Kaahebrei 4 - Etestemente Epe ✠ 1951

ONTOPORUA 4. “Kareni nuudiginini ku Kristus”

¹ Tu tireni ano okudina kuetu omarombuerero gokuha mevururuko rje, nde gumue guomokati keni ta adikua a cigua po.

² Nasse uo otua uvicirua omarombuerero ngashi mbejaka. Ndere mboka inaa mon’oruporo mohapu ndji j’uvire, oshoka okuuva kuauo inaku guanekua nokuiteera.

³ Oshoka sse atu ka ha mevururuko nge tu’iteera ngashi tsha tiua: “Otsho nda gana mondjashi hanje: Kaa ka mon’ompito hokuha mevururuko rjandje,” okutja nanto iironga je jetshito rjuujuni sho ja pua.

⁴ Eshara rirue rjobibeli ari popi esiku etiuunuari ari ti: “Esiku etiuunuari Karunga okua vururukua kiironga je ajishe.”

⁵ Peshara rjetu tapu tiua: “Kaa ka mon’ompito hokuha mevururuko rjarushe.”

⁶ Ano otatshi kara ngii: nokutja jamue otaa hi murjo, na mbejaka j’uvicirua tango ohapu, inaa ha mo, oshoka inaa hiteera.

⁷ Nena Karunga okua uca itsheue esiku, “Onena” sho a popi mokana ka David, erara ere sho rja piti, ngashi kua tiua nokuri: nena nge tamu uvu eui rjandje, inamu kukutika eemuenjo deni.

⁸ Ngeno okua Josue e ja farere mevururuko, ando he ina popja esiku rirue ndi tari ja.

⁹ Ano opu nesiku rjevururuko ri nokutegererua kotshiguana tsha Karunga.

¹⁰ Oshoka ngu a ha mevururuko rje, ota vururukua kiironga je, ngashi Karunga ku jo je muene.

¹¹ Tu enderereni ano sse tu he mevururuko ndika, opo kapu kare gumue ta pukicua kotshoorerua tsha mboka inaa hiteera.

¹² Oshoka ohapu ha Karunga ohi nomuenjo neenkondo, hi nomeego hi vure omuere gueengenge mbari, tahi ururu kujoorora omuenjo nombepo neemongo neengoro, tahi pangura omadiradiro nomaharo gomuenjo.

¹³ Kaku notshitshitua tsha orama ku he, atshishe otsha turua porueera, tsha sukurua momesho ga ngu atu mu okororere.

¹⁴ Sho tu na ano omupristeri omukuruntu, ngu a tuurunga eguru arishe, Jesus Omumua Karunga, tu diginineni ano ehiteero rjetu.

¹⁵ Oshoka katu nomupristeri omukuruntu ngu ita sir’uunkundi uetu esiroshenda, aaue, onguka a makerua miinima ajishe ngasseni uo, ndere ongu kua ke nondjo.

¹⁶ Tu heni ano nehinekero kotshipundi tshoshenda, sse tu mone ondjeerera noshenda, nge tua pumbua ekuaco.