Kaakolossi 2 - Etestemente Epe ✠ 1951

ONTOPORUA 2. Angareni aarongi jiirombo

¹ Oshoka onda ara ndi mu tshiuicire naua otshisho ndi tshi na morueni no morua mboka jo ku Laodikea no morua ajeshe mba inaa monandje motshipara.

² Ja ekerericue momutima, ja rongue mohore, opo ja mone eendunge adishe netshiuo rjotshoorekua tsha Karunga Tate, no tsha Kristus Jesus.

³ Mu he mua orekua uujamba aushe ueendunge no uetshiuo.

⁴ Shoka andi tshi mu rombuere ne kamu tshendjerekue neehapu douara.

⁵ Parutu ngaje ondi ri kokure na ne. Ndere pambepo ngaje ondi ri mokati keni, nda njanjukirua eemkaro deni eemhanaua, nehiteero rjeni rja korerera mu Kristus.

⁶ Ano ngashi mua tuumbire nare Jesus Kristus, otsho eendjenda deni di kare mu he.

⁷ Mua tsama, mua dikua mu he, mua korerera mehiteero ngashi mua rongua, ne inamu zimbuka okupandura.

⁸ Kotokeni kamu pukicue nuunkurungu uopajuni nomatshendjereko gouara. Uunkurungu mbuka au zi momacigururuahokororo gaantu no momarongo geembepo dopajuni, itau zi mu Kristus.

⁹ Oshoka mu he omu nuukarunga uouene ua guana.

¹⁰ Na ne omua guana mu he, ohe omutse guomapangero guomapankondo.

¹¹ Mu he one mu na uo efukareko. Ndere kari shi efukareko rja ningua neke nokukuca onjama korutu, aaue efukareko mu Kristus.

¹² Okutja puamue na he ne omua fumbikua metshatsho, nde mu he omua jumuka moru’ehiteero meenkondo da Karunga ngu e mu jumuda.

¹³ Omua ri mua sa ng’aarunde, nga mboka inaa fukarekua. Okue mu jumuda puamue na he noku dima po eendjo deni adishe.

¹⁴ Notshifo tsheenkuma, shi tshe tu pa uusama, he e tshi dima nokue tshi kuca, nde te tshi tsirike komutshigakano.

¹⁵ Okua kuca omakondjico komapangero no gomarero, he e ga monic’oshoni. Mu he muene e ja sinda miipaci jajeshe.

¹⁶ Inapu kara nand’ogumue e mu pe uusama moru’iikurja nenge iikunua, moru’omafeste nenge omuedi omupe nenge omasabati.

¹⁷ Iinima mbi ajishe ojo omuzizimbe guotshinima tshokomesho. Otshinima shika, oKristus.

¹⁸ Nand’ogumue e mu pukice ngashi ngu t’itshonopeke nuukarere uokukarera aajengeli, ngu t’isimanekere shoka ina mona, ngu ta korouara momadiradiro ge gopantu ike.

¹⁹ Ngu ta dini omutse, guo gua guaneka, gua kuaterera orutu arushe neengoro needipa, gue ru kokica mu Karunga.

²⁰ Nge omua sira puamue na Kristus, inamu kara mu nomarongo geembepo dopajuni, otshike nduno amu diradira nanena mua fa mboka jomuujuni?

²¹ “Inamu tshi kuata, inamu tshi makera, ne inamu tshi njenga.”

²² Iinima mbi aji eta ekano nge taji rongua keharo no komarongo gaantu.

²³ Mbika oja fa ike uunkurungu moru’erongerokarunga rjokeendunge dauo, moru’ehitshonopeko nokutsika orutu uudigu, ndere kaji noruporo, aaue otaj’iteere uuharu uonjama.