Kaahebrei 9 - Etestemente Epe ✠ 1951

ONTOPORUA 9. Oshura hetestamente ekuru ho hetestamente epe.

¹ Eno tshiri, neguaneno rjotango orja ri uo niipango jokupangera erongerokarunga nuujapuki uopevi.

² Tango opua dikirua etsari ndi rja rukirue “uujapuki.” Moka mua ri otshihumbati tsheenjeka, notshitafura niikuiira jokutarua.

³ Konima hetoporico etijari okua ri etsari ndi rja rukua “uujapuki u’uujapuki.”

⁴ Moka mua ri otshitsinino tshotshingoldi, notshikeca tsheguaneno, tsh’opekua keembinga adishe niingoldi. Mu mua ri okiiga kotshingoldi ke nomanna, nodimbo ha Aaron, ndji kua hi rouo, niitafura jeguaneno.

⁵ Kombanda hatsho okua ri aakerumbim jehadimo, ja ningira otshipundi tshesiroshenda omuzizimbe. Ndere iinima mbika inatu ara tu ji popje ngashingika tshimue kootshimue.

⁶ Otsho tsha ri tsha rongua. Aapristeri okua haa hi arushe metsari rjokomesho, nge ja ronga iironga jerongerokarunga.

⁷ Metsari etijari ohamu hiua komupristeri omukuruntu ike, rumuike momuvo, ndere arushe onombinzi, te hi gandja moru’eendjo de muene na dijaka dotshiguana.

⁸ Ombepo Ondjapuki ha ara oku tu dimburuca nomukaro nguka nokutja ondjira ndji ahi uka kuujapuki u’uujapuki oh’edirua manka etsari rjokomesho ri ri ko.

⁹ Shino otsheerekera tsherara rjonena. Ohaa gandja omagano neeshura di kadi neenkondo doku pa uujuki ehuvo rjomutima rja ngoka ta karere Karunga,

¹⁰ ngashi eemkaro doka dopanjama di da guaneku niikurja no niikunua no nomakosho giiri no giiri. Do adi kara po sigo okerara rjepukururo.

¹¹ Ndere Kristus oku’oroka ng’omupristeri omukuruntu gu’uuhanaua uokomesho. Okua pitire motshitsari otshinene, tsh’oparerera, tsho tshi vure shijaka, sho inatshi dikua komake gaantu, nokutja katshi shi tshomuujuni mbuka.

¹² Ha nombinzi hiikombo no heentsezi, aaue, onombinzi he muene a hi muujapuki u’uujapuki rumuike, nokua guanica ekuriro rjarushe.

¹³ Oshoka ombinzi hiikombo no heentsezi negundo rjomutoko guongombe nge tari japura mboka ja jona noku ja jereka korutu,

¹⁴ ano uneenene ombinzi ha Kristus ngu a higandjera he muene Karunga ng’oshura ha jera keharo rj’Ombepo Ondjapuki, oho tahi jereke ehuvo rjetu rjomutima kiironga jeso, sse tu karere Karunga omunamuenjo.

¹⁵ Otsho tshe mu ningica omujakuri gueguaneno epe, opo mboka j’icanua ja mone uuciga uarushe, mbu ua rombuererue moru’eso rje, ndi a humbata, opo a fute omajonaguro gomeguaneno ekuru.

¹⁶ Mpo pu netestamente rjuuciga, eso rja ngoka a ninga etestamente, ori nokutshiuika.

¹⁷ Oshoka etestamente rjuuciga ari mon’eenkondo darjo nokusa. Kari neenkondo manka ngoka a ning’etestamente e nomuenjo.

¹⁸ Otsho ndiaka rjotango rja japurua nombinzi.

¹⁹ Oshoka Moses ngija a leshere otshiguana atsishe iipango ajishe jompango, okua kuca ombinzi heentsezi no hiikombo puamue nomeja nomavudi omatirigane nohisopi, nokua tshatshamine embo rjo rjene notshiguana atshishe.

²⁰ Okua ti: “Ndjika ombinzi heguaneno, ndi Karunga a ninga na ne.”

²¹ Tsho otsho uo a ninga netsari no niijuma ajishe iijapuki, okue ji tshatsha nombinzi.

²² Keharo rjompango konjara atshishe otshi nokujerekua nombinzi. Kapua ri edimopo rjomajonaguro, ombinzi nge inahi tiruashi.

²³ Otsho iiherekera juujapuki uomeguru ja ri ji nokukoshua. Ndere uujapuki ueguru rjorjene ua arika eeshura di vure dijaka.

²⁴ Oshoka Jesus ina ha muujapuki ua tungua komake gaantu, otsheerekera tsha mbuka uotshiri, aaue, okua hi meguru rjorjene, he e tu orokere kotshipara tsha Karunga.

²⁵ Ina ha mo a higandje he muene orundji, ngashi omupristeri omukuruntu ta hi muujapuki u’uujapuki keshe omuvo nombinzi ndji kahi shi he muene.

²⁶ Ngeno okua a ri e nokuninga ngii, ando a ri uo e nokuepekua orundji okuza keshimbiko rjuujuni. Aaue, oku’oroka rumuike peshuriro rjomacimbo a kucepo eendjo noshura he muene.

²⁷ Ngashi aantu j’ucirua okusa rumuike, nde rjo epanguro tari randura ko.

²⁸ Na Kristus otsho a gandjua rumuike a kuce po eendjo daantu ojendji. He te ja orutijari, nde ite ja ue moru’eendjo. Ota k’oroka kehupico rja mboka je mu tegerera.