Kaahebrei 2 - Etestemente Epe ✠ 1951

ONTOPORUA 2. “Evuriko ku Kristus”

¹ Ano sse otu nokudiginina naua shoka tua uva, katshi tu pitirire ouara.

² Oshoka nge ohapu ndji ha uvicua kaajengeli ha ningi ha kora, kuo okujona keshe nodino oha mona egeero rj’uka,

³ nena sse atu vuru ngiini okuha ondapo nge atu dini ehupico ndino enene, rja uvicua tango ku Muene, rjo komesho rja korekua mu sse ku mboka je ri uvu.

⁴ Rjo rj’okororua ku Karunga keharo rje nomadidiriko niinjengandunge, niironga jiiri no jiiri jeenkondo de, nomagano ga Karunga Ombepo Ondjapuki.

⁵ Oshoka aajengeli kaje shi oojene juujuni mbu tau ja, mbu atu popi.

⁶ Peshara rirue opua okororua ku gumue a ti: “Omuntu omutshike sho ho mu dimburukua nomuna guomuntu sho ho mu tarere po?

⁷ Ue mu tshonopeka e vurike katshona kaajengeli, ue mu opeka nuujerere nesimano no ue mu pa epangero rjiironga jomake gohe.

⁸ Atshishe ue tshi tura koshi heempadi de.” Sho a tura atshishe mepangero rje, kapu na tsha tsha cigua, itatshi pangerua ku he. Ngashingika tshiri itatu tshi dimburura nokutja atshishe otshi ri mepangero rje.

⁹ Ndere ngoka a tshonopekua e vurike katshona kaajengeli, a makere eso moru’ajeshe kesiroshenda rja Karunga, oJesus otu mu uete, a hopekua nuujerere nesimano moru’omeepeko gokusa.

¹⁰ Karunga, omorue iinima ajishe opo ji ri, jo ajishe ja zi mu he, sho a hara okufara ojana ojendji kuujerere, otshe mu oparera okuguanica Muene guehupico rjauo momeepeko.

¹¹ Oshoka ngoka ha japura na mboka haa japurua oja zi ku Gumue. Otsho ina s’oshoni oku ja ruka aamuahina sho ta ti:

¹² “Edina rjohe onda ara oku ri uvicira aamuameme. Mokati kegongaro ngaje onda ara ndi ku amberere.”

¹³ Ko taku tiua itsheue: “Onda ara ndi mu inekere.” No taku tiua: “Tarandje ngaje nuunona mbu Karunga a pandje.”

¹⁴ Oshoka uunona sho u na aushe onjama nombinzi, okue hi tuumba uo mondjira ndjika, opo a kuce meso rje eenkondo domupangeri gueso, omusatana.

¹⁵ He a kurire mboka mba kua ja kuaterua omasiku gauo ageshe kuupika u’uumbanda ueso.

¹⁶ Ine ja a kuacere aajengeli, aaue, oruvaro rua Abraham.

¹⁷ Okua fere okufacana naamuahina miinima ajishe, opo a ninge omunesiroshenda, omupristeri omunene omudiginini motshipara tsha Karunga, a fute eendjo dotshiguana.

¹⁸ Oshoka mu mbika he muene oku’epekua nokua makerua, ota vuru uo okukuaca mboka taa makerua.