Kaakolossi 3 - Etestemente Epe ✠ 1951

ONTOPORUA 3. Eemkaro dotshikriste

¹ Ano nge mua jumuka puamue na Kristus, kongeni shoka tshi ri pombanda, mpo pu na Kristus, ta kaatumba korurjo rua Karunga.

² Diradireni shoka tshopombanda, shoka tshopevi, aaue.

³ Oshoka omua sa. Omuenjo gueni ogua orama puamue na Kristus mu Karunga.

⁴ Kristus, omuenjo gueni nge t’oroka, na ne otamu k’oroka puamue na he mehadimo.

⁵ Dipageni ano atshishe tshopajuni tshomiikuarutu jeni: oruhondero, eendjo adishe doshoni, uuharu uuhineji, omukona, ngu gua fokukarera iikarunga.

⁶ Iinima mbika aji monic’aana jekukutiro ondjashi ha Karunga.

⁷ Na ne uo omua ri nare neemkaro doka, sho mua ri mokati kauo.

⁸ Ndere nena eceni mbjoka ajishe: ondjashi, ongejo, uumbudi omatukano neehapu eembuineji domokana keni.

⁹ Inamu rombueracana iirombo, ishureni omuntu omukuru niironga je.

¹⁰ Zareni omuntu omupe, ngu ta ningi omupe mokutshiua, ta tshitururua otshingi a fe ngu e mu tshita.

¹¹ Mokati ka mboka kamu na ue aapagani nenge aajuda, aafukarekua na mboka inaa fukarekua, aabarbari naaskiti, aapika naavarua, aaue, opu na Kristus ike no mu ajeshe.

¹² Ano ne ng’aahogororua ja Karunga, aajapuki jo aahorike, zareni esiroshenda, ondjeerera, ehitshonopeko, engungumano nonteni.

¹³ Ididimikiracaneni, diminacanii po eendjo, nge ku na gumue a jona ku mukuauo. Ngashi Muene e mu dimine po, otsho na ne uo ningeni.

¹⁴ Ndere uneenene kareni mohore, mu ho amu guanicua atshishe.

¹⁵ Ombiri ha Kristus nahi pangere nenjanju meemtima deni. Oho ndjoka mu’icanenua morutu rumue. Kareni mu nepandu.

¹⁶ Ohapu ha Kristus hi kare mu ne mehudo. Rongacaneni, kumagidacaneni neendunge adishe. Imbireni Karunga omapsalmi nomaambererondjimbo, nomaruimbo gopambepo noku mu pandura nomutima agushe.

¹⁷ Shempa shi hamu ningi neehapu nenge niironga, tshi ningeni atshishe medina rja Muene guetu Jesus Kristus, nokupandura Karunga She mu he.

¹⁸ Jakiintu vurikeni kaarumentu jeni, ngashi tsh’oparera mboka mu Muene.

¹⁹ Jarumentu oreni aakiintu jeni, inamu ja ningira onjanja.

²⁰ Janona vurikeni kaakuruntu miinima ajishe. Shoka otshaanaua motshipara tsha Karunga.

²¹ Ne ooshe, inamu geera ouara aana jeni, kaa kanice enjanju rjomevuriko.

²² Japija ne, miinima ajishe vurikeni koojene jopevi ndika. Inamu fa mboka haa tara ike omesho gaantu, ja pandikue ku jo, aaue, vurikeni nomuenjo gu’uka no metirokarunga.

²³ Atshishe sho amu rongo, tshi rongeni nomuenjo omuhanaua, nga mboka je tshi rongere Muene, ha aantu.

²⁴ Oshoka omu tshi tshi amu ka peua ku Muene uuciga ng’ondjambi. Ano rongereni Kristus Muene.

²⁵ Ndere ngu a ronga neji, ota geererua uuhineji ue. Karunga ka tara omuntu kombanda.