Kaakolossi 4 - Etestemente Epe ✠ 1951

ONTOPORUA 4. Omakumagido

¹ Na ne uo oojene, peni aapija jeni sho tsh’uka. Omu tshi tshi okutja omu na uo Muene meguru.

² Garikaneni nokudiginina ne mua taatara nokuamberera.

³ Tu garikaneneni uo, Karunga a hegururire ehuvico rjetu otsheero, sse tu uvice otshoorekua tsha Kristus, morua shoka ngaje onda mangua uo,

⁴ opo ndi tshi orore ngashi nda rombuerua.

⁵ Karacaneni na mboka jopondje neendunge. Piticeni ecimbo koruporo rueni.

⁶ Popjeni arushe eehapu eembuanaua, da touiua nomongua. Omu nokutshiua naua shoka tshi nokujamukurua ku keshe gumue.

⁷ Shoka tsh’ukirandje tatshi ke mu okororerua ku Tshikus, mumuameme omuhorike, omurongi omudiginini, omupija omukuetu mu Muene.

⁸ Onde mu tumu ku ne, opo a tshiue nge mu ri po naua, he a hekererice eemtima deni.

⁹ Andi mu tumu puamue na Onesimus, omumuameme omudiginini omuhorike unene, h’omutshirongotsheni. Otaje mu okororere atshishe sho tsha ningua pu sse mpaka.

¹⁰ Aristarkus ote mu kundu, ohe omukuatua mukuetu na Markus, omumuahina gua Barnabas. Omue mu rombuerua nokuri. Nge te ja mu tuumbeni naua.

¹¹ Na Jesus, ngu ha tiua Justus. Mokati ka mboka ja ri aajuda, ojoike ja kuacandje miironga jotshirongo tsha Karunga, nde j’ekerericandje unene.

¹² Epafras ote mu kundu uo, h’omunatshirongomukueni, omupija gua Kristus Jesus. Ote mu garikanene nuudiginini, ne mu kare mua guana mua pua nokuguanica eharo arishe rja Karunga.

¹³ Ngaje ontari huupjakadi mbu oundji, mbu t’umbata morueni no morua mboko jomu Laodikea no mu Hierapolis.

¹⁴ Lukas, omupangi guaavu, omuhorike, na Demas otaje mu kundu.

¹⁵ Kundirii po aamuameme jomu Laodikea, na Nimfas negongaro rjomondjugo he.

¹⁶ Ombrife ndjino nge ha lesherua pu ne, hi tumeni ku Laodikea, opo hi leshue uo megongaro ndino. Ne amu ka lesha ndjika ha zi ku Laodikea.

¹⁷ Rombuereni Arshippus: “Diginina ejakuro rjohe ndi ua peua mu Muene, ngueje u ri jakure nauerera.”

¹⁸ Ekundo rjandje orja tshangua kungaje muene, Paulus. Dimburukueni omapando gandje. Oshenda nahi kare na ne Amen.