Lukas 13 - Etestemente Epe ✠ 1951

ONTOPORUA 13. Omakumagido gokuidirurura.

¹ Momasiku ngano okua adikirua ku jamue, mba taa mu epururire, nokutja Pilatus okua dipagica aagalileji, manka taa gandja omagano gauo.

² Nde ta ti ku jo: Omua ruka, te ti, aagalileji mbono oja ri aarunde je vure aagalileji aakuauo ajeshe, morua shi ja mona iishuna ji cike mpono?

³ Aaue. Andi mu rombuere nduno, ng’itamu idirurura, na ne tamu ka sa ngashika.

⁴ Nenge omua ruka, nokutja mbejaka omurongo nuunutatu, mba ja guirua kondjugo ondeendeka mu Silo, nde tahi ja dipaga, ja ri nuurunde u vure mbu uajeshe mu Jerusalem?

⁵ Aaue. Andi ti itshee: Ng’itamu idirurura, na ne tamu ka sa ngashika.

⁶ H’ote ja rombuere uo ejere ndika: Omuntu guontumba okua zike mepja rje rjomavinju omukuju. H’okue ja ko, ta kongo ko iihimati, nd’ita mono tsha.

⁷ H’ota ti komurongi guepja: Tara, onda ninga eemuvo ndatu, nde ja ndi konge iihimati momukuju ngu, ndere inii mona tsha. Gu ka po. Otshike tagu epica ouara eshara?

⁸ Nde ta jamukura: Muene, gu eca omuvo gumue, manka andi ce, ndi gu ture uushosho.

⁹ Puamue tagu ki ima komesho, go gu keue po muvogari, ng’inagu ima.

Jesus te eruda omukiintu omukundi.

¹⁰ Mesiku rjesabata Jesus h’okua rongo mosinagoga.

¹¹ Nde tara, opua ri omukiintu gumue, ngu a ninga eemuvo omurongo nuunutatu e nombepo huunkundi, te ende a njongama, ita tshiua okuukirira.

¹² Jesus sho e mu mono, okue mu icana, e je ku he, nde ta ti ku he: Meme, ue eruka uuvu uohe.

¹³ H’ote mu tenteke eke rje, naanzija h’oku ukurira, nde ta amberere Karunga.

¹⁴ Nde muene guosinagoga okua geje, sho Jesus a panga mesabata. H’ota rombuere aantu: Omasiku oge ri kanekamue, omuntu mu ta rongo, omo mu ja, mui ipangice, ndere mesabata, ngere.

¹⁵ He Muene te mu jamukura: Ooneruado ne, ndi tshi, na ne ohamu piica mo ongombe nenge ondongi motshigunda mesabata, mu ke hi ugire?

¹⁶ Ndere omuna ngu gua Abraham, ngu a ri meemango da satana eemuvo omurongo nuunutatu, ita mangurururua mo ngeno meemango de mesiku rjesabata?

¹⁷ Sho e tshi ti shii, aatamaneki je ajeshe oja s’oshoni, ndere aantu ajeshe oja njanjikirua iironga iikumici ajishe, mbi a ninga.

Omeere gaari.

¹⁸ He ta ti: Otshirongo tsha Karunga otsha facana na tshike, tsho nandi tshe ereke na tshe?

¹⁹ Otsha fa omuma hotshinjapi, omuntu e hi kucire, nde te ke hi kuna motshikunino tshe. Ho tahi koko, tahi ningi omuti omure, nd’eedira do keguru tadi vururukua miitaji jago.

²⁰ Itshee ta ti: Andi ereke otshirongo tsha Karunga na tshee?

²¹ Tsho otsha fa ontaku, omukiintu e hi kucire, te hi rungu nuusira uiiherekero iitatu, sigo tahi pi ajishe.

Jesus itshee mu Jerusalem.

²² H’ote ende niirongo neemukunda, ta rongo aantu, nde tu uka ku Jerusalem.

²³ Gumue po ta ti ku he: Muene, mba taa hupicua, oja tshidir’ike nenge?

²⁴ H’ota ti ku jo: Kembadareni neenkondo adishe okupita motsheero tsha cinana, oshoka otii mu rombuere: Ojendji ja ara ngaa ja pite mo, ndere taa ka njengua.

²⁵ Muene guegumbo nge a pita mo, ota ke edira po omueero, nde ne tamu ka cikama pondje, tamu tameke okukonkora pomeero nokuigida: Muene, tu egurura. Ndere te ke mu rombuera: Kandi tshi mpo mua zi.

²⁶ Ne otamu ka tameka okupopja: Sse oombo, mba tua rire, sse tua nuine miipaci johe, nguee muene oue tu ronga meendjira detu.

²⁷ He one rombuere: Kandi tshi mpo mua zi, zii po pu ngaje amushe, jarunde ne!

²⁸ Oko taku kara eriragano nehikokoto rjomeego, nge tamu mono Abraham na Isaak na Jakob naaprofeti ajeshe motshirongo tsha Karunga, ndere ne mue ekeruashi.

²⁹ Jo taa ka za kuuziro no kuuninginino, kuumbugantu no kuumbandjantu, nde taa ka kaatumba kotshiriro motshirongo tsha Karunga.

³⁰ Nde tara, oomba aashugunini nena ojo taa ka ninga jotango, ndere jotango nena taa ningi aashugunini.

³¹ Esiku ndioka aafariseji jamue oje engene ku he, taa ti: Za po mpo u he kokure, oshoka Herodes a hara e ku dipage.

³² Nde ta ti ku jo: Indeni mu ka rombuere okaandje hoka: Tara, otandi tida mo eembepo eembuineji, ngaje andi erukica nena na ngura, mesiku etitatu otii ka ada keshuriro.

³³ Ndere nena na ngura na shera ondi nokuenda natango, oshoka itatshi ningi, omuprofeti a sire pondje ha Jerusalem.

³⁴ Jerusalem, Jerusalem, ngu ho dipaga aaprofeti, nde to mbanbanga uo nomamanja, mba taa ku tuminua, rungapi nda arere okugongera aanohe tsh’odira, tahi gongere uudirona koshi homauaua, nde ngueje ino tsha ara.

³⁵ Tareni, egumbo rjeni otamu ke ri cigirua ri ri ouara, ndere andi mu rombuere, itamu ka mona ndje ue sigo okesiku ndioka tamu ka tja: Na ambererue, ngu te ja medina rja Muene.