Lukas 12 - Etestemente Epe ✠ 1951

ONTOPORUA 12. Omakumagido gi iri na gi iri.

¹ Aantu ojendji sho ja gongara apeshe mpo, ja ratacan’ike, Jesus h’okua shimbike okuronga aarongua je: Angareni ontaku haafariseji, nokutja eruado rjauo.

² Oshoka inapu orama tsha, tshi itatshi ko oroka uo, itapu ningua tsha mofuci, shi itatshi ka tshiuika uo.

³ Shi mua popja meemurema, sho otatshi ku uvicirua muujerere, shi tamu popi momakutsi ike meni meendunda, sho otatshi ki igidua kombanda heendunda.

⁴ Otii mu rombuere, ne ookuume kandje: inamu tira mbeja, mba taa dipaga ouara orutu, ndere komesho ja njengua okuninga tsha.

⁵ Ndere nda ara ndi mu urukire ngu mu nokutira: tireni, ngu ta vuru, sho a dipaga, okuumbira uo moheri. Eno, andi mu rombuere, oh’ike ngu tireni.

⁶ Omandjua gaari itaga randua ouara nani nomapeni gaari? Ndere Karunga ka dimbua nand’orimu’ike po.

⁷ Nomafufu go meemutse deni ageshe oga jarurua. Inamu tira ano, oshoka ne omu vure unene omandjua ogendji.

⁸ Otii mu rombuere: Keshe ngu to okorora ndje paantu, nOmuna guOmuntu ote ke mu okorora miipaci jaajengeli ja Karunga.

⁹ Ndere ngu ti idimbike ndje paantu, ota ki idimbikirua miipaci jaajengeli ja Karunga.

¹⁰ Nde keshe ngu ta popi ohapu, ndji ha toga Omuna guOmuntu, ota ka diminua po ngaa, ndere ngu ta tsheke Ombepo Ondjapuki, ita diminua po tshivarerue.

¹¹ Nge taa mu fara meesinagoga no komarenga no kaakuaniirua, inamu mbandara, shi tamu ka jamukura nenge ongiini tamu ka popja.

¹² Oshoka Ombepo Ondjapuki otahi mu rombuere ngaa petango ndioka shi tamu popi.

¹³ Gumue a zire mongundu haantu, te mu garikana: Muongi, rombuera mumuameme a topore na ngaje uuciga.

¹⁴ He ta ti: Mentu nguee, ore a tura ndje po, ndi ninge omupanguri, ngaje omutopori guuciga ueni?

¹⁵ Nde ta rombuere aantu ajeshe: Tareni, ne mu angere oruisho, oshoka nando omuntu e nerooro, omuenjo gue kagu neue kiinima je.

¹⁶ Mpa h’ote ja rongo nejere, ta ti: Omuntu omujamba okua ri e nepja, ndi ri niirja ojindji.

¹⁷ Ti ipopire momuenjo gue: Ngashiingika ote ningi tshike? Kandi nomashisha okupungura iirja jandje.

¹⁸ Nde ta ti: Otandi ningi ngii: ote teja po omashisha gandje, nde te tungurura po ge vure nga. Muka omo nduno ndi ture iirja jandje niinima jandje ajishe.

¹⁹ Nga’te rombuere nduno omuenjo guandje, te ti: Muenjo guandje, nena oua pungura iinima ojindji ja guana eemuvo odindji. Vururukua, rja, nguee to nu, nguee to kara ku na mbudi ha tsha.

²⁰ Nde Karunga te ke mu rombuera: Raji nguee, uusiku ngaa mbu to ka purua omuenjo guohe. Iinima johe, mbi ua pungura, jo komesho otaji ka ninga ja re nduno?

²¹ Otsho uo ngaa ngii tatshi ningua omuntu, ngu ti igongere omariko, he ke shi omujamba pu Karunga.

Iimpuju jouara.

²² Nde kaarongua je ta ti: Ano andi mu rombuere, inamu kara mua mbandara keemuenjo deni, nokutja otamu ri tshike nenge korutu nokutja amu zara tshike!

²³ Omuenjo ogu vure eendia, norutu oru vure eenguuo.

²⁴ Tareni omakora, kaga kuna, kaga teja, kage neendunda nomashisha, ndere Karunga ote ga paruca. Ne omu ga vure pu cike peni?

²⁵ Ore mokati keni ta vuru okuguedera ko, nand’ona kembadara, keevura de di ninge odindji?

²⁶ Ndere nge hamu njengua kiinima mbi iitshonatshona, otshike mua mbandarera iikuauo?

²⁷ Tareni omanjanganjanga, shi taga mene. Kaga ronga, go kaga tunga, ndere andi mu rombuere: na Salomon muene muurenga ue aushe ka ri a zarekua ngashi rimue po.

²⁸ Karunga, ngu ha zareke ngii omuidi, ngu gu ri nena meputa, nde ngura tagu umbirua meziko, ne ote mu zareke nduno unene mu gu vure, janenguni mehiteero ne.

