Kaaroma 6 - Etestemente Epe ✠ 1951

ONTOPORUA 6. Uujuki uotshiri ua zi moshenda

¹ Atu ti ngiini ano? Natu kare mo nduno muurunde, opo oshenda hi ninge ohindjihindji?

² Tshivarerue! Uurunde sho ua sire musse sse natu kare mu uo ngiini nanena?

³ Kamu tshi tshi nani, nokutja sse mba tua tshatsherua mu Kristus Jesus, otua tshatsherua meso rje.

⁴ Ano ketshatsho mokusa sse tua fumbikua puamue na he, opo ngashi Kristus a jumudua kuusi kehadimo rja She, otsho nasse uo tu nokuenda momuenjo omupe.

⁵ Oshoka nge tua guanekua na he nokufacana meso, otatu ka kara uo tua guanekua na he nokufacana mejumuko.

⁶ Sse otu tshi tshi, omuntu guetu omukuru oku’arerua puamue na he, orutu ru’uurunde ru shanagurue po, katu karere ue uurunde.

⁷ Oshoka ngoka a sa, ohe a kuatunuka muurunde.

⁸ Nde nge tua si puamue na Kristus, otu’iteera nokutja ss’otatu ka kara uo nomuenjo puamue na he.

⁹ Otua tshiua nokutja Kristus, sho a jumuka kuusi, ita si ue, eso itari mu pangere ue.

¹⁰ Sho a si okua sire uurunde rumuike. Nde mokukara kue nomuenjo, ota karerere Karunga.

¹¹ Ano nane uo idiradireni, one mua sira uurunde, ndere omu nomuenjo okukarera Karunga mu Muene guetu Jesus Kristus.

¹² Ano, inamu pangerica ue uurunde momarutu geni omasi, ne mu vurike kuuharu uago.

¹³ Inamu gandja iikuarutu jeni ng’iirongico juukoroshi, aaue, igandjereni Karunga nga mboka ja jumuka kuusi, niikuarutu jeni ku Karunga ng’iirongico juujuki.

¹⁴ Oshoka uurunde itau vuru ue oku mu pangera, oshoka kamu ri ue koshi hompango, aaue, omu ri moshenda.

¹⁵ Ongiini ano, otatu ka jona, sho katu ri koshi hompango, aaue, tu ri moshenda? Tshivarerue!

¹⁶ Kamu tshi tshi nokutja omu ri mepangero rja ngoka mu’igandjera ng’aakareri, — ng’aakareri juurunde keso, nenge ng’aakareri jevuriko kuujuki.

¹⁷ Karunga na pandurue! Ne mua ri aakareri juurunde, ndere mua vurika nomutima agushe kerongo ndika mu mua farerua.

¹⁸ Mua mangururua kuurunde, ne mua ningi aakareri juujuki.

¹⁹ Otandi popi pamukaro guopantu moru’uunkundi uonjama heni, oshoka ngashika mua gandjere iikuarutu jeni ng’aakareri juurunde no juukorokoshi muukorokoshi, otsho tuu uo ngashingika gandjeni iikuarutu jeni kuukarere u’uujuki mejapuro.

²⁰ Oshoka manka mua ri aakareri juurunde, omua ri kamu nuujuki.

²¹ Iinima mbi mue ji sir’oshoni nena, oje mu etera nare iihimati jatshee? Eshuriro rjiinima mbjoka orjo eso.

²² Ndere ngashingika, sho mua mangururua kuurunde, nde mua ningi aakareri ja Karunga, omu na iihimati jeni, nokutja ejapuro nomuenjo guarushe.

²³ Oshoka ondjambi huurunde oho eso. Ndere omaganoshenda ga Karunga ogo omuenjo guarushe mu Kristus Jesus Muene guetu.