Kaaroma 13 - Etestemente Epe ✠ 1951

ONTOPORUA 13. Eemkaro daakriste

¹ Keshe gumue na vurike keenkondo daapangeri, oshoka kapu nepangero, ndi inari za mu Karunga. Aapangeri oja turua po ku Karunga.

² Otsho ano, keshe ngu ta tindi okuvurika keenkondo daapangeri, oha dini ehuco rja Karunga. Ndere ajeshe mba haa ri dini, ohaa himonica ekano.

³ Aapangeri kaa tirica mboka haa rongo uuhanaua, aaue, ombo haa rongo uuhineji. Nge ino ara okutira eenkondo daapangeri, ronga nduno uuhanaua, ngueje to ka pandua ku jo.

⁴ Ojo aakareri ja Karunga koruporo ruohe. Ndere nge to rongo uuhineji, ngueje u nokutira. Kaa zara ouara egongamuere, oshoka ojo aakareri ja Karunga, aageeri jokugeera, mba ja jona.

⁵ Ano omu notshipango tshokuvurika, ha moru’egeero ike, aaue, no moru’ehuvo rjomutima.

⁶ Otsho ano ne hamu fendere uo, oshoka ojo omarenga ga Karunga mejakuro ndi.

⁷ Peni ajeshe shoka je nokupeua, efendero rjotshirongo, ngu e noku ri peua, efendero rjongamba ngoka e noku ri peua, etiro ngu e nokutirua, esimano ngu e nokusimanekua.

⁸ Inamu kara mu nonkuma homuntu, eenkuma dokuoracana odo ike, oshoka keshe ngoka e hore mukuauo, ohe a guanica ompango.

⁹ Oshoka iipango mbika: Ino ondera, ino dipaga, ino jaka, ino rundira, ino aruka, notshipango otshikuauo keshe, oja kuaterua motshipango shika: Hora mukueni, ngashi u’ihore muene.

¹⁰ Ohore kahi ningire mukuauo uuhineji nando oua tsha. Otsho uo ohore oho eguanico rjompango.

¹¹ Ano rongeni nokudimburura naua enongero rjecimbo, nokutja ostunde ha cikana mu penduke meemposi, oshoka ehupico rjetu ori ri popepi nasse ngashingika ri vure rjonare, ngija tua shimbika okuiteera.

¹² Uusiku ua kuka, nomutenja ogu ri popepi. Tu ishureni ano iironga jeemrema, tu omateni onjo hiikuti juujerere.

¹³ Tu kareni ano neemkaro eemhanaua, ng’omutenja, ha muufukedi uiituci, no muukorue, ha momahondero no muuhineji uoshoni, ha meendjuma no mokasheshe.

¹⁴ Zareni Muene Jesus Kristus, nonjama heni inamu hi ukica kokaaru.