Kaaroma 4 - Etestemente Epe ✠ 1951

ONTOPORUA 4. Ehiteero rjometestamente ekuru

¹ Natu tje tshike ano? Tate hetu Abraham okua mona tshee panjama?

² Oshoka Abraham, nge oku’ucirua uujuki moru’iironga je he ota vuru okuitanga muene, kotshipara tsha Karunga, aaue.

³ Oramata otahi ti ngiini ano?: “Abraham oku’iteera Karunga. Rjo rje mu jarurirua uujuki.”

⁴ Ngu ta rongo iironga, ota peua ondjambi hi cike piironga je, ha moru’esiroshenda.

⁵ Ndere ngu ke niironga, nde a hiteera ngoka t’ucire aarunde uujuki, ehiteero rje otari mu jarurirua uujuki, keharo rjesiroshenda rja Karunga.

⁶ Otsho David t’amberere omuntu omunerago, ngu t’ucua ku Karunga omujuki, nanto ke niironga:

⁷ “Aanerago mboka ja diminua po omajonaguro gauo, ja siikirirua eendjo dauo.”

⁸ Omunerago omuntu, Muene ine mu jarurira ondjo he.

⁹ Ehamberero ndika orja tsa ike pu mba ja fukarekua, nenge orja tsa uo pu mba inaa fukarekua? Ss’atu ti: “Abraham okua jarurirua ehiteero rje uujuki.”

¹⁰ Rjo orje mu jarurirua unake? Sho a fukarekua, nenge ongija ina fukarekua? Sho a fukarekua, aaue, ongija ina fukarekua.

¹¹ Efukareko okue ri peua ng’edidiriko rjuujuki mbu a ri e na moru’ehiteero ngija ina fukarekua, opo a ninge she haahiteeri ajeshe, mba inaa fukarekua, rjo ri ja jarurirue uo uujuki.

¹² He a ninge uo she haafukarekua, ha mboka ike je nefukareko aaue, ha mboka uo haa hende meempadi dehiteero ndjoka tate Abraham a ri e na ngija ina fukarekua.

¹³ Ha moru’ompango Abraham noruvaro rue a peua omarobuerero nokutja ota ningi omucigururi guevi, aaue, omoru’uujuki mbu ua zi mehiteero.

¹⁴ Ngeno okua mboka jomompango ja ningire aacigururi, ando ehiteero kari notshironga, nomarombuerero oga tshunicua.

¹⁵ Oshoka ompango oha tukura egeero. Mpo kapu nompango, kapu na uo nodino haho.

¹⁶ Ano omoru’ehiteero, nokutja okesiroshenda. Otsho omarombuerero oga tsa poruvaro arushe, ha mboka ike jomompango, aaue, ha mboka uo jomehiteero rja Abraham, h’otate hetu atushe.

¹⁷ Ngashi tsha tshangua: “Onde ku tura po she hiiguana ojindji,” oshoka oku’iteera Karunga, ngu ta jumuda aasi, nde t’icana shoka katshi po, opo tshi kare po.

¹⁸ Nanto kapua ri ue etegerero, he okua tega h’a hiteera, nokutja ta ningi she hiiguana ojindji, oshoka okua rombuerua: “Oruvaro ruohe otaru ningi ru cike pu do.”

¹⁹ Ina nengena mehiteero rje, nanto a dimburura nokutja orutu rue rua kuka, — okua ri a ninga konjara eemvo ecere, — otsho a tshiua nokutja otshivarero tsha Sara otsha kuka.

²⁰ Ina rimbirirua komarombuerero ga Karunga nokukara ke nehiteero, aaue, okua koro mehiteero rje, nde ta pe Karunga esimano.

²¹ Okua ri e tshi tshiririre naua nokutja shoka a rombuerere, ota vuru uo oku tshi guanica.

²² Rjo rje mu jarurirua uujuki.

²³ Ndere ha morue ike kua tshangua: “Rjo rje mu jarurirua uujuki.”

²⁴ Aaue, no moruetueni uo, oshoka orje tu jarurirua uo uujuki, nge tu’iteera nguka a jumuda kuusi Jesus Kristus Muene guetu.

²⁵ Ngu a gandjua moru’eendjo detu, nde a jumuka kehuco rjuujuki uetu.