Kaaroma 9 - Etestemente Epe ✠ 1951

ONTOPORUA 9. Ehogororo rjotshiguna tsha Israel

¹ Otandi popi otshiri mu Kristus, ite popi iirombo, nehuvo rjandje rjomutima otari popirendje muujerere u’Ombepo Ondjapuki.

² Uupongo uandje uunene tuu, ngaje ndi nomeehamo ogendji momutima guandje.

³ Ngaje muene onda ara ndi cingue, kandi na ue Kristus, peshara rjaamuameme, mbo aakuazimo jandje panjama.

⁴ Omboka aaisraeli, ja ningire aana ja Karunga, ehadimo, eguaneno ompango, erongerokarunga, nomarombuerero ogauo.

⁵ Ootate ohauo. Mu jo mua zi Kristus opanjama, ngu e ri kombanda hajishe, oKarunga, he na simanekue arusherushe Amen.

⁶ Ndere shoka itatshi ti, nokutja ohapu ha Karunga inahi guanicua, oshoka kaje shi aaisraeli ajeshejeshe, mba ja zi mu Israel.

⁷ Otsho uo oruvaro rua Abraham kaje shi ajeshejeshe aana je. Otsha tiua: Mba ja zi mu Isak, ojo taa rukua oruvaro ruohe.

⁸ Nokutja ojana jopanjama kaje shi aana ja Karunga, aaue, aana jomarombuerero taa tarua ng’oruvaro rue.

⁹ Oshoka eehapu domarombuerero odo di: “Opecimbo tuu ndika tandi ke ja, nde Sara ta ka kara emokamati.”

¹⁰ Ka tsha ri ngiino na nguka ike, aaue, otsha ri uo ngiino na Rebekka, ngu a ninga omusimba komurumentu gurue, tate hetu Isak.

¹¹ Aanona je manka kua inaa varua, inaa ninga uuhanaua nenge uuhineji, — opo ehuco rja Karunga ri ze meharo rje.

¹² Kari ze miironga, aaue, omeharo rjomuhicani, — a rombuererue:

¹³ Omukuruntu ota rongere onkero, ngashi tsha tshangua: “Jakob ondi mu ore, ngaje nda tonda Esau.”

¹⁴ Otatu ti ngiini ano? Mu Karunga omu nuugojoki nani? Tshivarerue!

¹⁵ Oshoka okua rombuerere Moses: “Otandi ka sir’oshenda ngoka te sire oshenda, Otandi ka gandja ondjeerera ku ngoka te pe ondjeerera.”

¹⁶ Ano okuara nokumatuka kuetu kaku notshironga, aaue, esiroshenda rja Karunga.

¹⁷ Otsho tsha popirue nare ku Farao moramata: “Ngueje ue tshi icanenua, ndi urukire eenkondo dandje mungueje, edina rjandje ri uvicue muujuni aushe.”

¹⁸ Ano ohe ta sire ngoka a hara oshenda, he ta kukutike ngoka a hara.

¹⁹ Ngueje ano oto purandje: Otshike nduno te tu geere? Ore ta vuru okutinda eharo rje?

²⁰ Muntu ngueje, ngueje omukuatshee, sho ua ara okuumana na Karunga? Otshitshitua otatshi vuru okupura omutshiti guatsho: Otshike nduno ua tshitandje ngii?

²¹ Nenge omurongi guiijuma ke na eenkondo deharo rje meroua, he a ronge meroua ndika rimue otshijuma tsh’oparerera tshi nuurenga, notshijuma otshikuauo katshi nehoparo?

²² Karunga, sho kua a hididimike nonteni ohindji iijuma jondjashi, mbi j’oparera okujonua po, okua ara okuorora mu jo ondjashi neenkondo de.

²³ Ndere miijuma jesiroshenda rje, mbija a rongekidire ehadimo rje, okua ara okuorora uujamba uehadimo rje.

²⁴ Otsho e tu icana, ha maajuda ike, aaue, nomaapagani uo.

²⁵ Ngashi ta popi uo mu Osee: “Ond’ara okuruka otshiguana tshandje, shoka ka tsha ri otshiguana tshandje, omuhorike guandje, ngoka ka ri omuhorike guandje, nakusiruoshenda, ngoka kua ri ina sirua oshenda.

²⁶ Ponima mpoka ja rombuerua: “Kamu shi otshiguana tshandje,” opo mpoka taa zi okurukua aana ja Karunga omunamuenjo.

²⁷ Isaias oku’igidire ta popi Israel: “Ngeno okua omujaru guaana j’Israel gu cike pehekevi rjokefuta, ando otshihupe ike tatshi k’upicua.

²⁸ Oshoka ota guanica ohapu he nzijanzija muujuki ue. Eno, Muene ota ka guanica nzija ohapu he kombanda hevi.”

²⁹ Otsho uo Isaias a shunganekere a tire: “Ngeno okua Muene gueengundu daakuiita ine tu cigira otshihupe, ando tua ningi tua fa Sodoma, no tua ningua ngashika Gomorrha.”

³⁰ Otatu ti ngiini nduno? Aapagani mba inaa rarakanena uujuki, oja mon’uujuki, nokutja uujuki uomehiteero.

³¹ Ndere Israel okua rarakanena ompango huujuki, ina mona ompango huujuki.

³² Otshike? Oshoka inaa hara ku u mona meenkondo dehiteero, aaue, omeenkondo diironga jauo. Oj’ipuma kemanja rjepunduko.

³³ Ngashi etshangua rja tire: “Tara otandi tura mu Sion emanja rjokuipuma, nemanja rjepunduko. Ndere keshe ngu e mu iteera, ita ka kana.