²⁹ Ano inamu pura ue: otatu ka rja tshike, ss’atu nu tshike, inamu kara niimpuju jouara.

³⁰ Oshoka ajishe mbi aapagani ojo haa kongo; Sho oku tshi mbi mua pumbua.

³¹ Ndere komesho gajishe kongeni otshirongo tshe nehuko rje, jo ajishe iikuauo onamu ji guederua po ouara.

³² Ino tira, tshinkoti otshitshona nguee, oshoka Sho a hara e mu pe uukuaniirua ue.

³³ Randiceni po atshishe shi mu na, ne mu gandje omagano na tsho. Iningireni uupunda, mbu kau kurupa, neriko meguru, ndi kari shura po, mu itamu ja aafuci, mo itamu tuku ontuko.

³⁴ Oshoka hu ku na eriko rjeni, eemutima deni oko uo di ri. Kareni mua taatara.

Kareni mua taatara.

³⁵ Kareni mua zara omapaja miija jeni, neenjeka da samekua di kuateni miikasha jeni.

³⁶ Opo mu f’aantu, mba ja tegerera muene, nge ta garuka a he kohango, nde ne, nge te ja ta konkora, mu mu egururire nzijanzija,

³⁷ Aapija aanerago oombo, mba muene ta ada pokuja kue, ja taatara. Tshiri, andi mu rombuere, h’oti izareke, te ja kaatumbike kotshiriro, nde te ja jakura.

³⁸ Nge te ja uusiku nenge ongura onene, nde te ja ada po ngii, oje nerago aapija mbo.

³⁹ Ndere tshiueni uo, muene guegumbo ngeno kua e tshi otundi, mu hamu ja aafuci, ando ta kara tshiri a taatara, egumbo rje kari ruue po.

⁴⁰ Ano kareni uo mui irongikida, oshoka Omuna guOmuntu one ja potundi, ndji kamu tshi.

⁴¹ Petrus h’ote mu pura: Muene, omeere gano oto ge epururire sse ike nenge uo aantu ajeshe?

⁴² Muene ta ti: Oguni po ano omurangeri guegumbo omudiginini homunandunge, ngu a turua po ku muene a pangere aapija je, opo e ja pe iiparuca, je je erekerua, pecimbo euanaua?

⁴³ Omunerago tshiri omupija, ngu ta adikua po, ta rongo ngii pokuja kue.

⁴⁴ Tshiri, andi mu rombuere, ote mu ningi erenga rj’ iinima je ajishe.

⁴⁵ Ndere omurangeri nguija, ngeno ti ipopire momuenjo gue: Muene guandje ite ja nzija, nde ta tameke okudenga aapija je aarumentu naakiintu, ta ri, he ta nu, nde ta korua.

⁴⁶ Tshiri, muene guomurangeri nguija mesiku rjokuja, ng’ine mu tega no potundi ndji ke tshi, one mu shashara, nde te mu pe otshipeua tshe mu mbeja, mbi inaji iteera.

⁴⁷ Ndere omupija, ngu a tshiua eharo rja muene, ndere ini irongikida, he ina ronga keharo rje, ona peua omadengo ogendji.

⁴⁸ Ndere ngu ke ri tshi, nde a ronga shi tshe ereka okudengu’ike, ita ka mona egeero enene ndija. Ku keshe ngu a peua otshindji, otshindji uo natshi ka purua, na ngu a peua erooro, ote ri pangurirua uo, e vure nguija.

⁴⁹ Onde ja, ndi dogere omuriro muujuni, ano nda ara uo gu ririme mo.

⁵⁰ Ondi nokutshatshua netshatsho, rjo tari ciminika ndje ri guanicue.

⁵¹ Omua ruka ngeno, ngaje onde ja ndi etere uujuni ombiri? Aaue, andi mu rombuere, etopokacano tuu.

⁵² Oshoka okuza konena jatano taa ka kara megumbo rimue ja topoka, jatatu na jaari, jaari na jatatu.

⁵³ She a topoka nomona omumati, nomona a topoka na she, otsho ngii hina nomukadona nomukadona na hina, hinamueno notshitenjua notshitenjua na hinamueno.

⁵⁴ H’okua rombuere uo aantu, ta ti: Nge tamu mono otshikogo atshi piti kuuninginino, ohamu ti nzija: Ovura otahi ja, tsho otsho ngaa.

⁵⁵ Nge tamu uvu ombepo tahi zi kuumbugantu, ohamu ti: Uupju au ja, tsho otsho ngaa.

⁵⁶ Ooneruado ne, mu tshi okutokora okutara keguru nuujuni, ndere okunongera erara ndika otshike kamu ku tshi?

⁵⁷ Otshike itamu tokora uo mu ne ojene shi tshu uka?

⁵⁸ Nge to hi nomutondi guohe komupanguri, kembadara mondjira u tshiue okuijageka, opo ke ku fare komupanguri, nd’omupanguri te ku gandja ngeno komupija, nd’omupija, te ku edirira meemango.

⁵⁹ Andi ku rombuere, muka ito zi mo ue, manka ino futa okapeni okashugunina.