Lukas 14 - Etestemente Epe ✠ 1951

ONTOPORUA 14. Jesus potshiriro tshomufariseji.

¹ Jesus sho e ja megumbo rjomukuruntu guaafariseji mesabata, a ka rje na he, je mu tara ontongorora.

² Nde tara, omuntu a rara keempadi de, ta arukua otshizinda.

³ Jesus ta pura aanongo jomambo naafariseji: Otshu uka tuu okuerukica mesabata nenge aaue?

⁴ Jo ja muena. H’ote mu njenge, te mu erukica, nde te mu rareke a he.

⁵ Nde ta popica itshee mbeja, te ja pura: Ore guo mu ne e nondongi nenge ongombe ha guira momucima, ite hi shiri mo ando mesabata?

⁶ Itaa vuru okujamukura tsha.

⁷ H’ota rombuere ano aantu, mba ji icanua, ejere, sho e ja mono, taa kongo iipundi jotango, nde ta ti ku jo:

⁸ Nge tu icanua kotshituci tshohango, ino kaatumba kotshipundi tshotango, kapu ninge, ng’opena gumue e ku vure a hicanua.

⁹ Ngu e mu icana amushe jaari, ngeno te ja e ku rombuere: Engena po u pe nguno otshipundi shi. Nde nguee to ka kaatumba keesha ua s’oshoni.

¹⁰ Ndere ng’oui icanua, inda, kaatumba kotshipundi tsho keesha, opo omushiji, ng’e ja mo, e ku rombuere: Kuume, engena ko komesho, ngueje ua simanekua momesho gajeshe, mba ji icanua.

¹¹ Oshoka keshe tuu ngu ti inenepeke, ota tshonopekua, ngu ti itshonopeke, ota nenepekua.

¹² Nde ku ngu e mu icana, ta ti: Nge to tura po omusha nenge uurarero, ino shij’ike ookuume nenge aamuanjoko nenge jakueni nenge aatshiinda aajamba, kaa ku shijurure, je ku fute.

¹³ Ndere nge to shiji otshiriro, icana aaheheri niingonue niirema naaposi.

¹⁴ Nde nguee to kara u nerago, oshoka itaa vuru okukufuta, nguee to ka futua mejumuko rja mba ju uka.

Ejere rjotshituci otshinene.

¹⁵ Gumue po gua mba ji icanua, te tshu uvu, nde ta ti ku he: Omunerago ohe ngu ta ka rja motshirongo tsha Karunga.

¹⁶ He ta ti ku jo: Omuntu gumue okua tura po uurarero uunene, nde ta shiji aantu ojendji.

¹⁷ Ta tumu omupija gue potundi huurarero, a ka rombuere aashijua: Ireni, ajishe oja rongikidua nokuri.

¹⁸ Nde ajeshe taa tameke okuijageka: Gumue po ta ti ku he: Onda randa eputa, ondi nokuritara. Nde ku garikana, popira ndje.

¹⁹ Gumue po itshee ta ti: Onda randa eendjoko ntano deenani, ote hi ndi ke de ereke. Nde ku garikana, popira ndje.

²⁰ Mukuauo ta ti: Ondu ushika omukiintu, ano ite vuru okuja ko.

²¹ Nd’omupija ta garuka, to okororere muene gue ajishe. He muene okua geje, nde ta rombuere omupija gue: Enderera, u he neendjira nomapora gotshirongo, ngueje u ete mo eehepere niingonue naaposi niirema.

²² H’omupija ta ti: Muene, ajishe ja ningua ngashi ua rombora, ndere natango opu neshara.

²³ Nde muene ta rombuere omupija: Inda neendjira neengumbu, nde to ciminike aantu okuja mo, egumbo rjandje ri ude.

²⁴ Andi mu rombuere: Kakuna nande gumue guaarumentu, mba ji icanenue, ta ka makera uurarero uandje.

Erongo rjehididimiko.

²⁵ Aantu ojendji ja ri na he, nde te ja pungurukire, ta ti:

²⁶ Nge pu na gumue, ngu te ja ku ngaje, nde ina tonda she na hina nomukiintu naamuahina ajeshe nojana nomuenjo gue muene, otsho tuu ita vuru okukara omurongua guandje.

²⁷ Ngu iti itsike omutshigakano gue a randure ndje, ita vuru okukara omurongua guandje.

²⁸ Oshoka: ore mokati keni, ng’a hara okutunga ondjugo onde, ita kaatumba tango, a jarure ajishe, mbi a pumbua, nokutja nge ja guana okuhitunga po ciru ha pua?

²⁹ Aantu kaa mu njane, mba je uete nokutja okua tameka, ndere ita vuru okutsakanica ondjugo ndji.

³⁰ Ja tje nandekuri: Omuntu nguka a tameka okutunga, ndere okua njengua okuhishurica.

³¹ Nenge omukuaniirua oguni po, ngu ta hi a kondjice omukuaniirua omukuauo, he ina kaatumba tango a diradire nokutja ota vuru okutsakaneka naakuiita je omajovi omurongo nguijaka, ngu te ja naakuiita omajovi eemurongo mbaari.

³² Ng’ite tshi vuru, ndi tshi, ota tumu ko aatumua, manka nguija e ri kokure, e mu indire, ja kundacane ombiri.

³³ Tsh’otsho tuu kakuna mokati keni, ngu ta vuru okuninga omurongua guandje, ng’ina tonda ajishe, mbi e na.

³⁴ Omuongua otshinima otshiuanaua. Ndere omuongua ng’ogua z’uutouarero uago, otagu touarekua ue na tshike?

³⁵ Kagu kuacera ue meputa no mushosho, otagu ekeruashi ike. Ngu e nomakutsi kokuuva, nu uve ko.