Kaaroma 8 - Etestemente Epe ✠ 1951

ONTOPORUA 8. Ekuaco rjoshenda ha Kristus.

¹ Nena nduno kapu neshunduro ue rja mboka je ri mu Kristus Jesus, kaa vurika kuuharu uonjama.

² Oshoka otshipango tshombepo ndji tahi tu pe omuenjo mu Kristus Jesus, otsha mangururandje kotshipango tshuurunde no tsheso.

³ Shoka tsha njenga ompango, sho ha ri kahi neenkondo monjama, otsha rongua ku Karunga: Okua tuma Omona gue morupe ruonjama huurunde no moru’uurunde, he a pangura uurunde monjama he.

⁴ Otsho pua guanicua musse eharo rjompango, sho katu enda ue panjama, aaue, opambepo.

⁵ Aakareri jonjama ohaa kongo shoka tsh’oparera onjama. Aakareri jombepo haa kongo shoka tsh’oparera ombepo.

⁶ Eenkembadaro donjama odo eso, eenkembadaro dombepo odo omuenjo nombiri.

⁷ Oshoka eenkembadaro donjama odi nondumbo na Karunga, itadi vurika kompango ha Karunga, nde itadi vuru oku tshi ninga.

⁸ Aakareri jonjama kaa pandikua ku Karunga.

⁹ Ne kamu shi ue aakareri jonjama, aaue, ojombepo, nge omu na ombepo ha Karunga meemtima deni. Keshe ngu ke nombepo ha Kristus, ohe ke shi gue.

¹⁰ Ndere Kristus nge oku ri mune, nena tshiri orutu aru kara taru si moru’uurunde, nde ombepo oho omuenjo moru’uujuki.

¹¹ Na nge ombepo ha ngu a jumuda Jesus kuusi, hi ri mune, nena ngu a jumuda Jesus Kristus kuusi, ota ka jumuda uo komuenjo omarutu geni omasi moru’ombepo he ndji hi ri mune.

¹² Ano jamuameme, katu shi aanankuma jonjama, sse tu kare po panjama.

¹³ Oshoka nge tamu kara panjama, omu nokusa. Ndere uuharu uorutu, nge tamu u dipaga nombepo, otamu kara mu nomuenjo.

¹⁴ Oshoka ajeshe mboka haa hendicua kombepo ha Karunga, ojo aana ja Karunga.

¹⁵ Oshoka ne inamu peua ombepo huupika, mu kare itsheue muumbanda, aaue, omua peua ombepo ndji hahi mu ningi ojana, mu ndjoka hatu igida: Abba tate.

¹⁶ Ombepo oho hene tahi okororere ombepo hetu nokutja osse aana ja Karunga.

¹⁷ Ndere nge ojana, nena aacigururi uo, aacigururi ja Karunga, ss’aacigururi puamue na Kristus. Nge atu ididimike na he, ss’atu ka adimicua uo puamue na he.

¹⁸ Ngaje ondi tshi: Omeehamo guujuni uonena kage tshi kuerekua nehadimo ndjoka rjokomesho tari k’oroka musse.

¹⁹ Oshoka iitshitua ja tegerera nejeeruko ehoroko ndika maana ja Karunga.

²⁰ Iitshitua oja gandjua uo mejonuko ha keharo rjajo jene, aaue, okeharo rja ngoka e ji gandja mejonuko, noku ji cigira etegerero.

²¹ Oshoka iitshitua otaji ka mangururua uo kuupika uejonuko, jo taji ka mona emanguruko ekumici rjaana ja Karunga.

²² Oshoka otu tshi tshi nokutja iitshitua ajishe ohaji keme, jo ji neceto rjokuvara sigo ongashingi.

²³ Ha jo ike aaue, nasse uo mba tua peua uutango u’omagano g’Ombepo, ano nasse jene atu keme meni rjetu, sse tua tegerera etuumbo rjetu ng’aana ja Karunga mekuriro rjorutu ruetu.

²⁴ Ss’otu’upicua ketegerero rjetu. Etegerero ndi orja guanicua, kari shi ue etegerero. Itatu vuru okutegerera tsha, shoka tsha guanicua nare.

²⁵ Ndere nge tua tegamena tsha shoka katshi uetikue manka, sse otue tshi tegerera nonteni.

²⁶ Otsho uo Ombepo ohahi kuaca uunkundi uetu, oshoka sse katu tshiuo, shoka tshi nokuindirua na sho tsh’opara. Nena Ombepo ho hene otahi tu garikanene neemkemo kadi tshi kutumburua.

²⁷ Omukonakoni gueemtima oku tshi shoka Ombepo tahi indire, sho tahi popire aajapuki paharo rja Karunga.

²⁸ Sse otu tshi tshi uo nokutja iinima ajishe otaji oparere mboka je ore Karunga, omboka j’icanua kuujapuki kehuco rje.

²⁹ Mboka a tshiua nare, he e ja uca uo nare, ja fe Omona gue kotshoorerua tshe, he a ninge omutango mokati kaamuahina ojendji.

³⁰ Mba a huca nare, he e j’icana uo. Aahicanua he te ja pe uujuki. Aajuki he te j’adimica uo.

³¹ Sse natu tje ngiini? Karunga nge ta kara nasse, ore ta vuru oku tu jona.

³² Nge ina upica Omona gue, he te mu gandja moruetu, ine tu pa nani atshishetshishe mu he?

³³ Ore ta vuru okuumaneka aahogororua ja Karunga? Karunga ngu te ja pe uujuki?

³⁴ Ore te ja pangurire ekano? Jesus Kristus ngu a sire nde a jumuka, ta kaatumba korurjo rua Karunga, nde te tu popire?

³⁵ Ore ano ta vuru oku tu kuca mohore ha Kristus? Uudigu, uumbanda, ondjara, orueepo rueenguuo, etidatido, etiro rjokutira iishuna jokomesho, egongamuere?

³⁶ Ngashi tsha tshangua: “Moru’ohe atu ka dipagua arushe. Ss’atu ka tarua ng’eenzi di adi tserua.”

³⁷ Ndere miinima mbi ajishe atu ka sinda morua ngoka e tu ore.

³⁸ Oshoka ondi tshi tshi tshiri tshiri, ha eso nenge omuenjo, h’aajengeli nenge omapangero, nenge omanankondo, ha mbika jonena nenge mbika jokomesho, ha uufure.

³⁹ Ha mbika jokombanda nenge jomoshi, nenge otshitshitua tshirue tatshi vuru oku tu kuca mohore ha Karunga, ndji hi ri mu Kristus Jesus Muene guetu.