Lukas 11 - Etestemente Epe ✠ 1951

ONTOPORUA 11. Jesus ta rongo okugarikana.

¹ Uunarumue Jesus okui ire keshara rimue okugarikana; sho a dimbuka, gumue guo maarongua je te mu indire: Muene, tu ronga okugarikana, ngashi uo Johannes e tsho ongere aarongua je.

² H’ota ti: Nge tamu garikana, popjeni otshongii: Tate, edina rjohe nari japurue, uukuaniirua uohe nau je ku sse.

³ Okurja kuetu kuomasiku ageshe tu pa uo nena.

⁴ Tu dimina po eendjo detu, ngashi uo sse hatu dimine po aanandjo na sse ajeshe, ngu’ino tu ecera momamakero.

⁵ Mpa h’ote ja rombuere uo: Tu itareni, gumue po pu ne oku na kuume ke, ta hi ko ku he uusikusiku, nde te mu indire: kuume, kuaca ndje eeshima ndatu,

⁶ Oshoka ondi na kuume kandje omuenda, e ja ku ngaje, nde kandi uete, shi andi mu pe.

⁷ Ndere nguija meni ta jamukura, ta ti: Eca ndje ngaje, otsheero otshe edirua nare, nde naanandje oja koca mu ndi ri, ite vuru okupenduka, ndi je ndi ku pe.

⁸ Ndere ita zi po, ota kara ngaa ta konkora. Andi mu rombuere: ng’ita penduka e mu pe moru uukuume, ndere ta ka penduka morua shi a kara ti indire a hididimika, e mu pe shi a pumbua.

⁹ Tsh’otsho ngaje otii mu rombuere: Indireni, nd’otamu peua, kongeni, nd’otamu mono, konkoreni, nd’otamu egururirua po.

¹⁰ Oshoka keshe ngu ti indire, ota peua, ngu ta kongo, ota mono, ngu ta konkora, ote egururirua po.

¹¹ Ore go opu ne ta peua ando emanja ku she, nge te mu indire oshima, nenge ejoka peshara rjoshi, nge te mu indire oshi?

¹² Nenge nge ti indire ehi, she ote mu pe ando ondje?

¹³ Otsho ngii ne nando aahineji, ohamu pe ngaa aana jeni omagano omaanaua, unene u cike peni Sho ho meguru te ja pe ombepo ombuanaua, mba taa mu indire.

Aafariseji taa tsheke Jesus.

¹⁴ He nokua tida mo ombepo ombuineji, ha sit’eui; sho a tida mo ombepo ombuineji, omuntu, ngu a ri a sit’eui, okua popi nduno, jo aantu oja kumua ko.

¹⁵ Ndere jamue jo mu jo taa ti: Omeenkondo da Belzebub, erenga rjeembepo eembuineji ta tidica mo eembepo eembuineji

¹⁶ Nde jamue jo mu jo taa mu makere, jo taji indire ku he edidiriko, ndi tari zi keguru.

¹⁷ Ndere sho a dimburura omadiradiro gauo, h’okua ti ku jo: Keshe tuu otshirongo, shi tshi inene ondumbo tshojene, otatshi shanagurua, negumbo rimue otari guire mekuauo.

¹⁸ Ano, satana ng’oku nondumbo na he muene, otshirongo tshe otatshi ka kara po ngiini, oshoka ohamu ti: ngaje ote tidica mo eembepo eembuineji meenkondo da Belzebub?

¹⁹ Nitshee, ng’otandi tidica mo eembepo eembuineji meenkondo da Belzebub, nani omeenkondo da re aana jeni taa di tidica mo? Ojo ano taa ka ninga aapanguri jeni.

²⁰ Ndere ng’otandi tidica mo eembepo eembuineji meenkondo domunue gua Karunga, nena otshirongo tsha Karunga otshe ja ku ne.

²¹ Ofuure nge ta rangere egumbo rje niikuti, nena ajishe ja mo oja gamenua.

²² Ndere gumue, ngu e mu vure meenkondo te ja, nde te mu sindi, he te mu kuca iikondjico je, mu a hinekera, nde ta topora ajishe mbi a kuata.

²³ Ngu ke ri puamue na ngaje, oku nondumbo na ngaje, ndere ngu ita gongere puamue na ngaje, ota sharakanica po.

²⁴ Ombepo ombuineji, nge ha tidua momuntu, ho otahi endagur’ike meembuga, hi konge eshara rjevururuko, ndere shi itahi ri mono, otahi ti: Onda ara ndi tshune metsari rjandje, mu nda zire.

²⁵ Sho tahi ja, otahi ri ada rja kombua, rjo rjo opekua nuurenga.

²⁶ Tahi ja tahi hi, h’otahi ke etere ko eembepo uunuaari di iri, di hi vure, do tadi hi mo nokukara mo, nd’iinima joshugunina jomuntu ngu otaji ningi iihineji ji vure mbijaka jotango.

²⁷ Mank’e ri te tshi popi, omukiintu, ngu e ri mokati kaantu, ti igida, ta ti: Era, ndi rje ku umbata, ori nerago, nomagundji uo, nga ua jama.

