Kaahebrei 7 - Etestemente Epe ✠ 1951

ONTOPORUA 7. Melkisedeke vure aapristeri jetestamente ekuru

¹ Melkisedek nguno okua ri omukuaniirua gua Salem, omupristeri gua Karunga guomombanda. Okua tsakanekere Abraham nokue mu jambeka, Abraham sho a sindire aakuaniirua nde ta garuka.

² Ndere Abraham okue mu pa otshitoporua otshitimurongo tshomiinima ajishe. Edina rje ari ti: Omukuaniirua gu’uujuki, rjo ari ti itsheue: Omukuaniirua gua Salem, okutja omukuaniirua guombiri.

³ Ka ri na she nenge hina, nenge ezimo, ke noshimbi homasiku nenge eshuriro rjeendjenda. Otsho a fa Omumua Karunga, ta kara omupristeri sigo arushe.

⁴ Diradireni nduno uunene ue ou cike peni ngu a perue komupatriarke Abraham otshitoporua otshitimurongo tshiirikorua je?

⁵ Tshiri na mboka jomaana ja Levi, mba kua haa peua uupristeri, oje notshipango tshokukuca keharo rjompango otshitimurongo kotshiguana, okutja okaamuahina, nanto na jo oruvaro rua Abraham.

⁶ Ndere nguija ngu ke shi omukuazimo okua kuca otshitimurongo ku Abraham, nde ta jambeke ngoka a ri nomarombuerero.

⁷ Mpoka kapu nomarudi, nokutja omutshona oha jambekua ku ngoka e mu vure.

⁸ Nena itsheue, mpano aantu mba je nokusa, otaa tuumba otshitimurongo. Ndere mpejaka ngoka a hokororua ta kara nomuenjo.

⁹ Okutja ano, omu Abraham na Levi uo, ngu a tuumba otshitimurongo nokua gandja otshitimurongo.

¹⁰ Oshoka okua ri manka mu she, Melkisedek sho e mu tsakanekere.

¹¹ Ngeno okua uupristeri ua Levi ua ri ua guanenena, oshoka ompango hotshiguana oha ri ha guanekua na uo, otshike ano mua pumbiua omupristeri gurue, a turua po komukaro gua Melkisedek, ngu ina rukirua komukaro gua Aaron?

¹² Oshoka uupristeri nge tau rundururua, nena ompango ohi nokurundururua uo.

¹³ Ngoka ta popiua ngii a zi mezimo rirue, kapu na nand’ogumue guomurjo a rongera ohaltari.

¹⁴ Otshi tshiuike naua nokutja Muene guetu okua zi mu Juda. Okupopja ezimo ndika, Moses ina tja tsha shi tsha ts’uupristeri.

¹⁵ Otsha dimbururua naua unene oshoka opua turua po omupristeri gurue ngu a fa Melkisedek,

¹⁶ ngu ina ninga omupristeri keharo rjotshipango tshopantu, aaue, okeenkondo domuenjo kagu dimua po.

¹⁷ Oshoka pua okororua: “Ongueje omupristeri sigo arushe komukaro gua Melkisedek.”

¹⁸ Ompango onkuru oha dimua po, oshoka oha ri kahi neenkondo noruporo.

¹⁹ Ompango inahi guanica tsha. Ohe tu etera etgerero ehanaua ndi ari tu engenica ku Karunga.

²⁰ Ongashika inatshi ningua inapu ganua, mbejaka ja ningi aapristeri inaa gana.

²¹ He okua turua po negano rja ngoka a ti ku he: “Muene okua gana egano, ite ri rundurura. Ongueje omupristeri sigo arushe.”

²² Jesus otsho a ningira omupristeri guetestamente ehanaua ndi ri vure ndijaka.

²³ Pu mbejaka ojendji oja ningi aapristeri, oshoka oj’imbiua keso okukara po.

²⁴ Ndere ngoka oku nuupristeri uarushe, oshoka ota kara po arusherushe.

²⁵ Otsho ta vuru okuupica arushe mbeja taa hengene ku Karunga, oshoka oku nomuenjo arushe, opo e tu indirire.

²⁶ Otsh’uka tuu, tu kare nomupristeri omukuruntu a tja ngi, omujapuki, ke nondjo, ke nokapogodidi, a joororua maarunde, e ri kombanda heguru,

²⁷ ngu ina pumbua kesh’uuna, ngashika aapristeri aakuruntu, okuninga oshura tango moru’eendjo de muene, na komesho morua doka dotshiguana. Shoka okue tshi ninga rumuike, sho a higandja he muene.

²⁸ Oshoka ompango ahi tura po aantu aankundi ng’aapristeri aakuruntu. Ndere ohapu hegano, ndji ha randura ompango, ahi tura po Omona, ngu a guana h’a pua sigo osigo.