Kaaroma 5 - Etestemente Epe ✠ 1951

ONTOPORUA 5. Oshenda ndji he tu eterua ku Kristus

¹ Nena nduno, sho tua ningi aajuki okehiteero, nasse otua ara tu kare mombiri ha Karunga morua Muene guetu Jesus Kristus.

² Omorue sse tua mona uo mehiteero ompito hokuada oshenda ndji mu tu ri, nde ss’atu itangere etegerero rjehadimo rjaana ja Karunga.

³ Ndere ndjoka ike aaue, sse tu’itangere uo uudigu, oshoka tua tshiua nokutja muudigu tamu zi ehididimiko.

⁴ Mehididimiko amu zi ediginino. Mediginino amu zi etegerero.

⁵ Ndere etegerero kari niirombo, oshoka ohore ha Karunga oha tirirua meemuenjo detu k’Ombepo Ondjapuki, ndji tua peua.

⁶ Otshike nduno Kristus a sira aarunde pecimbo rj’uka, sse sho tua ri aarunde?

⁷ Ondi tshi kapu na gumue ta sire omujuki. Otapu monikua ngiika gumue t’itsire omukumo okusira omuhanaua.

⁸ Ndere Karunga oku’orora ohore he hoku tu ora mu Kristus, ngu e tu sira manka sse tua ri aarunde.

⁹ Unene sse otatu ka kererua kondjashi he, oshoka tu’ucirua uujuki mombinzi he.

¹⁰ Moru’eso rj’Omona gue, sse tua anganicua na Karunga, ngija tua ri aatondi je. Ano ong’aahanganicua tatu k’upicua tshiri moru’omuenjo gue.

¹¹ Ndere shoka ike aaue, sse otu’itangere uo Karunga morua Muene guetu Jesus Kristus, ngu e tu rongera ehanganico.

¹² Uurunde oue ja muujuni moru’omuntu gumue. Uurunde ua eta eso. Otsho eso rja ha maantu ajeshe, oshoka ajeshe oja jona.

¹³ Uurunde oua ri muujuni nokuri, ompango sho ha ri kahi po. Ndere uurunde itau jarurua nge kapu nompango.

¹⁴ Ndere eso orja pangera okuza mu Adam sigo omu Moses no mu mbejaka inaa fa Adam mokujona, ngoka otshoorerua tsha nguka kua te ke ja.

¹⁵ Ndere katshi ri nuurunde ongashi nomaganoshenda. Nge ojendji ja si moru’uurunde ua gumue, nena omaganoshenda ga Karunga ga gandjua kojendji mehudorero moru’omuntu gumue Jesus Kristus.

¹⁶ Eno, omaganoshenda inaga fa kombinga himue uurunde ua gumue, oshoka mondjo himue omua za epanguro rjeshunduro. Ndere oshenda otahi upica komajonaguro ogendji nokufara kuujuki.

¹⁷ Ngashi uurunde ua gumue ua eta epangero rjeso morua nguijaka gumue, otsho uo ajeshe, mba taa peua ehudo rjomaganoshenda no rjuujuki taa ka pangera momuenjo morua nguka gumue, okutja Jesus Kristus.

¹⁸ Ano, ngashi mejonaguro rja gumue mua zi eshunduro rjaantu ajeshe, otsho otshironga otshijuki tsha gumue tsh’etera aantu ajeshe uujuki uomuenjo.

¹⁹ Eno, ngashi moru’odino ha gumue ojendji ja ningi aarunde, otsho moru’evuriko rja gumue ojendji taa ningi aajuki.

²⁰ Ompango ohe ja pokati uurunde opo u tane. Ndere apeshe mpo uurunde ua tana, opo uo esiroshenda rja tanena.

²¹ Ngashi epangero rjuurunde orja oroka meso, otsho tuu uo nepangero rjoshenda ri oroke muujuki uokumona omuenjo guarushe morua Jesus Kristus Muene guetu.