Kaahebrei 3 - Etestemente Epe ✠ 1951

ONTOPORUA 3. Kristus e vure Moses

¹ Ano nduno jamuameme aajapuki oonakuniue kehicano rjomeguru, tareni Jesus omutumua h’omupristeri omunene, ngu tua iteera.

² Ohe omudiginini ku ngoka e mu tura po, ongashi Moses a ri uo mondjugo he ahishe.

³ He okua simanekua nesimano ndi ri vure ndija rja Moses, ongashi omutungi guondjugo e nokusimanekua nesimano enene ri vure rjondjugo.

⁴ Ondjugo keshe ohi nomutungi guaho. Ngu a tunga atshishetshishe oKarunga.

⁵ Tshiri, Moses okua ri omudiginini mondjugo he ahishe. Ndere okua ri omupija ike a huvice omarombuerero.

⁶ Ndere Kristus oku ri po mondjugo he muene ng’Omona. Nde ondjugo ndji osse jene, nge atu pungura sigo okeshuriro ehinekero netegerero rjenjanju.

⁷ Otsha tsa shoka tsha tiua k’Ombepo Ondjapuki: “Nena nge tamu uvu eui rje,

⁸ inamu kukutika eemuenjo deni ngashi mua ningire sho mua ngongotorere esiku rjemakero mombuga,

⁹ mu oosho ja makererendje no ja shindirendje nanto ja mona iironga jandje eemvo eemrongo ine.

¹⁰ Otsho ano nda sire otshiguana shika ondjashi nda ti: ‘Ohaa puka arushe meemuenjo dauo, jo kaa tshi eendjira dandje’.”

¹¹ Otsho nda gana mondjashi handje: Itaa ka mona ompito hokuha mevururuko rjandje.

¹² Kotokeni jamuameme, inapu kara nand’ogumue guomokati keni e nomuenjo omuhineji kagu nehiteero a topoke na Karunga omunamuenjo.

¹³ Aaue, kumagidacaneni omasiku ageshe manka oku na “Onena”, kapu kare gumue ta kukutikua komatshendjereko guurunde.

¹⁴ Oshoka sse oojakuauo ja Kristus, nge atu diginine ehiteero rjetu rjotango sigo okeshuriro.

¹⁵ Okua tirue: Nge tamu uvu eui rje, inamu kukutika eemuenjo deni ngashi mua ningire sho mua ngongotorere.

¹⁶ Oshoka jamue mba j’uvire, oje mu gejicire. Ndere kaa shi ajeshe, mba ja tembukicirue ka Moses mu Egipti.

¹⁷ Mba a ri a sir’ondjashi eemvo eemrongo ine oojeni? Kaa shi ajeshe, mba ja jonene nde go omarutu gauo oga cigua mo mombuga?

¹⁸ Mba a ganenene nokutja itaa mono ompito hokuha mevururuko rje, kaa shi mbo inaa hiteera?

¹⁹ Otsho tue ja dimbururira nokutja itaa hi mo, oshoka inaa hiteera.