ke naatshiinda, nde ta ti: Njanjukueni na ngaje, oshoka onda mona oponda, ndji ha ri ha kana.

¹⁰ Otsho, andi mu rombuere, napu kare enjanju paajengeli ja Karunga moru omurunde gumuike, ngu i igarura.

Ejere rjomumati a kana.

¹¹ He ta ti: Omuntu guontumba okua ri e nojana jaamati jaari.

¹² Omunona po ta ti ku she: Tate, ka pa ndje mo uuciga uandje! She nde ta toporere ojana iinima je.

¹³ Sho pua piti omasiku gamue omunona po h’ota kuca iinima je ajishe, nde ta hi na jo kotshirongo tsho kokure. Hoka oko a ke epicire iinima je ajishe, mokuendagura.

¹⁴ Sho a mana po iinima je ajishe, motshirongo mo mua guira ondjara onene, na he ta shimbike okus’oruepo.

¹⁵ Mpoka ota ki itja pomuntu guo motshirongo shika, nguka te mu unzire mepja rje, a ka rice iinguru.

¹⁶ Okua arere unene i iparuce niipeta, mbi kua haji riua kiinguru, ndere kapena ngu e ji mu pere.

¹⁷ Mpa, h’oti ihi mu he muene, ta ti: Aapija jangapi kaandja tate je ri merooro rjeendia, ngaje te si ngaa ondjara mpa?

¹⁸ Ote jambuka, nde tandi tshuna ku tate, ndi ke mu rombuere, te ti: Tate, nda tura ondjo meguru no motshipara tshohe.

¹⁹ Inandi ereka ue okutiua omuohe. Ninga ndje omupija nga’mbo johe.

²⁰ H’ota jambuka nokuri, nde ta hi ku she. She e mu monena nare kokure, nde ti iua kejeerero, te ende e mu tsakaneke, te mu papatere, he te mu cipi.

²¹ Nd’omona ta ti: Tate, onda tura ondjo meguru no motshipara tshohe, inandi ereka ue ndi tiue omumohe.

²² Ndere she h’ota rombuere aapija je, ta ti: Eteni mo nzija onguuo ombuanauarera, nde tamu hi mu zareke. Mu tureni okanane komunue gue, ne mu mu pe eengaku do k’eempadi de.

²³ Ke eteni itshee ontana ndji ho ondoka, nde tamu hi dipaga. Otua ara okurja, sse tu njanjukue.

²⁴ Oshoka omumuandje nguka okua ri a sa, ndere a ninga omunamuenjo, okua ri a kana, ndere a monikua. Jo otaa shimbike nokuri otshituci tshokunjanjukua.

²⁵ Omona omukuruntu okua ri e ri mepja. Sho e ja nduno, he ta ara ngaa okuada egumbo, oku uvite uunamaui nuudano ua pandeka.

²⁶ Ti icana omupija gumue po, te mu pura shi tshe ja ko.

²⁷ Nguka ta jamukura, ta ti: Omumuanjoko e ja, nde sho okua dipaga ontana ho ondoka, oshoka okua garuka, ina mona otshiponga.

²⁸ Ndere nguija a cita po, ina ara nande okuha mo, ndere she te ja kondje, he ta tameke okumugarikana.

²⁹ Nde nguija ta jamukura: Tara, eemuvo odindji nde ku karera: Inandi toga otshipango tshohe nand’orumue, nde nanena kuna nand’oompa ua pere ndje ngaa uo okakombo, ndi ninge okatuci kenjanju nookuume kandje.

³⁰ Ndere omumohe, ngu e ja po, ngu a hepica iinima ajishe je naahonderi, oue mu dipagera naanzija ontana ndjo ho ondoka.

³¹ Nde she ta ti ku he: Mumuandje, arushe ua ri pu ngaje, ajishe mbi ndi na, ojohe.

³² Ndere shika otsho opara, sho tua ninga otshituci tshenjanju, oshoka nguka, omumuanjoko, okuaj’a sa, ndere a ninga omunamuenjo, okuaj’a kana, ndere a monikua itshee.