Kaaroma 1 - Etestemente Epe ✠ 1951

ONTOPORUA 1. Paulus ota kundu aakriste jo ko Roma. Uurunde uaapagani.

¹ Paulus, omukareri gua Jesus Kristus, a hicanua ng’omuapostoli, a hogororerua evangelium rja Karunga,

² ndi rja rombuererue nare kaaprofeti momambo omajapuki,

³ ndi rj’Omona gue, ngu a zi mezimo rja David kombinga honjama.

⁴ Ndere kombinga h’Ombepo Ondjapuki oku’ororua ng’Omumua Karunga omunankondo, sho a jumuka kuusi, ohe Jesus Kristus, Muene guetu.

⁵ Ohe e tu pa esiroshenda nejakuro rjuuapostoli, sse tu fare iiguana jaapagani mehiteero kesimano rjedina rje.

⁶ Nane uo omu ri mokati kauo, sho mu’icanua ku Jesus Kristus.

⁷ Ku mboka ajeshe mo Roma, je ri mohore ha Karunga, jo j’icanua kuujapuki. Esiroshenda nombiri ha Karunga Tate, ho ha Muene guetu Jesus Kristus, hi kare mune.

⁸ Omorueni amushe ngaje andi pandura Karunga mu Jesus Kristus, oshoka ehiteero rjeni ari ka tundua muujuni aushe.

⁹ Karunga, ngaje andi mu karere nomuenjo guandje, te huvica evangelium rj’Omona gue, ohe ontari handje, nokutja ngaje ohii mu dimburukua arushe.

¹⁰ He hindire kesh’uuna momagarikano gandje, ndi mone uunarume ompito hoku mu tarera po, Karunga nge e tshi ara.

¹¹ Oshoka onda jeerukua kune, ngaje nda ara ndi mu tare, ndi mu pe omagano gamue gomuenjo, ne mu korekue.

¹² Okutja sse tu ekerericacane kehiteero rjetu, rjeni no rjandje.

¹³ Ajee, inandi ara oku tshi mu oreka, jamuameme, nokutja ohe shindi orundji eharo rjokuja kune. Ndere sigo onena onda kara nd’imbiua. Eno, mokati keni ngaje onda ara uo okurikora iihimati, ngashi paapagani jarue.

¹⁴ Ongaje omunankuma guaagreka no guaabarbari guaanandunge no guaacece.

¹⁵ Okombinga handje nda ara uo oku mu uvicira evangelium mo Roma.

¹⁶ Oshoka ngaje inandi sire evangelium oshoni, aaue, orjo eenkondo da Karunga okuupica keshe ngu e ri iteera, tango aajuda, nde aapagani uo.

¹⁷ Murjo mu’oroka uujuki ua Karunga mehiteero kehiteero. Ngashi tsha tshangua: “Omuenjo guomujuki ogua zi mehiteero.”

¹⁸ Okuza keguru ondjashi ha Karunga ahi ka cikira kombanda hodinokarunga nuukorokoshi aushe uaantu, mba haa kerere otshiri ha Karunga nuukorokoshi uauo.

¹⁹ Shoka tshomu Karunga, shi atshi vuru okudimbururua, oje tshi tshi naua; Karunga okue tshi j’ororera.

²⁰ Oshoka sho katshi uetikue mu he, okutja eenkondo de darushe, nuukarunga ue, hera tuu uujuni ua tshitua, eendunge di adi konakona, adi tshi dimburura miironga je. Otsho kaa nehipopiro.

²¹ Nanto ja nongera Karunga, inaje mu tunda, jo inaje mu amberera nga Karunga, aaue, oja diradira uurai meendunge dauo, neemuenjo dauo kadi neendunge, da ningina meemrema.

²² Okuinoma ojo aanandunge, jo ja ningi aacece.

²³ Ehadimo rja Karunga, ngu ka shura po, oje ri pingakanica niiherekera jaantu, mba haa shuru po, no jeedira no jiinamuenjo jomaguru ogane no ja mbi haji ipueda.

²⁴ Omoruashi Karunga okue j’ecera muuharu ueemuenjo dauo konjata huurunde, ja ningiracana uuhineji uoshoni komarutu gauo.

²⁵ Otshiri ha Karunga oje hi randakanica iirombo. Ehamberero rjauo rjokuamberera nokukarera otshitshitua ori vure ndija rjokuamberera omutshiti, ohe na simanekue sigo osigo Amen.

²⁶ Opo Karunga a zi oku ja ecera uuharu uauo uuhineji, oshoka aakiintu jauo ja rundurura omukaro guopantshitue omukaro gu’uuhineji.

²⁷ Otsho uo ngaa aarumentu j’eca omukaro guopantshitue nomukiintu, ja vuka neji nokushuracana. Aarumentu ja ningi uuhineji uoshoni naarumentu, nde ja tuumba ondjambi huurunde uauo, ndji j’irongera mujo jene.

²⁸ Sho ja tindi okuiteera Karunga, na Karunga okue j’ecera keendunge dauo eembuineji, nde ja ningi shoka inatsh’opara.

²⁹ Oj’udirira uukorokoshi nuumbudi, uurunde uoshoni, oruisho onjanja. J’udirira okasheshe, edipago eentamanana, omakoto nuududu. Ja ri aanongoni.

³⁰ Aarundiri, eentondi da Karunga, aanantsinu, oonakuitanga, aanandunge jomuuhineji, aadini jaakuruntu.

³¹ Aagoua, aatshendjereki, kaa nohore, kaa nesiroshenda.

³² Je tshi naua ohapu ha Karunga, nokutja ajeshe mba haa rongo iironga ja tja ngaaka otaa k’irongera eso, ha mboka ike haa ji rongo, aaue, na mbo uo haa panda pu mbi ja tja ngii.