Lukas 10 - Etestemente Epe ✠ 1951

ONTOPORUA 10. Etumo rjaarongua 72.

¹ Mpa Muene h’oto ogorora mo aarongua eemurongo uunuari na jaari ji iri, mba te ja tumu kojaarijaari miirongo no meemukunda adishe, hu a ri a hara okuha muene.

² He ta ti ku jo: Etejo enene, ndere aarongi aatshona. Indireni ano Muene guetejo, a tume aarongi mepja rje.

³ Indeni! Tareni, andi mu tumu mua f’eenzigona mokati komambungu.

⁴ Inamu umbata ompunda nenge ondjepera nenge eengaku; inamu kunda aantu meendjira.

⁵ Ng’omua ka ha megumbo rimue, omu popica mo otshiingii: Ombiri nahi kare megumbo ndika!

⁶ Nge tamu ada mo omunona guombiri, ombiri heni otahi ri nambere ngaa. Ndere nge kamu na, ho tahi tshuna ngaa ku ne.

⁷ Ndere kareni megumbo ndio, mu rje, ne mu nue, shi je na, oshoka omurongi okuo oparera ondjambi he. Inamu ondjereka kumue omagumbo.

⁸ Mpo tamu hi momukunda, nd’aantu taa mu tuumba, rjeni shi taa mu pe.

⁹ Erukiceni aavu ja mo, ne mu tje ku jo: Otshirongo tsha Karunga otshe mu ada.

¹⁰ Nde nge mua ka ha momukunda gumue, nd’aantu taa mu tuumba, zii mo moka, mu he mompora, mu tje.

¹¹ Ontsirera, ndji hi ikuatera keempadi detu momukunda gueni, otatu hi itshiki keempadi detu, ne mu tshiue, nokutja, otshirongo tsha Karunga otshe mu ada.

¹² Otii mu rombuere: Sodoma otatshi kara shuepo mesiku ndijaka tshi vure omukunda nguka.

¹³ Ojeeje ku nguee, Korozain, jeeje ku nguee Bethsaida, ngeno kua iirongankondo ja ningirua Tirus na Sidon, mbi mua ningirua, ando ji idirurura nare nokukaatumba meeshako no momutoko.

¹⁴ Tshiri, Tirus na Sidon otaji ka mona egeero kari shi edigu nga ndika rjeni mepanguro.

¹⁵ Ndere nguee, Kafarnaum, ngu ua jerucua sigo okeguru, sigo omuii moheri to ku undurirua mo.

¹⁶ Ngu te mu uvu, otu uvu ndje, ngu te mu dini, ota lini ndje uo; ndere ngu ta dini ndje, ota dini uo ngu, ngu a uma ndje.

¹⁷ Esiku rimue, mbejaka eemurongo uunuaari na jaari ja garuka nenjanju, jo taa ti: Muene, neembepo eembuieji otadi vurika ku sse medina rjohe.

¹⁸ He ta ti: Onda mona satana, ta gu meguru ong’ruadi.

¹⁹ Tareni, onde mu pe eenkondo dokurata omajoka eendje nokupangera eenkondo adishe domutondi, kapena hi tatshi mu ningi otshiponga.

²⁰ Ndere inamu njanjukirua shoka eembepo tadi vuria ku ne, aaue, njanjukirueni shii, oshoka omadina geni taga kara ga tshangua meguru.

²¹ Petango ndika Jesus okua njanjukua pombanda nOmbepo Ondjapuki, ta ti: Tate, Muene gueguru nevi, otii u amberere, oshoka aanongo neenkurungu oue tshi jo orea, ndere ue tsho ororera mba aashupi. Eno, Tate, otsho opaa pu nguee.

²² Ajishe onde ji peua ku Tate, kapuna ngu e tshi, mona nokutja ore, oTate ike tuu, po kapuna ngu e tshi, ate nokutja ore, Omona ike, na ngu Omona a hara nduno tshi mu okororere.

²³ H’ota taarere itshee kaarongua je, ta ti: Omesho ge nerago, nga ge uete shi mu uete.

²⁴ Oshoka otii mu rombuere: Aaprofeti ojendji naakuairua oja jeerukirire okumona shi mua mona, ndere inaa hi mona, nokuuva shi mu uva, ndere inaa tshu uva.

Omusamarita omunesiroshenda.

²⁵ Nde tara, omurongi guotshipango te engene ku he, mu makere, ta ti: Muongi, nandi ninge tshee, ndi ciguruomuenjo guarushe.

²⁶ Jesus h’ote mu pura: Mompango okua tshangua ngiioto resha ngiini?

²⁷ Nde ta jamukura: Ora Karunga kohe, mu ora nomutima agushe neenkondo adishe nomadiradiro ageshe, na mukueni ngashi ui ihore muene.

²⁸ Ta ti ku he: Oua popja tshu uka, otsho tuu ninga, nde to ka kara nomuenjo.

²⁹ He nguija ta ara okuinoma i iuete nduno anuua a huka, h’ota tsikire, ta pura Jesus: Mukuetu ore?

³⁰ Jesus ta jamukura: Omuntu guontumba okua zire ku Jerusalem, ta hi ku Jeriko, nde ti itsu miimpuru. Jo taji mu naka atshishe, taa mu panda eembore, nde taa hi, je mu ciga e nokamuenjo okatshona.

³¹ Ano tshe ki ihada, omupristeri gumue a hire nondjira oho ndji, te mu mono, nde te mu pitirire.

³² Konima tapu ke ja omulevita, te mu mono, nde na he uo ta pitirire po.

³³ Tapu ke ja omuenda omusamarita, te mu mono, nde te mu jeerere.

³⁴ H’oti i po, ta tira omagadi nomavinju miiraro je, he te ji manga. H’ote mu tura kokanamakutsi ke, te mu fara kondunda haahenda, nde te mu jakura.

³⁵ Ngaangura h’ota kuca mo eendenari mbaari, te di gandja ku muene guondunda, nde ta ti: Mu jakura manka, shi to manene mu he, otii ja ndi tshi fute, nge nda garuka.

³⁶ Ano oto ti ngiini: Oguni po pu jatatu mbano, ohe mukuauo gua nguija, ngu a ri a hitsa miimpuru?

³⁷ He nguija ti i mo, ta ti: Mukuauo ohe nguija, ngu a ri e nesiroshenda na he. He Jesus ta ti: Inda, nde to ningi nga tshikuauo.

Jesus pu Marta na Maria;

³⁸ Tsha ningi, sho ja hi, h’okue ja mokakunda kamue. Omukiintu, edina rje Marta, te mu tuumba megumbo rje.

³⁹ H’oku na uo omumuahina, edina rje Maria. Ngu a kaatumba peempadi da Muene, he ta puakene eehapu de.

⁴⁰ Ndere Marta okua pja kiidirua nokuri okumujakura, te engene ko, ta ti: Muene, ito pukurura ko nandoodiro, mumuameme te ecere ndje iironga jejakuro, ongaj’ike ngaa? Mu rombuera nduno a kuacere ndje.

⁴¹ Nde Jesus ta jamukura mo: Marta, Marta, ou notshisho miinima ojindjijindji.

⁴² Ndere tshimuike tsha pumbua po. Maria okui ihogororera po ombinga ombuanauarera, ndji ite hi kucua nande.