Kaaroma 7 - Etestemente Epe ✠ 1951

ONTOPORUA 7. Aakriste itaa pangerua kotshipango tsha Moses.

¹ Kamu tshi tshi jamuameme, — ote popi ku mboka ja nongera ompango, — nokutja ompango ohahi pangere omuntu manka e nomuenjo?

² Otsho uo omukiintu omuhokanua okua kuatakana mompango manka omurumentu e nomuenjo. Ndere omurumentu nge ta si, okua kuatunuka motshipango tshomurumentu.

³ Ot’icanua omuhonderi, nge ta hi komurumentu gurue, manka omurumentu gue e nomuenjo. Ndere omurumentu nge okua si, okua kuatunuka motshipango tshomurumentu, ke shi omuhonderi, nge t’okanua komurumentu gurue.

⁴ Otsho jamuameme, mune uo mua si ompango moru’orutu rua Kristus, ne mu game ku gurue, okutja ku ngoka ngu a jumuka kuusi. Nena ano ss’otua ara tu imikire Karunga iihimati.

⁵ Manka sse tua kara po pangama, omahuru guuru nde go miikuarutu jetu, oga pendurua kompango, ga ninga sse tu imikire eso iihimati.

⁶ Nena ss’otua mangururua kompango heso, ndji he tu kuaterera. Ss’atu karere Karunga mombepo ompe, ha kenongero rjondanda onkuru.

⁷ Atu ti ngiini ano? Ompango oho uurunde? Nandodiro! Ndere mompango ngaje onda dimburura uurunde. Ngeno okua ompango inahi tja: “Ino aruka,” ando ngaje inandi tshiua okaaru.

⁸ Uurunde ou’oroka moru’ompango, nde ua penduca mungaje uuharu keshe, oshoka otshipango, sho tsha ri katshi po, uurunde ua kara meso.

⁹ Nare ngaje onda kara kandi nompango. Ndere otshipango sho tshe ja, uurunde ou’oroka.

¹⁰ Ngaje onda si. Otsho ngaje onda mona nokutja otshipango tsh’eterandje eso, nanto tsha turua po okufara komuenjo.

¹¹ Oshoka uurunde mbu ua zi motshipango, ua kotokerandje, nde ua farandje meso morua shi.

¹² Ano ompango ondjapuki notshipango otshijapuki, otshijuki, tsh’otshaanaua.

¹³ Otshaanaua shika otsha faricandje ano meso? Nandodiro! Uurunde tuu! Uo opo u oroke ng’uurunde ua eterandje eso kotshaanaua, uo u dimburukue muuhinejerera ue moru’otshipango.

¹⁴ Ss’otu tshi tshi, ompango oho pambepo. Ngaje omuntu guopanjama ndi ri mepangero rjuurunde.

¹⁵ Kandi tshi tshi naua shoka te rongo. Kandi ronga uuhanaua mbu nda ara, aaue, ote ningi uuhineji, mbu nda tonda.

¹⁶ Ndere nge te rongo shoka kandi ara, ngaje ote hiteere nokutja ompango oho ombuanaua.

¹⁷ Nena nduno ha ngaje te rongo ue, aaue, uurunde mbu hau kara mungaje.

¹⁸ Oshoka ondi tshi tshi mungaje, nokutja monjama handje kamu nuuhanaua nando oua tsha. Tshiri onda ara uuhanaua, ndere itandi u guanica.

¹⁹ Kandi ronga uuhanaua mbu nda ara, aaue, andi ningi uuhineji, mbu inandi ara.

²⁰ Ndere nge te rongo shoka kandi ara, ha ngaje tii tshi rongo, aaue, uurunde mbu tau pangerendje.

²¹ Ond’ihuvite ano otshipango, nokutja nge nda ara uuhanaua, ngaje ond’endekera kuuhineji.

²² Kombinga homuntu guomenimeni, ngaje andi njanjukirua ompango ha Karunga.

²³ Ndere ond’uvite miikuarutu jandje ompango hirue, ho hi nondumbo nompango hopambepo handje, ho ha kuatandje, ndi kare motshipango tshuurunde, shi tshi ri miikuarutu jandje.

²⁴ Jaje, ngaje omuntu omuniishuna! Ore ta kurirendje korutu ndu taru farandje meso?

²⁵ Oshenda ha Karunga morua Muene guetu Jesus Kristus. Okombinga hopambepo ngaje andi karere ompango ha Karunga. Okombinga hopanjama ompango huurunde.