Kaaroma 12 - Etestemente Epe ✠ 1951

ONTOPORUA 12. Omakumgido.

¹ Otsho ano jamuameme, andi mu kumagidire esiroshenda rja Karunga, ne mu gandje omarutu geni ng’oshura ondjapuki, hi nomuenjo, ho h’oparera Karunga, erongerokarunga rjeni ri ningue neendunge.

² Inamu fa uujuni uongashingi, aaue, tshitukeni ne jene, ne mu kare nomadiradiro omape, opo mu konakone eharo rja Karunga nokutja orini, na shoka otshaanaua tsh’oparerera, sho tsha pua.

³ Oshoka ngaje andi mu rombuere amushe meenkondo doshenda ndji nda peua, kamu idiradire kombanda ha sho tshe mu ereka, mu kembadare okuidiradira mehitshonopeko, oshempa tuu ngoka pamucika guehiteero ndjoka a peua ku Karunga.

⁴ Ngashika tu na morutu rumue iikuarutu ojindji, jo iikuarutu kaji notshironga tshimue.

⁵ Otsho uo nasse atushe orutu rumue mu Kristus, nde mokukaracana kuetu osse iikuarutu.

⁶ Moru’oshenda ndji tua peua, ss’otu na omagano giiri no giiri. Ngu e na ndioka, rjuuprofeti, na ronge uo pehiteero.

⁷ Nge e nejakuro, na kare mejakuro rje. Nenge ngoka ta rongo, na kare omudiginini mokuronga.

⁸ Omukumagidi na diginine mokukumagida. Nge ha kuaca eehepere, ne tshi ninge nomutima omuhanaua. Ngu a ning’omukuruntu, ka kare nuuheci. Ngu ha jeerere, a kare nombepo henjanju.

⁹ Ohore kahi kare nekojuko. Tondeni uuhineji, dameni muuhanaua.

¹⁰ Horacaneni nohore huumuahina. Tsakaneneni mokupacana osima.

¹¹ Inamu vurua merama rjeni. Kareni nomuenjo gua sama. Karereni Muene.

¹² Njanjukueni metegerero, ididimikeni muudigu, diginineni omagarikano.

¹³ Kuacereni aajapuki meendjepo dauo. Edirireni aahenda.

¹⁴ Jambekeni aatidi jeni, jambekeni inamu tuka.

¹⁵ Njanjukueni puamue na mboka je ri menjanju, rireni naariri.

¹⁶ Karacaneni mua tsompangera himue. Inamu kondjera iinima iinene, aaue, kareni mua guana na mbjoka iishupi. Inamu itara mua f’aanandunge.

¹⁷ Inamu garurira nande omuntu uuhineji ue. Diginineni uuhanaua, ha motshipara tsha Karunga ike, no miipaci jaantu uo.

¹⁸ Nge tatshi vurika kareni nombiri naantu ajeshe.

¹⁹ Jahorike, ne jene inamu garurira nande omuntu uuhineji ue, ndere peni ondjashi ha Karunga ompito, ngashi tsha tshangua: “Okugeera okuo otshironga tshandje. Ongaje tandi futica. Muene ta ti.”

²⁰ Ndere omutondi guohe, nge a sondjara, mu turira po, nenge nge a senota, mu pa a nue, oshoka nge to ningi ngii, oto mu gongere komutse gue omakara ga sama.

²¹ Ino sindua kuuhineji, aaue, ongueje sinda uuhineji kuuhanaua.