Kaahebrei 6 - Etestemente Epe ✠ 1951

ONTOPORUA 6. Kembadareni kuujuki na pua.

¹ Ano nduno otsho tua ara kueca manka eehapu dotango domarongo ga Karunga, tu pungurukire ku mbika ji vure mbijaka, okutja katu shimbike itsheue nehidirururo kiironga jeso nehiteero rjokuiteera Karunga,

² no nomarongo getshatsho, nomatenteko gomake nejumuko rjaasi nepanguro rjarushe.

³ Eno otsho tua ara okuninga, Karunga nge te tshi tu pitikire.

⁴ Itatshi vurika nokutja mboka ja minikirua nare, ja makera omagano gomeguru, ja peua Ombepo Ondjapuki,

⁵ no ja makera uo ohapu ombuanaua ha Karunga neenkondo domuujuni mbu tau je,

⁶ ndere oja puka, taa k’idirurura itsheue, oshoka keshe gumue gua mboka ot’arere komutshigakano nde ta tsheke Omumua Karunga itsheue.

⁷ Oshoka evi ndi ari rokua kovura ohindji nde ari varere mboka je ri ronga iihimati, mbi ja ara, otari jambekua ku Karunga.

⁸ Ndere nge ari menica omano neendjoshua, kari noruporo, ori ri popepi necingo, neshuriro rjarjo orjo okufikua po.

⁹ Ndere ne jaherike unene, nanto ss’atu popi ngaano, atu mu diradira naua, nokutja amu ka upicua.

¹⁰ Oshoka Karunga ke shi ngoka ke nuujuki, ngu ta dimbua iironga jeni nohore heni ndji mua orora medina rje, sho mua kuacere ne amu kuaca nanena aajapuki.

¹¹ Ndere ss’otua arere keshe gumue guomune a kare nuuradi mbuka mu kare netegerero rja guanenena sigo okeshuriro.

¹² Ne kamu ninge aananjaro, aaue, aahoreri ja mboka ja ninga aacigururi jomarombuerero moru’ehiteero no moru’edidimiko rjauo.

¹³ Oshoka Abraham okua perue ku Karunga omarombuerero. Ndere sho a njengua okuganena pu gurue e mu vure, oku’iganene he muene,

¹⁴ nokua ti: “Otshiri onda ara ndi ku jambeke unene ngaje nda ara ndi ku tanice unene.”

¹⁵ Nde sho a tegerere nonteni, okua peua shoka a rombuerua.

¹⁶ Aantu ohaa gana pu ngoka e ja vure. Rjo egano rja ganenua kekoreko ari shurica omarudi ageshe.

¹⁷ Otsho Karunga a guedera ko egano, aacigururi jomarombuerero ge ja tshiue nauerera nokutja ehuco rjeharo rje itari ka rundururua.

¹⁸ Opo sse uo tu kare nehekererico rja korerera miinima mbi iijaari mbi itaji rundururua, mu mbika Karunga ita vuru okupopja iirombo, nge atu enderere okudama etegerero ndi tua gandjerua.

¹⁹ Rjo ekuatico rjomuenjo guetu rjotshiri rjo rja pama, rja ada meni mui handijaka hetoporico.

²⁰ Moka mui Jesus a hi ong’omutetekeri guetu, ngu a ningi omupristeri omunene komukaro gua Melkisedek sigo arushe.