Kaaroma 11 - Etestemente Epe ✠ 1951

ONTOPORUA 11. Ehupico rjotshiguana tsh’Israel

¹ Andi pura ano: Karunga oku’ekerashi otshiguana tshe? Nandodiro! Nangaje uo omuisraeli guoruvaro rua Abraham, guomezimo rja Benjamin.

² Karunga in’ekerashi otshiguana tshe, shi a hogororere nare. Kamu tshi shoka tsha tshangua moramata mehokororo rja Elias, sho a popa Israel ku Karunga?

³ “Muene, oja dipaga aaprofeti johe, oja shanagura eehaltari dohe, ongaje ike nda upa ko. Nde ohaa rangerendje uo, ja dipagendje.”

⁴ Ndere Karunga okue mu jamukura tshee: “Ond’ipungurira aarumentu omajovi uunuari, mba inaa tsira ku Baal eengoro.”

⁵ Nomecimbo rjonena omu notshihupe tsh’upicua moru’ehogororo rjoshenda.

⁶ Ano omoru’oshenda, ha moru’iironga. Nge katshi ri ngii, oshenda kahi shi ue oshenda.

⁷ Otshi ri ngiini ano? Shoka Israel a kembadara, ine tshi akana. Otshitoporua tshaahogororua ike oje tshi kuata. Jakuauo oja kukuta.

⁸ Ngashi kua tshangua: “Karunga okue ja pa ombepo ha vundakana, nomesho nga kaga uete, nomakutsi nga kaga uva ko sigo okesiku rjonena.”

⁹ David ta ti: “Otshiriro tshauo natshi ninge mu jo omuigo, ekuatico, epunduko negeero.

¹⁰ Omesho gauo naga tsike, kaga mone ko. Njongameka arushe eembunda dauo.”

¹¹ Andi pura ano: Jo oja punduka ja kare ja kana? Tshivarerue! Uurunde uauo oua etera aapagani ehupico, jo ja tsitsimikirue okuorera otshoorerua tshauo.

¹² Okuguana kuauo oku noruporo ru cike peni, nge uurunde uauo ua etera uujuni uujamba, nokutshonopekua kuauo kua ningi uujamba u’aapagani?

¹³ Andi mu rombuere ne japagani: Ng’omuapostoli guaapagani ngaje onda ara ndi simaneke ejakuro rjandje.

¹⁴ Otsho nda ara oku eka aakuazimo jandje, ja ninge aahoreri, ngaje ndi upice jamue mokati kauo.

¹⁵ Otsho ekano rjauo nge rj’etera uujuni ehanganico, nena etuumbo rjauo orjo omuenjo omupe gua zi kuusi.

¹⁶ Nge otshikuiira tshotango otshijapuki, nena nombombo ahishe ondjapuki. Omudi nge omujapuki, niitaji uo iijapuki.

¹⁷ Ndere iitaji jimue, nge ja mpononua po, nangueje, tshitaji tshorumono ruokuti ua tsikua mokati kiitaji, ua peua otshitoporua tshohe komudi no komeja gorumono oruaanaua.

¹⁸ Nena ano ino itanga nokudina iitaji. Nge to inenepeke, ou dimburukua naua, hangueje to umbata omudi, aaue, omudi gue ku umbata.

¹⁹ Ngueje to ka tja ngaa shira: Iitaji oja mpononua po, opo ndi tsikue mo.

²⁰ Eeua, oja mpononua po, sho ja ri kaa nehiteero. Ndere ngueje ua tsikua mo moru’ehiteero. Ino kara nuuntsa, kotoka ano.

²¹ Oshoka Karunga nge in’upica iitaji jopantshitue, nangueje ite ku upica.

²² Tara ano uuhanaua nongejo ha Karunga. Ongejo he opu mboka j’iteka, nuuhanaua ua Karunga opu ngueje, nge to kara omudiginini muuhanaua. Nge ito kara mo, nangueje uo to keua ko.

²³ Ndere mboka jakuauo otaa ka tsikua mo itsheue, nge taa garukire kehiteero, oshoka eenkondo da Karunga oda guana oku ja tsikurura ko.

²⁴ Ngueje ua tetua ko korumono ruokuti, ndu ruorudi rueni, ua tsikua ko korumono oruaanaua, karu shi ruorudi rueni, ano otshipu unene okutsika mbjoka korumono ruauo jene.

²⁵ Jamuameme, inandi ara oku mu oreka otshoorekua shika, kamu itare ng’aanandunge odindji, nokutja ekukutiko rjotshitoporua tshimue tshotshiguana Israel ari kara po sigo aapagani oje ja mo, ja guanenena.

²⁶ Otsho Israel atshishe tatshi k’upicua, ngashi tsha tshangua: “Omuhupici ta ka za mu Sion, nde ta kuca, he ta kombo mo odinokarunga mu Jakob.

²⁷ Eguaneno rjandje na jo orjo ndika, sho tandi kuca po eendjo dauo.”

²⁸ Kombinga hevangelium jo aatondi morueni. Kombinga hehogororo jo aahorike moru’ootate.

²⁹ Oshoka omaganoshenda ga Karunga nehicano rje itari ka rundururua.

³⁰ Ngashi ne uo nare kua inamu iteera Karunga, omua mona nena esiroshenda morua mboka inaa hiteera.

³¹ Otsho uo mboka kaa nehiteero ngashingika, ja mone esiroshenda moru’esiroshenda ndi ne mua rikora.

³² Oshoka Karunga oku’eca ajeshe modinokarunga, he e ja sire ajeshejeshe oshenda.

³³ Ano uure mbuka u’uujamba no u’eendunge no u’uunkurungu ua Karunga ou cike peni! Omapanguro ge ohaga konakonua kure, neendjira de ore e di tshi!

³⁴ Ore a tshiua omadiradiro ga Muene, nenge ore te mu pe omeere ge!

³⁵ Nenge ore e mu pa tsha tango, he e tshi mu fute!

³⁶ Oshoka ajeshe ojo mu he, ajishe omorue, no ku he ji ri po. Ohe na simanekue sigo osigo Amen.