Kaakolossi 1 - Etestemente Epe ✠ 1951

ONTOPORUA 1. Paulus na Kristus

¹ Paulus keharo rja Karunga omuapostoli gua Jesus Kristus na Timoteus omumuameme.

² Ku mboka je ri mu Kolosse, kaamuameme aajapuki jo aahiteeri mu Kristus Jesus.

³ Oshenda nombiri ha Karunga Tate hetu no ha Muene guetu Jesus Kristus nahi kare nane. Atu amberere Karunga, She ha Muene guetu Jesus Kristus noku mu garikanena kesh’uuna,

⁴ sho tu’uva ehiteero rjeni mu Kristus Jesus, nohore heni hokuora aajapuki ajeshe,

⁵ no moru’etegerero, ndi mua pungurirua meguru. Ne mue ri uva nare mohapu hotshiri hevangelium.

⁶ Rjo rje ja ku ne. Ori ri muujuni aushe, tari imi tari koko ngashi uo mokati keni okuza kesiku tuu ndika ne mua uva uo no mua dimburura oshenda ha Karunga motshiri.

⁷ Otsho mua rongua uo ku Epafras, omurongi omukuetu omuhorike, h’omukareri omudiginini gua Jesus Kristus kejakuro rjeni.

⁸ Okue tu okororera uo ohore heni hom’Ombepo.

⁹ Okuza kesiku tu’uva eehapu dika, inatu zimbuka oku mu garikanena noku mu indirira, mu ude etshiuo rjeharo rje, neendunge nuunkurungu uopambepo.

¹⁰ Eendjenda deni d’oparere esimano rja Karunga, ne mu kare mohokue he, aajamba jomiironga iihanaua, ne mu koke mokutshiua Karunga.

¹¹ No keenkondo de da simana, ne mu korekue neenkondo adishe mu umbate atshishe nehididimiko nonteni nenjanju.

¹² Ne mu pandure Karunga Tate, ngu e tu opeka tu mone otshitoporua tshetu tshokuuciga uaajapuki muujerere.

¹³ Nguka e tu kuca mo meenkondo deemrema, nde te tu pe omukaro motshirongo tsh’Omona gue omuhorike.

¹⁴ Omu he tu nekuriro moru’ombinzi he nedimepo rjeendjo.

¹⁵ He ohe tuu ngoka otshifeca tsha Karunga, ke uetikue, he ohe otsheeri tshiitshitua ajishe.

¹⁶ Oshoka mu he omo mua tshitirua iinima ajishe, mbija ji ri meguru na mbi ji ri kombanda hevi, mbi haji monikua na mbi kaji monikua, ngashi iipangerapundi, nomapangero nomarero nomanankondo. Atshishe otsha tshitua morue no mu he.

¹⁷ H’ohe e ri komesho gajeshe. Mo omu he ajishe mu nekoreko.

¹⁸ Ohe omutse guorutu, okutja ogueklesia. Ohe etameko, otsheeri mokati kaasi, he a kare omutetekeri gua ajeshe.

¹⁹ Oshoka keharo rja Karunga, mu he mu kare ehudo arishe.

²⁰ No morue atshishe tshi angakanicue na he shoka tshi ri kombanda hevi na mbija jomeguru, nde ta ningi ombiri moru’ombinzi hokomutshigakano gue.

²¹ Na ne uo omua ri kokure, mua ri aatondi momadiradiro geni nokuronga iironga iihineji.

²² Okue mu angakanica moru’eso rjorutu rue ruomuntu, ne mu kare po aajapuki, mua jera kamu nuusama motshipara tshe.

²³ Ndere omu nokukara mua tsama, mua kora mehiteero. Inamu tengatenga metegerero rjevangelium. Omue ri uva. Orj’uvicirua aatshitua ajeshe jokoshi heguru. Ongaje Paulus omupija guarjo.

²⁴ Onda njanjukirua omeepeko nga nd’umbata morueni. Otsho tandi guanicire orutu rua Kristus, okutja eklesia monjama handje, shoka tsh’epa momeepeko ga Kristus.

²⁵ Ongaje nda ninga omupija guarjo meenkondo dejakuro nda peua ku Karunga kehupico rjeni, okutja ehuvico rjohapu ha Karunga apeshepeshe.

²⁶ Otshoorekua shi, tsha ri tsh’orekerua omacimbo nomazimo ageshe, otsh’ororerua nena aajapuki je.

²⁷ Karunga okua ara oku ja tshiuicira uujamba uehadimo rjotshoorekua shi mokati kaapagani. Tsho otsho Kristus, ohe etegerero rjeni rjokumona ehadimo ndika.

²⁸ Nguka atu uvica nokukumagida omuntu keshe nokuronga omuntu keshe nuunkurungu aushe, opo tu ninge, omuntu keshe a guana a pua mu Kristus Jesus.

²⁹ Shoka otshironga tshandje. Ote kondjo meenkondo de, di adi rongicandje unene.