²⁸ Nde ta jamukura: Eno tuu, aanerago tshiri oombo, mba haa huvu ohapu ha Karunga, jo taa hi diginine uo.

²⁹ Aantu sho ji igongere pu he, h’okua ti ku jo: Orudi nduka oruineji, ruo taru kongo edidiriko, ndere itaru ri ningirua, shira edidiriko ndija rja Jonas omuprofeti.

³⁰ Ngashi ngaa Jonas a ningirirue aaninivita edidiriko, otsho tuu Omuna guOmuntu ta ningi edidiriko rjorudi ndu.

³¹ Omukuaniirua omukiintu guo kuumbugantu ota ka cikama mepanguro okupangura aarumentu jorudi nduka, e ja tokorere ondjo, oshoka okua ri a zi keesha duujuni okupuakena uunongo ua Salomon, ndere tara, mpa opena gumue e vure Salomon.

³² Aarumentu jo mu Ninive otaa cikama mepanguro norudi nduka, je ru tokorere ondjo, oshoka oja ri ji idirurura keehapu da Jonas, ndere tara, mpa opena gumue e vure Jonas.

³³ Kakuna ngu ta sameke onjeka, nde te hi fara mekororo nenge mesinguriro, aaue, okombanda hongudi tuu, hi minikire ajeshe, mba taa hi mo.

³⁴ Uujerere uorutu ruohe ouo esho rjohe. Esho rjohe ano ng’inari jonua mo, nena orutu ruohe arushe oru nuujerere, ndere esho rjohe nge rja jonua mo, orutu ruohe oru neemurema.

³⁵ Ou kotokera ano, uujerere, mbu u ri mu nguee, kau tshituka eemurema.

³⁶ Ndere ano orutu ruohe ng’orua jera ciru, kamu neemurema mu ruo, otaru kara rua jera unene, ngashi ngaa ngeno uujerere uoruadi ue ku shandjera.

³⁷ Mank’e ri ta popi dika, omufariseji gumue te mu indire, a ka rje omusha na he. H’ota hi mo, nde ta kaatumba potshiriro.

³⁸ Omufariseji sho a mono, ngu ini ikosha tango pokurja, okua kumua ko.

³⁹ Muene h’ote mu rombuere: Ano nduno, ne aafariseji, ohamu kosho ehoro notshijasha kombanda, ndere meni rjeni omu uda uumbudi nuumpuru.

⁴⁰ Marai ne, nani ngu a ninga shi tsho kombanda, ina ninga uo shi tsho meni?

⁴¹ Gandjeni ike omagano ga za mu mbi ju upa ko, nd’ajishejishe taji kara ku ne ja jera.

⁴² Ndere ojeeje ku ne, jafariseji, ohamu futica otshitimurongo tshiiganga no tshiimeno jomavinju no tshomboga keshe, ndere otshipango nohore ho ku Karunga hamu togo ouara. Omuntu na ronge tshimue, shijaka ke tshe ece.

⁴³ Ojeeje ku ne, jafariseji, mbo mu ore okukaatumba kiipundi jotango meesinagoga nokukundua motshirandero.

⁴⁴ Ojeeje ku ne, mbo mua f’eembira, di kadi monikua, nd’aantu taa hende ouara kombanda hado, jo kaa tshi tshi

⁴⁵ Omurongi gumue guotshipango ta ti: Muongi, ng’oto popi shika, oto tu dini uo sse.

⁴⁶ Nde he ta ti: Ojeeje ku ne, jarongi jotshipango, oshoka ohamu umbatica aantu eemutenge eemudigu, jo itaa vuru okuduumbata, ndere ne ojene kamu njenga eemutenge nand’ononjara himuike.

⁴⁷ Ojeeje ku ne, mbo hamu tungire aaprofeti eembira domamanja, ndere oosho je ja dipaga.

⁴⁸ Tshiri, otsho hamu okorora nokutja mui ininga tshimue niironga joosho, oshoka mbono oje ja dipaga, ndere ne tamu ja tungire eembira.

⁴⁹ Ano uunongo ua Karunga oua popja shii: Ote ka tuma aaprofeti naapostoli ku jo, nde taa ka dipaga jamue jo mu jo nokutidagura aakuauo.

⁵⁰ Opo orudi nduka ru ka purue ombinzi haaprofeti ajeshe, ndji ha tikire okuza ketameko rjuujuni.

⁵¹ Okuza kombinzi ha Abel sigo okombinzi ha Zakarias, ngu a dipagererue mokati kohaltari nontempeli. Tshiri, andi mu rombuere, ho otahi ka purua korudi nduka.

⁵² Ojeeje ku ne, jarongi jotshipango, oshoka omua kuca oshapi huunongo, ndere ne ojene inamu ha mo, nde tamu kerere uo, mba ja ara okuha mo.

⁵³ Sho e tshi popja ku jo, aafariseji naarongi jotshipango oja shimbike okumucemenena, taa jogere neehapu, he ku uvikue ue.

⁵⁴ Ndere ja ara uo okumupundukica, ja kuate ohapu mokana kue, opo ja tshiue okumumonica ondjo.