Kaahebrei 13 - Etestemente Epe ✠ 1951

ONTOPORUA 13. Omakumagido.

¹ Kareni mohore hokuoracana ngashi aamuahina.

² Inamu dimbua omukaro guokutuumba aahenda mombiri. Morua ngu jamue j’edirira aajengeli inaa tshi tshiua.

³ Dimburukueni oonakumangua nga mboka ja mangua jo jene, noonakueepekua nga mboka je ri nanena morutu.

⁴ Miinima ajishe jomehokano kareni neemkaro eemhanaua. Okariri kehokano ka ka nigirikue. Eembuanda naahonderi otaa ka pangurua ku Karunga.

⁵ Omukona kagu monikue meendjenda deni. Kareni mua panda na mbjoka mu na ngashingika. He muene okua ti: “Inandi ara ndi ku cige po, itii ku eca.”

⁶ Otsho atu vuru okupopja nehinekero: “Muene omukuaci guandje. Kandi na shi te tira. Omuntu ota vuru okuningirandje tshee?”

⁷ Dimburukueni aakuruntu jeni, mba je mu uvicira ohapu ha Karunga. Tareni eshuriro rjeendjenda dauo, rambeni ehiteero rjauo.

⁸ Jesus Kristus ohe tuu nguka nohera no nena no sigo arushe.

⁹ Inamu ihiteerica ku mboka ja ara ku mu pukica nomarongo giiri no giiri nga kamu tshi. Shoka tshi vure atshishe oshika: okukoreka omuenjo noshenda ha niikurja mbi inaji kuaca mboka je ji inekera.

¹⁰ Ss’otu nohaltari hoshura. Hu aakarere jetsari j’indikua okurja.

¹¹ Oshoka ombinzi hiimuna oha farerua komupristeri omukuruntu muujapuki u’uujapuki, eemdimba dajo da fikua po pondje heentanda.

¹² Otsho Jesus a hepekua handijaka hiiheero, opo a japure otshiguana nombinzi he.

¹³ Tu heni ku he pondje heentanda nokuumbata okudinikua kue.

¹⁴ Oshoka huka sse katu notshirongo shi atshi karerere. Otatu kongo shi tatshi ke ja.

¹⁵ Omu he tu ningireni arushe Karunga eeshura domaamberero, nokutja iihimati jeemrungu di adi epurura edina rje.

¹⁶ Ndere inamu dimbua kuninga uuhanaua nokukuaca. Karunga e hore eeshura da tja ngaa.

¹⁷ Vurikeni kaakuruntu jeni ne mu ja randure. Otaa taatarere eemuenjo deni, oshoka otaa ke di purirua. Ando taa ke tshi ninga nenjanju, ha nomajeme, oshoka mu go kamu noruporo rueni.

¹⁸ Tu garikaneneni. Otu’inekera tshiri ehuvo rjetu ehanaua rjomutima sho tu neendjenda eembuanaua miinima ajishe.

¹⁹ Ndere unene andi mu indire oku tshi ninga, ngaje ndi mu tshuninue nzija.

²⁰ Karunga kombiri, ngu a jumuda kuusi omusita gueenzi ngu a simana moru’ombinzi heguaneno rjarushe, ohe Muene guetu Jesus Kristus,

²¹ he e mu pe uunkurungu nuuhanaua aushe okuguanica eharo rje. Ohe na ronge mu ne morua Jesus Kristus shoka tshe mu oparera. He na simanekue arushe sigo arushe Amen.

²² Andi mu garikana, jamuameme, tuumbeni naua ohapu ndjika hekumagido. Onde mu tshangera pashupi ike.

²³ Tshiueni nokutja omumuameme mukuetu Timoteus a mangururua. Puamue na he nda ara ndi mu tarere po nge te ja masiku.

²⁴ Kundireni po aakuruntu jeni ajeshe naajapuki ajeshe. Aamuanjoko jomu Italia taje mu kundu.

²⁵ Oshenda nahi kare puamue na ne amushe Amen.