Kaaroma 16 - Etestemente Epe ✠ 1951

ONTOPORUA 16. Omakundiro nomakumagido

¹ Otandi tura mohore heni omumuameme omukiintu Foibe, omujakuri guegongaro rjomu Kenkrea.

² Mu tuumbeni mu Muene ngashi tsh’oparere aajapuki. Miironga je ajishe, moka a pumbua ekuaco rjeni, mu kuacereni, ngashi he muene a kuaca uo ojendji, nangaje uo.

³ Otamu kundu Priska na Akuila. Oja ronga puamue nangaje mu Kristus Jesus.

⁴ Kehupico rjomuenjo guandje jo ja ara okugandja ocingo hauo. Hangaje ike aaue, nomagongaro ageshe gaapagani oge ja panda.

⁵ Kundireni po egongaro rja gongara mondjugo hauo. Kundireni po Epenetus omuhorike guandje. Ohe omutango gua Kristus mu Asia.

⁶ Otamu kundu Maria, ngu kua a pijagana unene morueni.

⁷ Kundireni po Andronikus na Junias, aakuazimo jandje, eenkuate eenkuetu. Oja simana mokati kaapostoli, je vurendje mecimbo rjauo rjokukara mu Kristus.

⁸ Otamu kundu Ampliatus omuhorike guandje mu Muene.

⁹ Ekundo rjandje ku Urbanus, ngu a ronga puamue nangaje mu Kristus, na Stakis omuhorike guandje.

¹⁰ Otamu kundu Apelles, h’omuhorike mu Kristus.

¹¹ Kundireni po mboka jomondjugo ha Aristobolus. Kundireni po Herodion omukuazimo guandje. Kundireni po mboka jomaandja Nartsissus, mba je ri mu Muene.

¹² Ekundo rjandje ku Trifena na Trifosa, mba taa rongere Muene. Kundireni po Persis omukiintu omuhorike. Okua ronga ojindjijindji mu Muene.

¹³ Otamu kundu Rufus, h’omuhogororua mu Muene, na hina, ngoka meme uo.

¹⁴ Kundireni po Asinkritus, Flegon, Hermas Patrobas, Hermes naamuameme jakuauo, mba je ri pu jo.

¹⁵ Ekundo rjandje ku Filologus na Julia, Nereus nomumuahina omukiintu, na Olimpias naajapuki ajeshe, mba je ri puamue na jo.

¹⁶ Kundiracaneni po nokucipa okujapuki keemrungu. Otamu kundua komagongaro ageshe ga Kristus.

¹⁷ Otandi mu indire jamuameme, kotokereni ajeshe, mba taa k’eta omatopokacano nomapuko, mba je nondumbo nomarongo nga mua rongua. Ja’angareni!

¹⁸ Aantu ja tja ngaaka kaa karera Jesus Kristus, aaue, era rjauo. Otaa pukica eemtima daagoua neehapu eentoue no nomambembereko.

¹⁹ Evuriko rjeni orja tshiuika apeshepeshe. Otsho ngaje nde mu njanjukirua. Ndere ngaje onde mu arera uunkurungu muuhanaua aushe, nuugoua muuhineji.

²⁰ Karunga kombiri na rjatagure nzija omusatana koshi heempadi deni. Oshenda ha Muene guetu Jesus Kristus nahi kare puamue nane.

²¹ Timoteus ote mu kundu, omukuaci guandje, naakuazimo jandje Lutsius na Jason na Sosipater.

²² Ongaje Tertius omutshangi guombrife ndjika, andi mu kundu mu Muene.

²³ Gajus ngu a tuumbandje mondjugo he, ote mu kundu. Negongaro arishe otari mu kundu. Erastus omupangeri guiimariva jotshirando no mumuameme Kuartus taje mu kundu.

²⁴ Oshenda ha Muene guetu Jesus Kristus nahi kare puamue nane amushe Amen.

²⁵ Ngoka e neenkondo doku mu koreka mevangelium rjandje no mehuvico rja Jesus Kristus, no mehororo rjotshoorekua, sho tsha kara tsh’orama okuza komacimbo garushe.

²⁶ Shi tsh’ororua ngashingika momambo gaaprofeti, no keharo rja Karunga karushe tatshi uvicua piiguana ajishe, jo je tshi iteera nevuriko.

²⁷ Karunga nguka ohiike omunandunge, ohe na simanekue, he na tangue morua Jesus Kristus arusherushe Amen.