Kaahebrei 5 - Etestemente Epe ✠ 1951

ONTOPORUA 5. Kristus omupristeri omunene.

¹ Keshe omupristeri omukuruntu ta kucua maantu, ta turua moru’iinima jaantu je na na Karunga. Oku nokugandja omagano nokuninga eeshura moru’eendjo dauo.

² Oku nokusir’aasama noonakupuka oshenda, oshoka he muene oku ri munkundi.

³ Otsho a fere okuninga oshura medina rjotshiguana otsho medina rje moru’eendjo.

⁴ Kaku na ngu ta kuca he muene esimano ndi, aaue, oku nokuicanua ku Karunga ngashi Aaron.

⁵ Tsho otsho na Kristus in’isimaneka he muene, sho a ningi omupristeri omukuruntu, aaue, ohe tuu ngoka a ti ku he: “Ngueje omumuandje, nena tuu ndjika onde ku vara.”

⁶ Ongashi ta popi uo peshara rirue: “Ongueje omupristeri sigo arushe komukaro gua Melkisedek.”

⁷ Momasiku ge gopevi ndika okua fara omiindiro nomagarikano nokuigida muure nomoodi ku ngoka a ri ta vuru ku mu upica mokusa, nokua uvika moru’uujuki ue.

⁸ Nanto he Omumua Karunga, okua rongua okutshiua evuriko komeepeko ge.

⁹ Nde sho a guanica a pua, okua ningi omueti guehupico rjarushe ku mboka haa vurika ku he,

¹⁰ sho a rukua ku Karunga: “Omupristeri omukuruntu komukaro gua Melkisedek.”

¹¹ Morua shika sse tu neehapu odindji, eedigu oku di fatura, oshoka kamu na ue eenkondo doku di kuata.

¹² Okudiradira erara omua fere mua ninga nare aarongi. Ndere ne jene omu nokurongua itsheue eehapu dotango derongo rja Karunga. Omua pumbua omashini ike, iikurja ja pama, aaue.

¹³ Oshoka keshe ngoka a pumbua omashini, ke tshi ohapu huujuki, oshoka he okaanana.

¹⁴ Mba ja guanica ja pua, ohaa peua iikurja ja pama, okutja omba je nomukaro guokudiradira neendunge, okujoorora uuhanaua nuuhineji.