Kaaroma 10 - Etestemente Epe ✠ 1951

ONTOPORUA 10. Ondjo hotshiguana tsh’Israel

¹ Jamuameme, eharo rjomuenjo guandje, negarikano rjandje orjo ndika: okutja j’upicue.

² Ondi nokuepurura nokutja oje nerama rjokukarera Karunga, ndere kaje nokutshiua kuotshiri.

³ Sho inaa dimburura uujuki ua Karunga, j’itura ouara uujuki uauo jene, jo inaa ninga aajuki keharo rja Karunga.

⁴ Oshoka ecikiro rjompango orjo Kristus, ngu ta pe keshe, ngu e nehiteero, uujuki.

⁵ Oshoka Moses okua tshanga ta popi uujuki uokompango: Kesh’omuntu, ngu te hi guanica, ota kara nomuenjo ku ho.”

⁶ Ndere uujuki uokehiteero otau popi ngaano: “Ino popja momutima guohe: ore ta ka ronda keguru” nokutja a ka tare Kristus.

⁷ Nenge, “ore ta rondoroka ta hi muure uomoshi?” nokutja oku kuca Kristus motshirongo tshaasi.

⁸ Ndere momambo omajapuki omua tshangua tshee?: “Ohapu ohi ri popepi nangueje, mokana kohe no momuenjo guohe”, okutja ohapu hokehiteero, ndji atu uvica.

⁹ Oshoka nge ua epurura nokana kohe nokutja Jesus ohe Muene, nge u’iteera nomutima guohe nokutja Karunga e mu jumuda kuusi, nena ngueje oto k’upicua.

¹⁰ Ehiteero rjomuenjo ari gandja uujuki, nehepururo rjokana ari gandja ehupico.

¹¹ Omambo omajapuki taga ti: “Keshe ngoka e mu iteera, ita ka kana.”

¹² Oshoka kapu nejoororo pokati kaajuda no kaapagani. Gumuike Muene guajeshe, ngu ta pe ajeshe, mba je mu indire, uujamba ue.

¹³ Keshe ngu t’icana edina rja Muene, ohe t’upicua.

¹⁴ Ndere otaa kugu ngiini ku ngoka inaa mu iteera? Oja ara oku mu iteera ngiini, nge inaje mu uva? No ja ara oku mu uva ngiini, nge inaa huvicua?

¹⁵ Ore ta vuru okuuvica, nge ina tumua? Ngashi tsha tshangua: “Od’opara tshiri eempadi da mboka haa huvica ombiri, haa heta ekundano rjenjanju.”

¹⁶ Ndere kaje shi ajeshe, mba j’iteera evangelium, oshoka Isaias ta ti: “Muene, ore nduno a hiteera ehuvico rjetu?”

¹⁷ Ano ehiteero hari zi mehuvico, nokutja mehuvico rjokeharo rja Karunga.

¹⁸ Nena ote pura: Jo inaa huva tsha? Otshiri! “Eui rjauo rja kugagana mevi arishe, ohapu hauo ha ada eengamba duujuni.”

¹⁹ Ote pura itsheue: Israel ine tshi uva ko? Moses okua ti nokuri: “Otandi mu ningi mu sire otshiguana okasheshe, sho katshi shi otshiguana. Otandi mu tsitsimikire otshiguana shi katshi neendunge, ondjashi.”

²⁰ Isaias ta popi eehapu da taatara, sho ta ti: “Ngaje otandi ka monikua ku mboka inaa kongandje, ngaje te ka ororerua mboka inaa purandje.”

²¹ Ku Israel ta ti: “Nananana onda far’omake gandje kotshiguana, shi katshi nehiteero, tsha runduka.”